༢༠༡༠ ཕྱི་ཟླ་ ༡ ཚེས་ ༢༥ རེས་ཟླ་བ།
་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་
༄༅། །༸གོང་ས་མཆོག་གི་དམིགས་བསལ་སྐུ་ཚབ་རྒྱ་རི་བློ་གྲོས་རྒྱལ་མཚན་དང་སྐལ་བཟང་རྒྱལ་མཚན་རྣམ་གཉིས་རྒྱ་ནག་གཞུང་གི་སྐུ་ཚབ་དང་ལྷན་འབྲེལ་མོལ་སླད་སང་ཉིན་རྒྱ་ནག་ལ་འབྱོར་གྱི་ཡོད་ཅིང་། འདི་ནི་འབྲེལ་མོལ་ཐེངས་དགུ་པ་དེ་ཆགས་ཀྱི་ཡོད་པ་དང་སྦྲགས་ཕྱི་ལོ་ ༢༠༠༢ ལོར་འགོ་བཙུགས་པའི་བོད་རྒྱ་འབྲེལ་མོལ་གྱི་བརྒྱུད་རིམ་ནང་ཟླ་བ་བཅོ་ལྔ་བར་སྟོང་ལུས་པའི་རྗེས་སྐུ་ཚབ་རྣམས་རྒྱ་ནག་ལ་ཕེབས་ཐོན་གནང་ཡོད།
སྐུ་ཚབ་རྣམས་དང་ལྷན་དུ་ཁོང་རྣམ་པའི་ལས་རོགས་རྒན་གྲས་བོད་རྒྱ་ཞི་མོལ་ལས་དོན་ཚོགས་ཆུང་གི་ཚོགས་མི་བསྟན་འཛིན་ཕུན་ཚོགས་ཨ་ཏི་ཤ་དང་། བུ་ཆུང་ཚེ་རིང་། བཀའ་ཡིག་བོད་རྒྱ་ཞི་མོལ་སྡེ་ཚན་གྱི་ལས་བྱེད་འཇིགས་མེད་པ་སངས་བཅས་ཕེབས་ཡོད།
བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་མཆོག་གིས་གཙོ་སྐྱོང་གནང་བའི་བོད་རྒྱ་ཞི་མོལ་སྐོར་ཉིན་གཉིས་རིང་གི་ཚོགས་འདུ་ཞིག་རྡ་རམ་ས་ལར་བསྐྱངས་ཏེ་པེ་ཅིང་དུ་གོ་བསྡུར་བྱ་དགོས་རིགས་ཐུགས་གཏན་འཁེལ་ཡོད་པ་རེད། ཕྱི་ལོ་ ༢༠༡༠ ཟླ་ ༡ ཚེས་ ༢༢ ཉིན་བཀའ་བློན་ཁྲི་པ་མཆོག་དང་སྐུ་ཚབ་རྣམ་པ་གཉིས་བཅས་ནས་༸གོང་ས་མཆོག་ལ་གནད་དོན་དེའི་སྐོར་སྙན་སྒྲོན་ཞུས་པ་དང་ཆབས་ཅིག་བཀའ་སློབ་ལམ་སྟོན་ཡང་ཞུས་ཡོད་པ་རེད། སྐུ་ཚབ་རྣམས་ཟླ་བ་རྗེས་མའི་འགོ་སྟོད་ཙམ་ལ་རྒྱ་གར་དུ་ཕྱིར་ལོག་གནང་གི་ཡོད། སྐུ་སྒེར་དྲུང་ཆེ་འཆི་མེད་རིག་འཛིན་ནས་༢༠༡༠ ཟླ་ ༡ ཚེས་ ༢༥ ཉིན།།
ཐུགས་སྣང་།
གསལ་བསྒྲགས་ངོ་མ་དབྱིན་ཡིག་ཐོག་སྤེལ་ཡོད་པ་ནས་བོད་བསྒྱུར་ཞུས།
ཚིག་དོན་ལ་ཧེ་བག་ཡོད་ཚེ་དབྱིན་ཡིག་རང་ལ་རྩ་འཛིན་ཡོང་བ་ཞུ།།
