༢༠༡༣ ཟླ་ ༥ ཚེས་ ༢༢ རེས་གཟའ་ལྷག་པ།
༄༅།། ཨ་རིའི་གྲོས་ཚོགས་གོང་མའི་ཁྲིམས་ལུགས་ཚོགས་ཆུང་ནས་རྒྱ་གར་དང་བལ་ཡུལ་གཉིས་སུ་གནས་སྡོད་བཙན་བྱོལ་བོད་མི་ ༥༠༠༠ ལ་ཕྱི་མི་གཞིས་སྤོས་ཀྱི་ཆ་རྐྱེན་འོག་ཐོངས་མཆན་སྤྲོད་རྒྱུར་ངོས་ལེན་གནང་ཡོད། དེ་ནི་གྲོས་ཚོགས་འཐུས་མི་ Dianne Feinstein གྱིས་བཏོན་པའི་བསྐྱར་བཅོས་གྲོས་འཆར་ལ་ཚོགས་གཙོ་ Patrick Leahy དང་། གྲོས་ཚོགས་འཐུས་མི་ Chuck Schumer གཉིས་ཀྱིས་རྒྱབ་སྐྱོར་གནང་བ་དེར་ངག་སྒྲའི་འོས་བསྡུ་བྱས་ཏེ་ངོས་ལེན་ཐོབ་ཡོད་ཀྱང་། ཕྱི་མི་གཞིས་སྤོས་ཀྱི་བཟོ་བཅོས་བསྐྱར་བཅོས་ཁྲིམས་འཆར་འདིར་ཨ་རིའི་གྲོས་ཚོགས་གོང་མས་བསམ་གཞིགས་བྱེད་བཞིན་པ་ཡིན།
འོན་ཀྱང་བོད་འབྲེལ་བསྐྱར་བཅོས་གྲོས་འཆར་འདི་ཉིད་གཏན་འབེབས་འབྱུང་བར་དཀའ་ངལ་ཆེ་བའི་བརྒྱུད་རིམ་མང་དག་ཅིག་འགྲིམ་དགོས་ཡོད། བོད་མི་ཚུད་པའི་ཕྱི་མི་གཞིས་སྤོས་ཀྱི་ཁྲིམས་འཆར་འདིར་ཐོག་མར་ཁྲིམས་ལུགས་ཚོགས་ཆུང་དང། དེ་རྗེས་ཨ་རིའི་གྲོས་ཚོགས་གོང་མས་བཀའ་འཁྲོལ། དེ་ནས་གྲོས་ཚོགས་འོག་མའི་ཁྲིམས་ཡིག་དང་མཉམ་བསྡུར་དག་མཆན་བཅས་བརྒྱུད་དེ་མཐར་གྲོས་ཚོགས་གོང་འོག་གཉིས་ཀས་བཀའ་འཁྲོལ་གཏན་འབེབས་བྱེད་དགོས་པ་ཡིན། བརྒྱུད་རིམ་ཡོངས་རྫོགས་ལ་ཟླ་བ་མང་པོའང་འགོར་སྲིད།
“སེ་ནེ་ཀྲར་ཕཱིནས་ཀྲན་གྱིས་བསྐྱར་བཅོས་གྲོས་འཆར་བཏོན་པ་དང་། ཚོགས་གཙོ་ལཱི་ཧི་དང་། སི་ནེ་ཀྲར་ཤུ་མར་རྣམ་གཉིས་ཀྱིས་རྒྱབ་སྐྱོར་གནང་བ་དང་། བཀུར་འོས་གྲོས་ཚོགས་གོང་མའི་ཁྲིམས་ལུགས་ཚོགས་ཆུང་གི་ཚོགས་མི་རྣམས་ཀྱིས་བསྐྱར་བཅོས་གྲོས་འཆར་ལ་ངོས་ལེན་བཅས་གནང་བར་ཐུགས་རྗེ་ཆེ་ཞུ་རྒྱུ་ཡིན། མཐུན་རྐྱེན་འདིས་བོད་མི་རྣམས་སེམས་ཤུགས་འཕར་རྒྱུ་དང་། རྒྱ་གར་དང་བལ་ཡུལ་དུ་ཡོད་པའི་བོད་མིའི་དཀའ་ངལ་སེལ་རྒྱུར་ཕན་གྲོགས་ཆེན་པོ་ཡོང་རྒྱུ་རེད། གྲོས་དོན་འདི་ངོས་ལེན་གནང་བ་ལ་བརྟེན་ནས་རྒྱ་ནག་གི་དྲག་གནོན་སྲིད་བྱུས་ཁག་ལ་གདོང་ལེན་བྱེད་བཞིན་པའི་བོད་མི་རྣམས་ལ་དོན་དམ་གྱི་རྒྱབ་སྐྱོར་མཚོན་པས་མ་ཚད། ཨ་རིའི་སྲིད་དོན་ཚོགས་པ་གཉིས་ཀས་དུས་ཡུན་རིང་པོ་ནས་བོད་དོན་ལ་རྒྱབ་སྐྱོར་གནང་བ་དོན་དངོས་ཐོག་རྒྱུན་སྐྱོང་གནང་བ་ཡང་མཚོན་གྱི་ཡོད།” ཅེས་སྲིད་སྐྱོང་མཆོག་གིས་གསུངས་ཡོད་པ་རེད།
སེ་ནི་ཀྲར་ཕཱིནས་ཀྲན་གྱིས་བཙན་བྱོལ་བོད་མི་ ༥༠༠༠ ལ་ལོ་གསུམ་གྱི་ནང་ཚུན་གཞིས་སྤོས་ཀྱི་ཐོངས་མཆན་སྤྲོད་རྒྱུའི་བསྐྱར་བཅོས་གྲོས་འཆར་འདི་ནི་ཆ་རྐྱེན་འདྲ་མཚུངས་ཅན་གྱི་ཕྱི་ལོ་ ༡༩༩༠ ལོའི་ཕྱི་མི་གཞིས་སྤོས་ཀྱི་ཁྲིམས་ཡིག་དེར་གཞི་བཅོལ་བ་ཞིག་ཡིན་པ་དང། དེ་སྐབས་ཨ་རིའི་གྲོས་ཚོགས་ཀྱིས་གཏོང་ཕོད་ཆེན་པོའི་སྒོ་ནས་རྒྱ་གར་དང་བལ་ཡུལ་ནང་གནས་སྡོད་བོད་མི་བཙན་བྱོལ་བ་ ༡༠༠༠ ལ་ཕྱི་མི་གཞིས་སྤོས་ཀྱི་ཐོངས་མཆན་སྤྲོད་རྒྱུའི་གནད་དོན་ལ་བཀའ་འཁྲོལ་བསྩལ་ཡོད་པ་རེད། ཨ་རིའི་མི་སེར་ལ་འགྲོ་སོང་མེད་པའི་ལས་རིམ་དེ་ལ་བརྟེན་ནས་ད་ཆ་ཨ་རིའི་མངའ་སྡེ་ ༢༡ ནང་རང་དབང་དང་འཚོ་ཐབས་ཡར་རྒྱས་ལྡན་པའི་ཨ་རིའི་བོད་རིགས་སྤྱི་ཚོགས་གྲུབ་འབྲས་ལྡན་པའི་སྒོ་ནས་གསར་འཛུགས་ཐུབ་པ་བྱུང་ཡོད།
ལོ་ངོ་ལྔ་བཅུ་ལྷག་གི་རིང་༉༸གོང་ས་༸སྐྱབས་མགོན་ཆེན་པོ་མཆོག་གིས་དབུས་བོད་མིའི་འགོ་འཁྲིད་རྣམས་ནས་བོད་མི་རྣམས་རང་དབང་གི་སྒོ་ནས་རང་ཡུལ་དུ་ཕྱིར་ལོག་མ་ཐུབ་པའི་བར་བོད་མི་རིགས་ཀྱི་རིག་གཞུང་དང་ངོ་བོ་སྲུང་སྐྱོབ་བྱེད་རྒྱུའི་འབད་བརྩོན་གནང་བཞིན་པར་བརྟེན། དམིགས་ཡུལ་དེ་བསྒྲུབ་རྒྱུར་བདེ་ཐང་དང་དར་རྒྱས་ངང་འཚོ་བའི་བཙན་བྱོལ་སྤྱི་ཚོགས་ཤིག་བསྐྲུན་རྒྱུ་དེ་༸གོང་ས་མཆོག་གིས་ཡུན་རིང་བཅངས་པའི་དགོངས་གཞི་ཞིག་ཡིན། ཕྱི་མི་གཞིས་སྤོས་ཀྱི་བོད་མིའི་ཐོག་གི་ཆ་རྐྱེན་གསར་པ་དེ་གཏན་འབེབས་བྱུང་ཚེ་བོད་མིའི་སྒྲིག་འཛུགས་ཀྱིས་བོད་ནས་བཙན་བྱོལ་དུ་ཡོང་བའི་བོད་མི་རྣམས་ལ་དོན་སྙིང་ལྡན་པའི་འཚོ་བའི་མདུན་ལམ་སྤྲོད་རྒྱུའི་འབད་རྩོལ་བྱེད་བཞིན་པའི་ཐོག་ཕན་གྲོགས་ཆེན་པོ་ཡོང་རྒྱུ་རེད།
སྐབས་བཅུ་བཞི་པའི་བཀའ་ཤག་གིས་རྒྱལ་སྤྱིའི་སྲིད་གཞུང་ཁག་ནས་བོད་དོན་ལ་རྒྱབ་སྐྱོར་ཐོབ་ཐབས་སུ་ནུས་ཤུགས་འདོན་མུས་ལྟར། སྲིད་སྐྱོ༞ང་མཁས་དབང་བློ་བཟང་སེང་གེ་མཆོག་གིས་དེ་སྔོན་དང་ལྷག་པར་ཉེ་ཆར་ ༢༠༡༣ ཟླ་ ༥ ཚེས་ ༦ ནས་ ༡༠ བར་ཨ་རིའི་རྒྱལ་ས་ཝ་ཤིང་ཀྲོན་ཁུལ་དུ་ཕྱོགས་ཕེབས་གནང་སྐབས་སེ་ནི་ཀྲར་ཕཱིནས་ཀྲན་དང་། ལཱི་ཧི། ཤུ་མར་གསུམ་གྱི་གཙོས་གྲོས་ཚོགས་ཀྱི་འགོ་འཁྲིད་དང་ཁོང་ཚོའི་ལས་རོགས་མང་དག་ཅིག་མཇལ་འཕྲད་གནང་ཡོད། སྲིད་སྐྱོང་མཆོག་གིས་ཨ་རིའི་སྲིད་གཞུང་དང་གྲོས་ཚོགས་ནས་བོད་དོན་དང་བོད་མིར་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཡོད་པ་མ་ཟད། ལྷོ་ཨེ་ཤི་ཡའི་ནང་གི་བོད་མི་སྐྱབས་བཅོལ་བའི་གཞིས་ཆགས་ཁག་གི་གནས་བབ་དང་། བོད་མིའི་སྒྲིག་འཛུགས་ཀྱི་ངོས་ནས་བོད་མི་སྐྱབས་བཅོལ་བ་རྣམས་ལ་ཤེས་ཡོན་དང་འཚོ་རྟེན་གྱི་གོ་སྐབས་སྤྲོད་རྒྱུར་འབད་རྩོལ་ཇི་བྱས་ཐོག་གྲོས་བསྡུར་ཡང་གནང་ཡོད།
ཨ་རིའི་ཕྱི་མི་གཞིས་སྤོས་ཀྱི་ཁྲིམས་གཞིའི་ནང་བོད་འབྲེལ་བསྐྱར་བཅོས་གྲོས་འཆར་བཅུག་ཡོད་པ་དེ་ནི་བརྒྱུད་རིམ་རིང་པོའི་ནང་གི་གོམ་པ་དང་པོ་ཙམ་ཡིན་པ་བློ་ངེས་དགོས། ཐོག་མར་གྲོས་ཚོགས་གོང་མའི་ཁྲིམས་ལུགས་ཚོགས་ཆུང་དང་། དེེ་རྗེས་ཕྱི་མི་གཞིས་སྤོས་ཁྲིམས་ཡིག་ལ་གྲོས་ཚོགས་གོང་མས་སྤྱི་མོས་ངོས་ལེན་ཐོབ་དགོས་པ་དང། གྲོས་ཚོགས་འོག་མའི་ངོས་ནས་ཕྱི་མི་གཞིས་སྤོས་ཁྲིམས་ཡིག་ཅིག་ཟུར་དུ་བཟོ་སྒྲིག་གནང་དགོས་ཡོད། དེ་ནས་གོང་གི་ཁྲིམས་འཆར་གཉིས་གཅིག་ཏུ་བསྒྲིལ་དགོས་པ་ཡིན། དེར་བརྟེན་ཕྱི་མི་གཞིས་སྤོས་ཀྱི་གསར་བཅོས་གྲོས་འཆར་འདི་ནི་ཧ་ཅང་རྙོག་འཛིངས་ཆེ་བའི་གནད་དོན་ཞིག་ཡིན་སྟབས་མཐའ་མཇུག་ཏུ་ཁྲིམས་གཞི་དེར་མཐའ་མའི་མོས་མཐུན་མ་ཐོབ་པའི་གནས་སྟངས་ཡང་ཆགས་སྲིད་པར་བརྟེན་བོད་མི་རྣམས་ནས་དོན་མེད་འུར་འདྲོགས་གནང་ཐལ་མེད་པ་དགོས་རྒྱུར་བཀའ་ཤག་གིས་འབོད་སྐུལ་ནན་པོ་བྱེད་རྒྱུ་ཡིན། ཕྱི་ལོ་ ༢༠༡༣ ཟླ་ ༥ ཚེས་ ༢༡ ལ།། །།
