༢༠༠༩ ཕྱི་ཟླ་ ༡༢ ཚེས་ ༨ རེས་གཟའ་མིག་དམར།
༄༅། །འདི་གར་བོད་གཞུང་ཆོས་རིག་ལས་ཁུངས་ཀྱི་མགྲིན་ཚབ་པས་ཕྱི་ལོ་ ༢༠༠༩ ཟླ་ ༡༢ ཚེས་ ༩ ཉིན་བཏང་གནས་ནང་འཁོད་དོན། ཕྱི་ལོ་ ༢༠༠༩་༡༡་༢༡ ཉིན་དཔལ་ལྡན་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་རྒྱ་གར་གྱི་རྒྱལ་ས་ལྡི་ལིར་བཙན་བྱོལ་བོད་གཞུང་ཆོས་རིག་ལས་ཁུངས་ནས་གོ་སྒྲིག་གནང་བའི་བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་པའི་བླ་ཆེན་རྣམ་པའི་དབུ་ཁྲིད་འོག་ཧི་མ་ལ་ཡའི་རི་རྒྱུད་ཀྱི་བོད་བརྒྱུད་དགོན་སྡེ་ཁག་གི་ཁོར་ཡུག་ཚོགས་འདུའི་སྟ་གོན་ལ་གཟིགས་ཞིབ་དང་ཚོགས་འདུ་དངོས་གཞི་ཉིན་དང་པོ་ཚེས་ ༢༣ ཉིན་གྱི་མཛད་རིམ་བཞིན་ལྷན་བཞུགས་གནང་། དགོང་མོ་ཆོས་རིག་ཟུང་དྲུང་ནོར་བུ་བཀྲིས་ཕྱག་རོགས་དང་བཅས་བལ་ཡུལ་ནང་པའི་གནས་ཆེན་ལུམ་བི་ནིར། དཔལ་ས་སྐྱའི་སྨོན་ལམ་དང་བསྟུན་གོང་མ་བདག་ཁྲི་རིན་པོ་ཆེ་མཆོག་བོད་གངས་ལྗོངས་སུ་༸གོང་ས་༸སྐྱབས་མགོན་ཆེན་པོའི་བཀའ་དགོངས་ལྟར་དཔལ་ལྡན་ས་སྐྱ་པའི་བསྟན་པའི་བདག་པོར་མངའ་གསོལ་ཞུས་ནས་ལོ་ངོ་ ༥༠ འཁོར་བའི་དུས་སྟོན་ལ་ཆེད་ཕེབས་ཀྱིས་སྔ་རྗེས་མཇལ་བཅར་དང་། ལུགས་གཉིས་ཀྱི་མཛད་སྒོར་ལྷན་བཞུགས་དང་འདུས་ཚོགས་རིན་པོ་ཆེར་བསྙེན་བཀུར་བཅས་ལེགས་པར་གྲུབ། ཚེས་ ༢༦ ཉིན་དེ་ནས་ལྡི་ལི་དང་རིམ་བཞིན་མུམ་འབེལ་བརྒྱུད་རྒྱ་གར་ལྷོ་ཕྱོགས་མོན་གྷོ་གཞིས་ཆགས་སུ་ཕེབས་ཐོན་གྱིས། ༢༠༠༩་༡༢་༡ ཉིན་སྔ་དྲོ་དགའ་ལྡན་ཁྲི་ཐོག་བརྒྱ་དང་གཉིས་པའི་མདུན་མཇལ་བཅར་དང་། ཕྱི་དྲོ་དཔལ་ལྡན་འབྲས་སྤུངས་གཙུག་ལག་ཁང་གསར་པའི་ནང་སེར་སྐྱ་མང་ཚོགས་ལ་བཙན་བྱོལ་བོད་གཞུང་ཆོས་རིག་ལས་ཁུངས་ཀྱི་ལས་དོན་དང་འབྲེལ་བའི་འཛིན་སྐྱོང་དང་། ད་ལྟའི་ཆབ་སྲིད་ཀྱི་གནས་བབ་སྐོར་བཅས་བཀའ་སློབ་གནང་། ཚེས་ ༢ ཉིན་དཔལ་དགའ་ལྡན་རྣམ་པར་རྒྱལ་བའི་བླ་སྤྱིར་མཛད་རིམ་ལྟར་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་བརྒྱ་དང་གཉིས་པ་སྐྱབས་རྗེ་རི་རྫོང་སྲས་སྤྲུལ་༸རྗེ་བཙུན་ཐུབ་བསྟན་ཉི་མ་ལུང་རྟོགས་བསྟན་འཛིན་ནོར་བུ་རིན་པོ་ཆེ་མཆོག འཇམ་མགོན་རྒྱལ་བའི་རྒྱལ་ཚབ་ཏུ་མངའ་གསོལ་གྱི་མཛད་རིམ་ལྟར་སྔ་རྗེས་རྟེན་གསུམ་འདེགས་འབུལ་དང་ཐོན་མཇལ། སྐྱབས་གནས་འདུས་ཚོགས་རིན་པོ་ཆེར་བསྙེན་བཀུར་གྱིས་མཚོན་འབྲེལ་ཡོད་ཁག་ལ་མཇལ་འཕྲད་དང་བཅས་ཚེས་ ༣ ཉིན་དེ་ནས་ལྡི་ལི་དང་ཚེས་ ༥ ཉིན་སྔ་དྲོ་རྡ་སར་ཕྱིར་ཕེབས་གྲུབ་པའི་གསར་གནས་སྙིང་བསྡུས་སུ།
