༢༠༡༠ ཕྱི་ཟླ་ ༡ ཚེས་ ༢༠ རེས་གཟའ་ལྷག་པ།
་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་
༄༅། །ལྡི་ལི་བོད་སྒར་བསམ་ཡས་གླིང་ས་གནས་འགོ་འཛིན་ནས་འདི་གར་བཏང་གནས་ནང་འཁོད་དོན། ཕྱི་ལོ་ ༢༠༠༩ ཟླ་ ༡༢ ཚེས་ ༡༠ ཉིན་བོད་རྒྱལ་ཁབ་ཆེན་པོའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་འཛམ་གླིང་ཞི་བདེའི་དེད་དཔོན་ལྷར་བཅས་སྲིད་ཞིའི་གཙུག་རྒྱན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་བེལ་ཞི་བདེའི་གཟེངས་རྟགས་ཕུལ་ནས་ལོ་ཉི་ཤུ་འཁོར་བའི་གཞུང་འབྲེལ་གྱི་དུས་དྲན་མཛད་སྒོ་ལྡི་ལི་བོད་སྒར་བསམ་ཡས་གླིང་མི་མང་གིས་སྲུང་བརྩི་གཟབ་རྒྱས་ཞུས་ཡོད། དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༠༠ ཐོག་ལྡི་ལི་དོན་གཅོད་ཁང་དང་བཀའ་བློན་གཅིག་ལྕོགས་བསྟན་པ་ཚེ་རིང་མཆོག་དང་། ཕྱོགས་བཞུགས་སྤྱི་འཐུས་ཆོས་སྐྱོང་དབང་ཕྱུག་ལགས། དོན་ཁང་གི་དྲུང་ཆེ་གཙོས་ལས་བྱེད་རྣམ་པ། ས་གནས་ཀྱི་གཞུང་འབྲེལ་དང་གཞུང་འབྲེལ་མིན་པའི་ཚོགས་སྐྱིད་ཁག་གི་འགན་འཛིན་རྣམ་པ། MLA, Parlad Singh Sawhney,SHO, Timarpurདེ་ཁུལ་གནས་སྡོད་སེར་སྐྱ་མི་མང་རྣམས་མ་ཅུང་ཊི་ལར་བོད་ཁྱིམ་ཉིན་སློབ་ཏུ་འདུ་འཛོམས་ཀྱིས་༧རྒྱལ་བའི་སྐུ་དཔར་མཐོང་གྲོལ་རིན་པོ་ཆེ་མཆོག་སློབ་གྲྭའི་ཚོགས་ཁང་ནས་སེར་སྦྲེང་དང་བཅས་གདན་ཞུས་ཀྱིས་བཞུགས་ཁྲིར་མངའ་གསོལ་རྗེས་༧རྒྱལ་བའི་འཁྲུངས་ལྷར་གསོལ་མཆོད་གཙོ་འགྱུར་གྱི་གངས་ལྗོངས་དཀར་ཕྱོགས་སྐྱོང་བའི་སྲུང་མའི་འཕྲིན་བསྐུལ་དང་བསང་གསོལ་གཟབ་རྒྱས་ཞུས། དེ་ནས་སྐུ་མགྲོན་དང་མི་མང་རྣམས་ནས་༧རྒྱལ་བའི་སྐུ་དཔར་ལ་མཇལ་དར་རིམ་འབུལ་རྗེས་ཉིན་སློབ་ཀྱི་སློབ་ཕྲུག་རྣམས་ནས་རྔ་རོལ་དང་བཅས་འཕགས་བོད་གཉིས་ཀྱི་རྒྱལ་གླུ་དང་ནོ་བེལ་ཞི་བདེའི་གཟེངས་རྟགས་ཀྱི་བསྟོད་དབྱངས་ཕུལ་གྲུབ་མཚམས་བོད་ནང་རྒྱལ་ཁབ་དང་མི་རིགས་ཆེད་ལུས་སྲོག་བློས་བཏང་བའི་རྒྱལ་གཅེས་དཔའ་བོ་དཔའ་མོ་རྣམས་ལ་མྱ་ངན་གུས་འདུད་ངག་བཅད་སྐར་མ་གཅིག་ཞུས། དེ་ནས་ས་གནས་འགོ་འཛིན་ལེགས་སྐྱེས་རྡོ་རྗེ་ལགས་ཀྱིས་དུས་དྲན་ངོ་སྤྲོད་གྲུབ་བསྟུན་ལྡི་ལི་དོན་གཅོད་དང་བཀའ་བློན་གཅིག་ལྕོགས་བསྟན་པ་ཚེ་རིང་མཆོག་གིས་བཀའ་ཤག་གི་ཡོངས་ཁྱབ་གསུང་བཤད་སྒྲོགས་སྱང་དང་། དེ་རྗེས་སྤྱི་འཐུས་ཆོས་སྐྱོང་དབང་ཕྱུག་ལགས་ཀྱིས་སྤྱི་འཐུས་ཀྱི་གསུང་བཤད་སྒྲོགས་སྱང་གནང་རྗེས་ས་གནས་རང་བདེན་ཚོགས་གཙོ་དང་། MLA, Parlad Singh Sawhney,SHO, Timarpurབཅས་ནས་དུས་དྲན་དང་འབྲེལ་བའི་གསུང་བཤད་གནང་། དེ་ནས་ས་གནས་བོད་ཁྱིམ་ཉིན་སློབ་ཀྱི་སློབ་ཕྲུག་དང་ཁམས་ཏྲེ་ཧོར་སྐྱིད་སྡུག ལི་ཐང་སྐྱིད་སྡུག སྡེ་དགེ་སྐྱིད་སྡུག་བཅས་ནས་གཞས་སྣ་ཁག་འཁྲབ་སྟོན་ཞུས། དེ་རྗེས་བསམ་ཡས་གླིང་གི་བརྒྱ་དཔོན་རྡོ་རྗེ་དོན་གྲུབ་ནས་ཐུགས་རྗེ་ཆེ་ཞུས་ཏེ་མཛད་སྒོ་དངོས་གཞི་གྲུབ་པ་དང་སྐུ་མགྲོན་དང་མི་མང་ཡོངས་ལ་བརྒྱ་འཐུས་ཡིག་ཚང་གིས་ཉིན་གུང་གསོལ་ཚིགས་བཤམས་པ་དང་དེ་ནས་རྩེད་རིགས་གོ་སྒྲིག་གིས་དུས་དྲན་སྲུང་བརྩི་གཟབ་རྒྱས་ཞུས་ཡོད་པ་རེད།
