༢༠༡༤ ཟླ་ ༧ ཚེས་ ༣ རེས་གཟའ་ཕུར་བུ།
༄༅། །བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་བཀའ་བློན་ཚེ་རིང་དབང་ཕྱུག་མཆོག་ཕྱི་ལོ་ ༢༠༡༤ ཟླ་ ༦ ཚེས་ ༢༧ ནས་ ༣༠ བར་ཉིན་གྲངས་བཞིའི་རིང་ཧི་མཱ་ཅལ་མངའ་ཁུལ་གྱི་སིར་མོར་རྫོང་ཁོངས་སུ་ཡོད་པའི་ཀམ་རཱའོ་དང་། ས་ཏོན། པུ་རུ་ཝ་ལ། སྤོན་ཊ་ཆོལ་གསུམ་བོད་མིའི་གཞིས་ཆགས་བཅས་ཀྱི་ནང་གཞུང་འབྲེལ་ཕྱོགས་བསྐྱོད་ཐེངས་དང་པོ་ལེགས་གྲུབ་བྱུང་འདུག
དེ་ཡང་ཕྱོགས་བསྐྱོད་སྐབས་བཀའ་བློན་མཆོག་གིས་དགོན་སྡེ་ཁག་དང་། སམ་བྷོ་ཊ་སློབ་གྲྭ། འཕྲོད་བསྟེན་སྨན་ཁང་། སྨན་རྩིས་ཁང་གི་ཡན་ལག་སྨན་ཁང་བཅས་སུ་གཟིགས་སྐོར་ཕེབས་པ་དང་ཆབས་ཅིག ས་གནས་འགོ་འཛིན་དང་བརྒྱ་དཔོན་རྣམས་ཐུག་འཕྲད་གནང་བ་མ་ཟད། ས་གནས་སོ་སོའི་མང་ཚོགས་དང་ཐུག་འཕྲད་ཀྱིས་ཚོགས་འདུའི་ཐོག་གསུང་བཤད་གནང་ཡོད། གཞན་ཡང་བོད་པའི་གཤག་བཅོས་སྨན་པ་རབ་རྒྱལ་ལགས་ཀྱི་སྒེར་བདག་སྨན་ཁང་དུའང་གཟིགས་སྐོར་དུ་ཕེབས་ཡོད་འདུག
དེ་ཡང་བཀའ་བློན་མཆོག་གིས་གཤམ་གསལ་བརྗོད་གཞིའི་ཐོག་མང་ཚོགས་ལ་གསུང་བཤད་གནང་ཡོད། ༡༽བོད་མིའི་རང་དབང་གི་ལས་འགུལ་མུ་མཐུད་གནས་རྒྱུར་བཀའ་ཤག་གི་ལྟ་གྲུབ་གསུམ་སྟེ་ཆིག་སྒྲིལ་དང་། གསར་གཏོད། རང་ཁ་རང་གསོ་བཅས་ཀྱི་གལ་གནད་སྐོར།
༢༽བཀའ་ཤག་སྐབས་ ༡༤ པས་ཤེས་ཡོན་གལ་གནད་ཆེ་ཤོས་སུ་བརྩིས་བཞིན་ཡོད་པའི་སྲིད་བྱུས་སྐོར་འགྲེལ་བརྗོད་སྐྱར་ནན་གནང་ཡོད།
༣༽དབུ་མའི་ལམ་གྱི་སྲིད་བྱུས་དེ་བོད་རྒྱ་མི་རིགས་གཉིས་སྨན་ཀྱི་ཐབས་ལམ་བཟང་ཤོས་ཤིག་ཡིན་སྐོར།
༤༽ བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་དང་དེ་འབྲེལ་ལས་གཞི་གལ་ཆེན་ཁག་དཔེར་ན། མ་དང་བྱིས་པའི་འཕྲོད་བསྟེན། གློ་ནད་ཀྲི་བི་དང་ MDR TB ཀྲི་བི། སྨན་བཅོས་ལྟ་སྐྱོང་ལས་གཞི། མཆིན་པའི་གཉན་ཚད། Hepatitis B འཕྲོད་བསྟེན་སློབ་གསོ། མྱོས་རྫས་ངན་གོམས། སེམས་ཁམས་ཀྱི་འཕྲོད་བསྟེན། གཉེན་ནད་རེག་དུག་བཅས་ཀྱི་ཐོག་གསུང་བཤད་གནང་གྲུབ་རྗེས་མང་ཚོགས་ཀྱི་དྲི་བར་ལན་འདེབས་ཀྱང་གནང་ཡོད། ཕྱོགས་མཚུངས་བཀའ་བློན་མཆོག་གིས་མང་ཚོགས་ལ་ཛ་དྲག་སྨན་བཅོས་འགྲོ་གྲོན་ལས་ཐར་ཐབས་དང་ལྷན། བོད་པའི་སྤྱི་ཚོགས་དང་སྒྲིག་འཛུགས་ལ་རྒྱབ་སྐྱོར་མཚོན་ཆེད་སྨན་བཅོས་ལྟ་སྐྱོང་ལས་གཞིའི་ནང་ཚོགས་ཞུགས་གང་མང་གནང་དགོས་པའི་ལམ་སྟོན་ཡང་གནང་ཡོད། ཕྱོགས་བསྐྱོད་སྐབས་མང་ཚོགས་ཀྱིས་འཕྲོད་བསྟེན་བཀའ་བློན་མཆོག་ལ་ཆུའི་དཀའ་ངལ་དང་། ཁྱིམ་ཚང་ཉམ་ཐག་ཚོར་གསང་སྤྱོད་མེད་པའི་དཀའ་ངལ། གད་སྙིགས་བདག་གཅེས། ཀུམ་རའོ་བོད་མིའི་གཞིས་ཆགས་སུ་འཕྲོད་ལས་པ་དགོས་མཁོ་ཡོད་སྐོར། འཕྲོད་བསྟེན་སྨན་ཁང་དང་ལས་ཤག་གི་གནས་སྟངས་སྐྱོ་པོ་ཡོད་པ་སོགས་ཀྱི་སྐོར་སྙན་སེང་ཞུས་ཡོད། བཀའ་བློན་མཆོག་ཕྱོགས་ཕེབས་སྐབས་འཕྲོད་བསྟེན་ལས་ཁུངས་ཀྱི་དྲུང་ལས་ཉི་མ་རྒྱལ་མཚན་ལགས་ལྷན་བཅར་ཞུས་འདུག་པ་བཅས།།
