༢༠༡༣ ཟླ་ ༦ ཚེས་ ༡༨ རེས་གཟའ་མིག་དམར།
༄༅། །ཕྱི་ལོ་ ༢༠༡༣ ཟླ་ ༦ ཚེས་ ༡༧ རེས་གཟའ་ཟླ་བའི་ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཨོ་སི་ཊོ་ལི་ཡའི་གྲོང་ཁྱེར་སི་ཌི་ནིའི་ Sydney ནང་རྟེན་གཞི་བྱས་པའི་གྲོང་ཁྱེར་ཚོགས་ཁང་ནང་ Town Hall གཞོན་སྐྱེས་བསམ་བློའི་ལྷན་ཚོགས། Young Minds Conference ཞེས་པའི་བགྲོ་གླེང་ལྷན་ཚོགས་སུ་ཆིབས་སྒྱུར་བསྐྱངས་ཏེ། བྱམས་བརྩེ་དང། བསམ་བློ་བག་ཕེབས། མདུན་ལམ་བཟང་པོ། ཞེས་པའི་བརྗོད་གཞིའི་ཐོག་གཞོན་སྐྱེས་མི་གྲངས་ཆིག་སྟོང་ཉིས་བརྒྱ་བརྒལ་བར་བཀའ་སློབ་དང་དྲི་བ་རྣམས་ལ་བཀའ་ལན་མཛད།
སྐབས་དེར་བགྲོ་གླེང་ལྷན་ཚོགས་ནང་མཉམ་ཞུགས་གནང་མཁན་གཞན་རྣམས་ནི་ཀར་ལ་རི་ནལ་ཌི་ལགས་ Carla Rinaldi དང་སྡེ་བྷོ་ར་ཧར་ཀོ་ཊ་ Deborah Harcourt ལགས། ཡ་སི་མིན་ཨབ་ཌེལ་མེ་གེ་ཌི་ Yassmin Abdel-Magied ལགས་བཅས་ཡིན་འདུག དེ་ཡང་ཐོག་མར་ལས་རིམ་གཙོ་སྐྱོང་བ་སྐུ་ཞབས་ས་ཡི་མོན་ལོང་སི་ཊབ་ Simon Longstaff ལགས་ཀྱིས་༸གོང་ས་མཆོག་ལ་མི་བཟང་པོ་ཞིག་གང་འདྲ་བཟོ་ཐུབ་བམ། ཞེས་དྲི་བ་ཞུས་པར་བཀའ་ལན་སྩལ་དོན། མི་བཟང་ངན་གྱི་རྣམ་དབྱེ་འབྱེད་རྒྱུ་དེ་ནི་གཙོ་བོ་སེམས་ནང་ཞི་བདེ་ཡོད་མེད་ལ་བཞག་ཆོག རྒྱུ་ནོར་དང་ཤེས་ཡོན་ཧ་ཅང་ཆེ་བའི་དཔོན་པོ་ཞིག་ཡིན་ནའང་སེམས་ནང་ཞི་བདེ་མེད་ན་བདེ་བ་མེད། ངོས་ཀྱི་ཡུམ་ཆེན་དམ་པར་མཚོན་ན་ཡི་གེ་འབྲི་ཀློག་མི་ཤེས་མཁན་གྱི་ཞིང་པའི་བུད་མེད་གཅིག་ཡིན་ནའང་ཐུགས་སེམས་ཧ་ཅང་བཟང་པོ་ཡོད། ཨ་མ་ལགས་ཀྱིས་རང་གི་ཕྲུ་གུ་ཙམ་མ་ཟད། མི་གཞན་ལའང་ཐུགས་སེམས་ཧ་ཅང་བཟང་པོ་གནང་གི་ཡོད། བར་སྐབས་ཤིག་རྒྱ་ནག་ནང་མུ་གེ་ཤུགས་ཆེ་བྱུང་ནས་རྒྱ་མི་མང་པོ་བོད་བྱང་ཤར་ས་ཁུལ་དུ་ཟས་འཚོལ་དུ་བསླེབས་ཡོད། དེ་དུས་རྒྱ་རིགས་བཟའ་ཟླ་གཅིག་བཀྲེས་སྐོམ་འོག་འདས་གྲོངས་སུ་གྱུར་བའི་ཕྲུ་གུའི་ཕུང་པོ་ཞིག་འཁྱེར་ནས་ང་ཚོའི་ཁྱིམ་ཚང་དུ་ལྟོ་སློང་བར་སླེབ་བྱུང། སྐབས་དེར་ཁོང་གཉིས་བཀྲེས་ལྟོགས་ཀྱིས་ཧ་ཅང་མནར་རྐྱེན་རང་གི་ཕྲུ་གུའི་ཕུང་པོ་ཟ་རྒྱུ་ཡིན་སྐོར་བརྗོད་དུས་ངོས་ཀྱི་མ་དམ་པ་ཐུགས་ཤིན་ཏུ་ཕམ་ནས་བཤུམས། དེ་རྗེས་ཨ་མ་ལགས་ཀྱིས་ཁོང་གཉིས་ལ་ཁ་ཟས་སྦྱིན་པ་མ་ཟད། ཕྲུ་གུའི་ཕུང་པོ་ས་དོང་ནང་སྦ་རོགས་ཀྱང་གནང་ཡོད། ང་ཚོས་ཨ་མ་ལགས་སྐུ་རླུང་བཞེངས་ལང་པ་ནམ་ཡང་མཇལ་མྱོང་མེད། ཞེས་བཀའ་ལན་སྩལ།
གཞན་ཡང་སྐབས་དེར་ཀར་ལ་རི་ནལ་ཌི་ལགས་ཀྱིས་གསུང་དོན། ཁོར་ཡུག་བཟང་པོ་ཡོད་པའི་སྤྱི་ཚོགས་ཀྱིས་ང་ཚོ་མི་བཟང་པོ་ཞིག་ཆགས་རྒྱུར་མཐུན་འགྱུར་བྱེད་ཐུབ་སྐོར་གསུངས་པ་མ་ཟད། སྡེ་བྷོ་ར་ཧར་ཀོཊ་ལགས་ནས་ཀྱང་ང་ཚོ་མི་བཟང་པོ་ཞིག་ཆགས་པར་ཕ་མ་དང་དགེ་རྒན། དེ་བཞིན་སྤྱི་ཚོགས་སོགས་ལ་རག་ལུས་ཡོད་སྐོར་གསུངས།
བགྲོ་གླེང་གྲུབ་བསྟུན་༸གོང་ས་མཆོག་གྲོང་ཁྱེར་སི་ཌི་ནིའི་ནུབ་ཕྱོགས་སུ་ཆིབས་སྒྱུར་བསྐྱངས་ཏེ་མགོན་པོ་གང་ཉིད་མཆོག་གི་གྲོགས་པོ་སྐུ་ཞབས་བྷིལ་ཁུ་རུ་སི་(Rev Bill Crews) མཆོག་དང་མཇལ་འཕྲད་མཛད་པ་མ་ཟད། ཁུལ་དེར་ཨེ་སི་ཕིལ་པེ་རི་ཤི་མི་ཤན་ (Ashfield Parish Mission) ཞེས་པར་རྟེན་གཞི་བྱས་པའི་ཨེཀ་སོ་ཌ་སི་ཐེབས་རྩ་ཁང་ (Exodus Foundation) དུ་ཆིབས་སྒྱུར་བསྐྱངས། སྐབས་དེར་ཐོག་མར་༸གོང་ས་མཆོག་གིས་ཐེབས་རྩ་ཁང་གི་ཡི་ཤུའི་མཆོད་ཁང་ཞིག་ཡོད་པ་དེར་གནས་གཟིགས་མཛད། ཐེབས་རྩ་ཁང་དེས་སྡོད་ཁང་མེད་པའི་མི་མང་ཉམ་ཐག་ཁག་གཅིག་ལ་རོགས་རམ་གནང་བཞིན་ཡོད།
དེ་ནས་༸གོང་ས་མཆོག་གིས་ཉིན་གུང་ལྗགས་སྨིན་མི་མང་ཉམ་ཐག་ཚོ་དང་ལྷན་བཞེས་མཛད་རྒྱུའི་ཐུགས་འདུན་མཛད་པ་ལྟར། ལྗགས་སྨིན་སྐབས་༸གོང་ས་མཆོག་དང་ཆོས་གྲོགས་སྐུ་ཞབས་བྷིལ་ཁུ་རུ་སི་མཆོག་རྣམ་གཉིས་ཀྱིས་མི་མང་ཉམ་ཐག་ཚོར་སྡེར་མའི་ནང་ཁ་ཟས་བླུག་གནང་མཛད། སྐབས་དེར་༸གོང་ས་མཆོག་གིས་བཀའ་སློབ་སྩལ་དོན། ཁྱེད་རང་ཚོ་སྡོད་ཁང་མེད་མཁན་ཚོ་སེམས་ཤུགས་ཆག་རྒྱུ་མེད། གནས་སྐབས་རིང་ཁྱེད་རང་ཚོ་ལྟར་ངོས་ལའང་སྡོད་ཁང་མེད། འོན་ཀྱང་རྒྱ་ཆེ་ས་ནས་བསམ་བློ་བཏང་ན་འཛམ་གླིང་ཧྲིལ་པོ་འདི་ང་ཚོའི་སྡོད་ཁང་དང་འཛམ་གླིང་ནང་གི་འགྲོ་བ་མི་གཞན་རྣམས་ང་ཚོའི་ཆོས་གྲོགས་ཕོ་མོ་ཆགས་ཡོད། དེ་སྔ་རྩ་བ་ནས་ངོ་ཤེས་མེད་པའི་མི་ཚོས་ཁྱེད་ཚོར་གཟིགས་རྟོགས་དང་རོགས་རམ་གནང་བཞིན་ཡོད་པ་འདི་ནི། འགྲོ་བ་མིའི་གཤིས་རྒྱུད་ལ་རང་བཞིན་ལྷན་སྐྱེས་སུ་ཡོད་པའི་སྙིང་སྟོབས་ཤིག་མཚོན་ཐུབ། ངོས་ནས་ཀྱང་ཁྱེད་ཚོར་ཞལ་འདེབས་ཕྲན་བུ་རྒྱག་འདོད་བྱུང། ཞེས་སོགས་ཀྱི་བཀའ་སློབ་སྩལ།
དེ་རྗེས་༸གོང་ས་མཆོག་ཝེ་སི་ཊི་མིཌ་སྨན་ཁང་ Westmead Hospital དུ་ཆིབས་སྒྱུར་བསྐྱངས། སྨན་ཁང་དུ་༸ཞབས་སོར་འཁོད་མཚམས་སྨན་པ་སྐུ་ཞབས་ཇེ་རེ་མི་ཅབ་མན་ Dr Jeremy Chapman ལགས་ཀྱིས་ཕེབས་བསུ་གཟབ་རྒྱས་ཞུས། དེ་རྗེས་སྨན་ཁང་གི་ཚོགས་ཁང་ཞིག་ཏུ་ཆིབས་སྒྱུར་གྱིས་སྨན་པ་དང་འཕྲོད་ལས་པ་བཅས་ཁྱོན་མི་གྲངས་ ༣༤༠ བརྒལ་བར་བཀའ་སློབ་དང་དྲི་བ་རྣམས་ལ་བཀའ་ལན་སྩལ། དེ་རྗེས་སྨན་ཁང་དུ་ནད་པ་ཁག་གཅིག་ལ་ཐུག་འཕྲད་ཀྱིས་སེམས་གསོ་མཛད་ཡོད།།
