༢༠༡༣ ཟླ་ ༡༠ ཚེས་ ༢༤ རེས་གཟའ་ཕུར་བུ།
༄༅། །ཕྱི་ལོ་ ༢༠༡༣ ཟླ་ ༡༠ ཚེས་ ༢༢ ཉིན་སུད་སིའི་གྲོང་ཁྱེར་ཇི་ནི་ཝའི་ནང་རྟེན་གཞི་བྱས་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་དུས་བཀག་བསྐྱར་ཞིབ་ཚོགས་ཐེངས་ ༡༧ པ་ཚོགས་ཡོད། སྐབས་དེར་མཉམ་འབྲེལ་རྒྱལ་ཚོགས་ཀྱི་ཚོགས་མི་ཁོངས་སུ་ཡོད་པའི་རྒྱལ་ཁབ་ཁག་གཅིག་གི་སྐུ་ཚབ་རྣམ་པས་རྒྱ་ནག་གཞུང་ལ་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་བཟང་དུ་གཏོང་སླད་དོམ་དམ་གྱི་ཐབས་ལམ་ཞིག་ལག་བསྟར་བྱེད་དགོས་པའི་འབོད་སྐུལ་ཞུས་འདུག
དེ་ཡང་ཁེ་ན་ཌ་དང། ཅེཀ་སྤྱི་མཐུན་རྒྱལ་ཁབ། ཕ་རན་སི། འཇར་མ་ནི། ནིའུ་ཛི་ལེན་ཌི། པོ་ལན་ཌི། སུད་སི། ཨ་རི། དབྱིན་ཡུལ། ཨ་ཨེ་སི་ལེན་ཌི་བཅས་ཀྱི་སྐུ་ཚབ་འཐུས་མི་རྣམ་པས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་པ་དེར་བློ་འཚབ་ཀྱི་རྣམ་པ་ཤུགས་ཆེ་བཏོན་པ་དང་སྦྲགས། རྒྱ་ནག་གཞུང་ནས་བོད་མིའི་ཆོས་དད་དང། རིག་གཞུང་། སྨྲ་བརྗོད་རང་དབང་གི་ཐོབ་ཐང་སོགས་ལ་རྩིས་མེད་རྡོག་རོལ་བཏང་དང་གཏོང་བཞིན་ཡོད་པའི་སྐོར་ནན་པོ་གསུངས་ཡོད་པ་མ་ཟད། རྒྱ་ནག་གཞུང་ནས་བོད་མིས་གཙོས་གྲངས་ཉུང་མི་རིགས་ཀྱི་ཐོབ་ཐང་དེ་དག་སྲུང་སྐྱོབ་སླད་ཐབས་ལམ་ངེས་ཅན་ཞིག་ལག་བསྟར་བྱེད་དགོས་པའི་ལམ་སྟོན་གནང་ཡོད། དེ་བཞིན་འགྲོ་བ་མིའི་ཐོབ་ཐང་གི་ཆེས་མཐོའི་ལྷན་ཚོགས་ཀྱི་སྐུ་ཚབ་འཐུས་མི་བོད་ནང་གི་དངོས་ཡོད་གནས་སྟངས་རྟོགས་ཞིབ་སླད་འགྲོ་བསྐྱོད་ཆེད་མཐུན་འགྱུར་བསྐྲུན་དགོས་སྐོར་གསུངས་འདུག
སྐབས་དེར་ནིའུ་ཛི་ལེན་ཌིས་བོད་མིའི་མངོན་འདོད་སྒྲུབ་ཐབས་སུ་དོན་སྙིང་ལྡན་པའི་གྲོས་མོལ་བསྐྱར་གསོ་གནང་དགོས་པའི་ལམ་སྟོན་ཡང་གནང་ཡོད། དེ་བཞིན་ཨ་རིས་རྒྱ་ནག་གཞུང་ལ་ཆ་རྐྱེན་གང་ཡང་མེད་པའི་ཐོག་ནས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གི་སྐུ་ཚབ་དང་ལྷན་གྲོས་མོལ་བསྐྱར་གསོ་བྱ་རྒྱུ་ཡིན་མིན་སྐོར་གྱི་དྲི་བ་ཞིག་ཡིག་ཐོག་ཏུ་ཕུལ་ཡོད།
དེར་བརྟེན་བོད་མིའི་སྒྲིག་འཛུགས་ཀྱིས་བོད་མི་ཡོངས་ཀྱི་ཚབ་ཞུས་ཏེ་མཉམ་འབྲེལ་རྒྱལ་ཚོགས་ཀྱི་ཚོགས་མི་ཁོངས་སུ་ཡོད་པའི་འབྲེལ་ཡོད་རྒྱལ་ཁབ་རྣམས་ཀྱིས་བོད་མིར་རྒྱབ་སྐྱོར་གྱིས་རྒྱ་ནག་གཞུང་ལ་རེ་འདུན་ཤུགས་ཆེ་འདོན་གནང་བ་དེར་བཀའ་དྲིན་རྗེས་དྲན་ཞུས་ཡོད། ཕྱོགས་མཚུངས་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་གིས་གནད་དོན་དེ་དང་འབྲེལ་ནས་གསུང་དོན། ཕྱི་ཚེས་ ༢༢ ཉིན་རྒྱ་ནག་གཞུང་གི་རྒྱབ་ཤ་དཀར་པོ་འདོན་སྤེལ་བྱས་པའི་ནང་བོད་ནང་ཡར་རྒྱས་གཏོང་ཆེད་རྒྱ་ནག་སྲིད་གཞུང་ནས་འགྲོ་གྲོན་ག་ཚོད་བཏང་ཡོད་མེད་ཀྱི་གནས་ཚུལ་ཞིབ་ཁྲ་བཀོད་ཡོད། འོན་ཀྱང་ཕྱི་ལོ་ ༢༠༠༩ ལོ་ནས་བཟུང་བོད་ནང་བོད་མི་ ༡༢༡ ཡིས་རང་ལུས་མེར་སྲེག་བཏང་སྟེ་རྒྱ་ནག་གཞུང་གིས་བོད་ཐོག་འཛིན་པའི་ནོར་འཁྲུལ་ཅན་གྱི་སྲིད་བྱུས་ཀྱིས་བོད་མིའི་མངོན་འདོད་སྒྲུབ་ཐུབ་ཀྱི་མེད་སྐོར་ཁོང་རྣམ་པས་ཁ་གཅིག་བསྒྲགས་ཐོག་ཞི་རྒོལ་བྱེད་བཞིན་ཡོད། ཅེས་གསུངས་འདུག་པ་བཅས།།
