༢༠༠༩ ཕྱི་ཟླ་ ༧ ཚེས་ ༡༧ རེས་གཟའ་པ་སངས།

༄༅། །ཀུ་ལུ་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། ༢༠༠༩ ཕྱི་ཟླ་ ༧ ཚེས་ ༦ རྒྱལ་ཀུན་སྙིང་རྗེའི་རང་གཟུགས། འཕགས་མཆོག་ཕྱག་ན་པདྨོ། འཇིག་རྟེན་ཞི་བདེའི་དེད་དཔོན། ལྷར་བཅས་སྲིད་ཞིའི་གཙུག་རྒྱན། གཞིས་བྱེས་བོད་མི་ཡོངས་ཀྱི་དབུ་ཁྲིད་བླ་ན་མ་མཆིས་པ་སྤྱི་ནོར་༸གོང་ས་༸སྐྱབས་མགོན་རྒྱལ་བའི་དབང་པོ་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་དགུང་གྲངས་ ༧༤ ཕེབས་པའི་སྐུའི་འཁྲུངས་སྐར་དུས་ཆེན་ཁྱད་པར་ཅན་གྱི་ཉིན་མོར་འཛམ་གླིང་གང་སར་སྲུང་བརྩི་ཞུ་གི་ཡོད་པ་ལྟར་ཀུ་ལུ་ས་གནས་འགོ་འཛིན་ལས་ཁང་གི་ཁྱབ་ཁོངས་མ་ན་ལིར་སྔ་ལམ་ལྟར་དུས་ཆེན་སྲུང་བརྩི་གཟབ་རྒྱས་ཞུས་ཡོད་པ་རེད།

ཀུ་ལུ་ས་གནས་འགོ་འཛིན་ལས་ཁང་ནས་དེ་ཉིན་གྱི་སྐུ་མགྲོན་གཙོ་བོར་ཀུ་ལུ་རྫོང་གི་ཉེན་རྟོག་པའི་འགོ་འཛིན་སྐུ་ཞབས་ K.K.Indoria ལགས་གདན་ཞུས་ལྟར་ཆེད་ཕེབས་གནང་ཡོད། དེ་བཞིན་སྐུ་མགྲོན་དུ་༸གོང་ས་མཆོག་གི་སྐུ་སྲུང་འགོ་འཛིན་ཟུར་པ་སྐུ་ཞབས་ནོར་བུ་རམ་ལགས་དང་། ཀུ་ལུ་རྫོང་གི་ཧིན་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་ Shiv Chand Thankur ལགས་ཀྱང་མཉམ་ཞུགས་གནང་ཡོད།  

སྐུ་མགྲོན་གཙོ་བོ་མཆོག་ནས་གསུང་བཤད་གནང་དོན། བོད་མི་རྣམས་རྒྱ་གར་ལ་བཙན་བྱོལ་དུ་འབྱོར་ནས་མི་ལོ་ ༥༠ འཁོར་བ་དང་བཙན་བྱོལ་གཞུང་མང་གཉིས་ནས་རྒྱ་གར་གཞུང་དང་ཡུལ་མིར་ཐུགས་རྗེ་ཆེ་ཞུའི་ལས་འགུལ་སྤེལ་བར་བསྔགས་བརྗོད་ཞུ་རྒྱུ་ཙམ་མ་ཟད། རྒྱ་གར་ཡུལ་མི་དང་ལྷན་དུ་ད་ལྟ་བར་ཁྲིམས་མཐུན་གང་ལེགས་ཐོག་ནས་གནས་ཐུབ་པར་རྗེས་སུ་ཡི་རང་གི་འཚམས་འདྲི་ཞུ་བ་དང་ཆབས་ཅིག་མུ་མཐུད་ནས་སྔར་བཞིན་འཆམ་མཐུན་དགོས་རྒྱུ་ཧ་ཅང་གལ་ཆེ་ཡིན་པ་སོགས་ཀྱི་གསུང་བཤད་གནང་རྗེས་དེ་ཉིན་གྱི་གཞས་སྣ་འཁྲབ་སྟོན་པ་རྣམས་ནས་དེར་བཞུགས་སྐུ་མགྲོན་རྣམ་པ་དང་མི་མང་ཚོར་བོད་ཀྱི་ཐུན་མོང་མ་ཡིན་པའི་རིག་གཞུང་གི་གཞས་སྣ་ཁག་གཅིག་འཁྲབ་སྟོན་གྲུབ་མཚམས་སྐུ་མགྲོན་རྣམ་པར་གསོལ་སྟོན་ཞིག་ཀྱང་ཕུལ་ཡོད་པ་རེད། དེ་ཉིན་ས་གནས་ལས་ཁུང་ཁག་དང་ཡུལ་མི་ཚོས་སྐུའི་འཁྲུངས་སྐར་གྱི་དུས་ཆེན་སྲུང་བརྩི་ཞུས་པ་དང་འབྲེལ་བོད་གཞུང་མང་བཙན་བྱོལ་དུ་འབྱོར་ནས་ལོ་ངོ་ ༥༠ འཁོར་བར་རྒྱ་གར་གཞུང་མང་ལ་ཐུགས་རྗེ་ཆེ་ཞུའི་སླད་དུ་མངར་ཟས་མང་པོ་ཞིག་ས་གནས་འགོ་འཛིན་ལས་ཁང་དང་། ས་གནས་རང་བདེན་ཚོགས་ཆུང་། ས་གནས་གཞོན་ནུ་བུད་མེད། ས་གནས་ཚོང་པའི་སྐྱིད་སྡུག་ཐུན་མོང་ནས་མཛད་སྒོར་ཕེབས་པའི་མི་མང་རྣམས་ལ་ཕུལ་ཏེ་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུས་ཡོད་པའི་གནས་བསྡུས་སུ།