༢༠༡༣ ཟླ་ ༨ ཚེས་ ༡༩ རེས་གཟའ་ཟླ་བ།
༄༅། །ཕྱི་ལོ་ ༢༠༡༣ ཟླ་ ༨ ཚེས་ ༡༦ ཉིན་བསྐྱར་དུ་ཁམས་ཡུལ་ཤུལ་ཁུལ་དགེ་འབྲོང་རྫ་སྟོད་རྫོང་དུ་རྒྱ་མི་གཏེར་ཁ་སྔོག་འདོན་པ་མང་པོ་ཞིག་ཨ་སྟོད་ཡུལ་ཚོ་དང་། སྤྱི་རྫ་ཡུལ་ཚོ། རྫ་ཆེན་ཡུལ་ཚོ་སོགས་ས་གནས་ཁག་གསུམ་དུ་འབྱོར་ཡོད་འདུག གོང་ཚེས་ཉིན་མོ་ལ་རྫ་ཆེན་ཡུལ་དུ་དྲག་ཆས་ཉེན་རྟོག་དམག་མི་ལྔ་བརྒྱ་ལྷག་འབྱོར་ནས་མི་མང་ལ་ཁྱོད་རང་ཚོ་ཕར་རྒྱུགས་གལ་ཏེ་མ་སོང་ནས་འཛིན་བཟུང་དང་། གསོད་རྒྱུ་ཡིན་ཟེར་ནས་འཇིགས་སྐུལ་བྱས་འདུག སྐབས་དེར་མི་མང་གིས་བསད་ནའང་གསོད། ང་ཚོས་
བདེན་པར་རྒྱབ་བཅོལ་གྱི་ཡིན། ཁྱོད་ཚོས་མཚོ་སྔོན་ཞིང་ཆེན་གྱི་དཔོན་པོ་དང་ངན་འབྲེལ་བྱས་ནས་ལྐོག་ཟ་རུལ་སུངས་བྱེད་ཀྱི་འདུག ཀྲུང་གོ་རྒྱལ་ཁབ་ཀྱི་རྩ་ཁྲིམས་ལ་རྡོག་རོལ་གཏོང་བཞིན་པར་ངོ་མ་ཚ་ན་ང་ཚོ་ངོ་ཚ་གི་མི་འདུག འགྲོ་གི་མིན། ང་ཚོས་ཁོར་ཡུག་སྲུང་སྐྱོབ་བྱེད་པའི་དགོས་པ་འདི་ང་ཚོ་བོད་ཀྱི་ས་ཁུལ་དང་རྫ་སྟོད་མི་མང་གི་དོན་མིན། འཛམ་གླིང་མི་གྲངས་དུང་ཕྱུར་བདུན་ཅུའི་ཚེ་སྲོག་དང་འབྲེལ་བ་ཡོད་པ་ཞིག་ཡིན། ཁྱོད་ཚོས་མ་བསད་བར་དུ་འགྲོ་གི་མིན་ཟེར་ནས་ངོ་རྒོལ་བྱས་ནས་བསྡད་འདུག
དེ་རྗེས་ཉེན་རྟོག་དམག་མིས་དྲག་ལས་ཀྱི་སྒོ་ནས་མི་མང་ཁྲོད་དུག་རྫས་གཡུག་པས་མི་མང་ཚང་མ་དྲན་མེད་དུ་གྱུར། མི་སུ་ཡར་ལང་ན་གློག་རྒྱུག་གཞུས་པ་སོགས་མི་སྤྱོད་ལས་འདས་པའི་རྡུང་རྡེག་མནར་གཅོད་ཚད་ལས་འདས་པ་བཏང་བར་བརྟེན། རྨས་སྐྱོན་ཕོག་པའི་མི་མང་ནི་གྲངས་ལས་འདས་པ་བྱུང་ཡོད་འདུག རྗེས་སུ་བོད་ནང་གི་ཆུ་ཚོད་གཉིས་དང་ཕྱེད་ཀ་ཙམ་ལ་ཨག་སྟོད་མི་མང་ལ་དྲག་གནོན་བྱེད་འགོ་བཙུགས་ཡོད། མི་མང་ཁྲོད་དུ་དུག་རྫས་གཡུག་པ་དང་གློག་རྒྱུག་གཞུས་བ། མེ་མདའི་དཔུང་ཡུ་མགོ་ལ་བརྒྱབ་ནས་མི་མང་པོ་ལ་རྨས་སྐྱོན་ཚབས་ཆེན་བཟོས་ཡོད་འདུག ལྷག་པར་རྒྱ་མིའི་རྒྱུགས་ཁྱི་བོད་མི་ཚེ་མགོན་གྱིས་མེ་མདའ་ནམ་མཁའ་ལ་འཕང་ནས་ཁྱོད་ཚོས་ཉོན་དང་རྒྱ་གུང་ཁྲན་ཏང་ལ་ཁ་གཏད་བྱས་ན་གང་འདྲ་འདུག ཅེས་བརྗོད་འདུག
མདོར་ན་ཞིང་ཆེན་དང་། ཁུལ། རྫོང་སྲིད་གཞུང་བཅས་ཀྱིས་གཏེར་རྐུན་རུ་ཁག་ལ་རྒྱབ་སྐྱོར་བྱས་ནས་རྫ་སྟོད་ཨག་སྟོད་མང་ཚོགས་ལ། དྲག་དམག་གི་དུག་མདའ་དང་། དུག་རྫས། མེ་མདའ་སོགས་ཀྱིས་དྲག་གནོན་ཚད་ལས་འདས་པ་བྱས་ཡོད་ཀྱང་། མི་དམངས་རྣམས་སེམས་ཤུགས་མ་ཆག་པར་གདོང་ལེན་བྱས་མཐར་དགུང་མོར་ཕོ་མོ་བརྒྱད་ཙམ་འཛིན་བཟུང་བྱས་ཡོད་འདུག ཁེ་ཚ་བསོད་རྡོར་གར་སོང་ཆ་མེད་དུ་གྱུར་ཡོད་པ་དང། དཔའ་བོ་༼སོག་པོ་ཆོས་འགྲུབ་༽ཀྱིས་སོ་སོའི་གཟུགས་པོ་ལ་སོ་སོས་གྲི་ལན་གཉིས་གཞུས་ནས་རང་སྲོག་གཅོད་ལ་ཉེ་སྐབས། ཉེན་རྟོག་དམག་མིས་བཙན་ཁྱེར་བྱས་འདུག ད་ལྟ་ཤི་གསོན་ཅི་ཡིན་ཤེས་རྟོག་མེད་པའི་གནས་སུ་གྱར་ཡོད།
རྫ་སྟོད་རྫ་ཆེན་མི་མང་ལ་དམག་མི་ལྔ་བརྒྱ་ལྷག་ཙམ་གྱིས་དྲག་གནོན་བྱས་པས་མི་རྒྱུ་གཉིས་ལ་རྨས་སྐྱོན་ཚབས་ཆེན་ཕོག་ནས་ཧ་ཀྱང་ཡིད་སྐྱོ་བའི་གནས་ཚུལ་ཐོན་འདུག ས་གནས་ཡུལ་མི་ཞིག་གི་གནས་ཚུལ་མཁོ་སྤྲོད་བྱས་པ་ལྟར་ན། རྫ་སྟོད་རྫོང་གི་སྨན་ཁང་གཅིག་གི་ནང་དུ་རྨས་སྐྱོན་ཕོག་པའི་མི་གྲངས་བཅུ་བཞི་ཙམ་འདུག དེ་བཞིན་དྲག་ཆས་དམག་མིས་གཞུང་ལམ་ཆ་ཚང་བཀག་འགོག་བྱས་ཡོད་སྟབས། སྨན་ཁང་གཞན་དུ་ག་ཚོད་ཡོད་མེད་ཤེས་ཐུབ་གི་མི་འདུག ལྷག་པར་དྲག་པོའི་དམག་དཔུང་དང་རྡུང་རྡེག་རུ་ཁག་དེ་རྣམས་ཕྱི་ཚེས་ ༡༧ ཉིན་སྤྱི་རྫའི་ཕྱོགས་སུ་བཙན་འཛུལ་བྱེད་འཆར་ཡོད་འདུག་པ་བཅས།།
