༢༠༡༣ ཟླ་ ༨ ཚེས་ ༢༨ རེས་གཟའ་ལྷག་པ།
༄༅། །ཕྱི་ལོ་ ༢༠༡༣ ཟླ་ ༨ ཚེས་ ༢༨ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་དེ་སྔའི་ཨ་རིའི་རང་དབང་འཐབ་རྩོད་པ་སྐུ་ཞབས་མར་ཏིན་ལུ་ཐར་ཀིང་གཞོན་པ་ Martin Luther King Jr. མཆོག་གིས། ངར་རྨིས་ལམ་ཞིག་ཡོད།”
“I Have a Dream” ཅེས་པའི་སྙན་བསྒྲགས་ཆེ་བའི་གཏམ་བཤད་དེ་སྤེལ་ནས་མི་ལོ་ ༥༠ འཁོར་བའི་དུས་དྲན་སྲུང་བརྩི་ཞུ་གནང་མཛད་པ་དང་བསྟུན། མགོན་པོ་གང་ཉིད་མཆོག་གིས་ཀྱང་དུས་རབས་ ༢༡ འདི་ནང་ཞི་བདེ་ལྡན་པའི་འཛམ་གླིང་གི་ཁྱིམ་ཚང་ཞིག་བསྐྲུན་རྒྱུར་ཐུགས་རེ་མཛད་བཞིན་ཡོད་སྐོར་བཀའ་སློབ་སྩལ་བའི་བརྙན་འཕྲིན་ཞིག་༸གོང་ས་ཏཱ་ལའི་བླ་མའི་མཚན་ཐོག་ཡོད་པའི་དྲ་རྒྱའི་ཐོག་འདོན་སྤེལ་གནང་འདུག བརྙན་འཕྲིན་དེའི་ནང་༸གོང་ས་མཆོག་གིས་བཀའ་སློབ་ཕེབས་དོན། ཞི་བདེ་ལྡན་པའི་འཛམ་གླིང་གི་ཁྱིམ་ཚང་ཞིག་ཡོང་བར་ང་ཚོ་ཚང་མ་འགྲོ་བ་མི་རིགས་གཅིག་པ་ཡིན་པའི་འདུ་ཤེས་འཛིན་ཐུབ་པ་དགོས་རྒྱུ་དང། དེ་ལྟ་བུའི་བསམ་བློ་ཞིག་ཤེས་ཡོན་དང་དངོས་ཡོད་གནས་སྟངས་ཐོག་བསམ་བློ་བཏང་ནས་ཡོང་ཐུབ་རྒྱུ་ཡིན། དེ་ལྟར་བྱུང་ན་འཚེ་བ་དང་དམག་འཁྲུག་ཡོང་རྒྱུའི་གཞི་རྩ་མེད་པར་བརྟེན་དུས་རབས་འདི་བཞིན་ཞི་བདེ་ལྡན་པ་ཞིག་ཡོང་ངེས་རེད། ཅེས་བཀའ་སློབ་སྩལ་འདུག དེ་ཡང་ཕྱི་ལོ་ ༡༩༦༨་ཕྱི་ཟླ་ ༨ ཕྱི་ཚེས་ ༢༨ ཉིན་ཨ་རིའི་ནང་མི་རིགས་ནག་པོའི་འཐབ་རྩོད་སྐབས་སྐུ་ཞབས་མར་ཏིན་ལུ་ཐར་ཀིང་གཞོན་པ་མཆོག་གིས། ངར་རྨིས་ལམ་ཞིག་ཡོད། ཅེས་པའི་བསྒྲགས་གཏམ་དེ་སྤེལ་རྗེས་མི་རིགས་ནག་པོ་ས་ཡ་མང་པོར་སྙིང་སྟོབས་འཕེལ་རྒྱུར་ཕན་ཐོགས་ཧ་ཅང་བྱུང་བ་མ་ཟད། མཐར་ཨ་རིའི་ནང་མི་རིགས་འདྲ་མཉམ་ཡོང་རྒྱུར་ཡང་ནུས་པ་ཧ་ཅང་ཐོན་ཡོད།

བརྙན་འཕྲིན་གཟིགས་ཆེད་འདིར་གནོན།