༢༠༡༣ ཟླ་ ༤ ཚེས་ ༡༠ རེས་གཟའ་ལྷག་པ།
༄༅། །རྒྱལ་སྤྱིའི་འགྲོ་བ་མིའི་ཐོབ་ཐང་རྟོག་ཞིབ་ཚོགས་པའི་འགན་འཛིན་སྐུ་ཞབས་སོ་ཕི་རི་ཆ་ཌི་སན་ (Sophie Richardson) མཆོག་གིས་ཕྱི་ལོ་ ༢༠༡༣ ཟླ་ ༤ ཚེས་ ༩ རེས་གཟའ་མིག་དམར་ཉིན་ཨ་རིའི་ཕྱི་སྲིད་དྲུང་ཆེ་སྐུ་ཞབས་ཇོན་ཀེ་རི་ (John Kerry) མཆོག་ལ་འབོད་སྐུལ་གྱི་ཞུ་སྙན་ཞིག་ཕུལ་ཡོད་པའི་ནང་དོན་གཙོ་བོ་ནི། ཕྱི་ལོ་ ༢༠༡༣ ཟླ་ ༤ ཚེས་ ༡༣། ༡༤ བཅས་ཉིན་གྲངས་གཉིས་རིང་ཨ་རིའི་ཕྱི་སྲིད་དྲུང་ཆེ་སྐུ་ཞབས་ཇོན་ཀེ་རི་མཆོག་རྒྱ་ནག་ཏུ་རྒྱལ་དོན་འཚམས་གཟིགས་ཕེབས་སྐབས། རྒྱ་ནག་དང་བོད། ཤིང་ཅང་སོགས་ཀྱི་འགྲོ་བ་མིའི་ཐོབ་ཐང་གི་གནས་སྟངས་སྐོར་འབྲེལ་ཡོད་རྒྱ་ནག་གཞུང་གི་དཔོན་རིགས་དང་ལྷན་བགྲོ་གླེང་གནང་དགོས་པ་མ་ཟད། རྒྱ་ནག་གཞུང་གིས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་དབུས་བོད་མིའི་དབུ་ཁྲིད་དང་ལྷན་གྲོས་མོལ་བསྐྱར་མཐུད་གནང་སྟེ་ད་ཡོད་བོད་མིའི་དཀའ་ངལ་རྣམས་སེལ་དགོས་པ་རྒྱ་ནག་འགོ་ཁྲིད་ཚོར་འབོད་སྐུལ་གནང་དགོས་པ་སོགས་འཁོད་ཡོད།
ཕྱོགས་མཚུངས་ཞུ་སྙན་དེའི་ནང་ཕྱི་ལོ་ ༢༠༠༩ ནས་བོད་མི་ཚོས་གཅིག་མཇུག་གཉིས་མཐུད་ཀྱིས་རང་ལུས་མེར་སྲེག་ལས་འགུལ་སྤེལ་བའི་སྐོར་འཁོད་དོན། ཕྱི་ལོ་ ༢༠༠༩ ནས་འགོ་འཛུགས་ཀྱིས་བོད་ནང་རང་ལུས་མེར་སྲེག་གི་ལས་འགུལ་བསྟུད་མར་ཐོན་ཡོད། རྒྱ་ནག་གཞུང་གིས་བོད་མི་ཚོའི་དངོས་ཡོད་དཀའ་ངལ་སེལ་རྒྱུའི་ཚབ་ཏུ་རྒྱ་ནག་དབུས་དང་ས་གནས་གཞུང་གཉིས་ཀས་བོད་མིའི་ཐོག་དམ་བསྒྲགས་བྱེད་ཤུགས་ཆེ་རུ་བཏང་སྟེ། བོད་མི་ཚོའི་འགྲོ་སྡོད་སྤྱོད་གསུམ་ཐོག་རྟག་ཏུ་སོ་ཉུལ་བྱས་པ་དང། བོད་པའི་དགོན་སྡེ་ཁག་གི་ནང་གཞུང་གི་མི་སྣ་ཆེད་འཛུགས་བྱས་པ་མ་ཟད། རང་ལུས་མེར་སྲེག་གི་ལས་འགུལ་སྤེལ་མཁན་ཚོའི་ནང་མི་སྤུན་མཆེད་ཚོོར་གཞུང་གི་ཐོབ་ཐང་སྤྲོད་ཀྱི་མེད། དེ་བཞིན་རང་ལུས་མེར་སྲེག་སྐོར་སྐད་ཆ་བཤད་པ་ཙམ་གྱིས་ཁྲིམས་ཆད་བཏང་བ་སོགས་དམ་བསྒྲགས་ཀྱི་ལས་འགུལ་མང་དག་ཅིག་སྤེལ་བཞིན་ཡོད་པ་ང་ཚོར་ར་སྤྲོད་བྱུང། ཞེས་སོགས་འཁོད་ཡོད།
གཞན་ཡང་ད་དུང་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ཨུ་ཌལ་ (Udall) མཆོག་དང། རུ་བྷི་ཡ་མཆོག (Rubio) ཕེན་སི་ཊ་ཡིན་ (Fienstein) མཆོག་བཅས་གསུམ་གྱིས་སྣེ་ཁྲིད་དེ་ཨ་རིའི་ཕྱི་སྲིད་དྲུང་ཆེ་མཆོག་ལ་འབོད་སྐུལ་དོན་ཚན་བདུན་འཁོད་པའི་ཞུ་སྙན་ཞིག་ཕུལ་ཡོད་པའི་དོན་ཚན་དེ་དག་ནི།
༡༽ སྐུ་ཉིད་མཆོག་གིས་རྒྱ་ནག་གཞུང་གི་འགོ་ཁྲིད་དང་ལྷན་གྲོས་མོལ་གནང་སྐབས་བོད་ཀྱི་གནད་དོན་དེ་ཡང་གྲོས་མོལ་གནང་རྒྱུའི་གནད་དོན་ཞིག་ཏུ་བརྩི་དགོས་པ་དང། དེ་ལྟར་བརྩི་དགོས་པའི་རྒྱུ་མཚན་ཡང་དེ་སྔའི་ཨ་རིའི་ཕྱི་སྲིད་དྲུང་ཆེའི་ལས་འགན་རྒྱུན་སྐྱོང་གནང་བ་ལྟ་བུ་དང་། ཡང་ན་ཨ་རིའི་ཆབ་སྲིད་ཀྱི་འགྲོ་ལུགས་ཙམ་གྱི་རྣམ་པའི་ཐོག་ནས་མིན་པར། བོད་ཀྱི་གནད་དོན་དེར་རྒྱབ་སྐྱོར་བྱ་རྒྱུ་དེ་བཞིན་ཨ་རིའི་ཕྱི་སྲིད་ལས་ཁུངས་ཀྱི་ལངས་ཕྱོགས་བརྟན་པོ་ཞིག་ཡིན། ལངས་ཕྱོགས་དེ་ཡང་རྒྱལ་སྤྱིའི་ཁྱོན་ཡོངས་ལ་ཁྱབ་པའི་གཞི་རྩའི་རིན་ཐང་ལ་གཞི་བཅོལ་བ་ཞིག་ཡིན་པའི་ར་སྤྲོད་གནང་དགོས།
༢༽ རྒྱ་ནག་གཞུང་གི་འགོ་ཁྲིད་ཚོས་བོད་མིའི་དབུ་ཁྲིད་དང་ལྷན་གྲོས་མོལ་བསྐྱར་མཐུད་གནང་རྒྱུའི་རེ་འདུན་འདོན་དགོས།
༣༽ བོད་ཀྱི་གནད་དོན་ཐོག་དམིགས་བསལ་འབྲེལ་མཐུད་པ་ཞིག་གང་མགྱོགས་བསྐོ་གཞག་གནང་དགོས།
༤༽ བོད་མིར་དཔལ་འབྱོར་དང་ཤེས་ཡོན། དེ་བཞིན་གསར་འགྱུར་སོགས་ཀྱི་མཐུན་འགྱུར་གནང་མཁན་གྱི་ལས་གཞི་འདྲ་མིན་ཁག་ལ་མུ་མཐུད་དཔལ་འབྱོར་རྒྱབ་སྐྱོར་གནང་དགོས།
༥༽ སྲིད་གཞུང་གཞན་དང་འབྲེལ་བ་གནང་སྟེ་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ལྷན་ཁང་གི་འགན་འཛིན་ལྕམ་སྐུ་ན་ཝི་པི་ལེ་མཆོག་གིས་བསྒྲགས་གཏམ་སྤེལ་བ་དེར་གཞི་བཅོལ་ཏེ། བོད་ནང་དུ་རང་དབང་ཅན་གྱི་རྟོག་ཞིབ་མི་སྣ་ཆེད་གཏོང་གིས་ས་གནས་སུ་དངོས་ཡོད་གནས་སྟངས་ཇི་འདྲ་ཡིན་མིན་ཞིབ་རྩད་དགོས་པ་མ་ཟད། རང་དབང་ལྡན་པའི་རྒྱལ་སྤྱིའི་གསར་འགོད་པར་དམ་བསྒྲགས་བྱས་པ་རྣམས་འཕྲལ་མར་མཚམས་འཇོག་གིས་ས་ཁུལ་དེ་དག་ཏུ་ཆེད་གཏོང་གནང་དགོས་པའི་རེ་འདུན་འདོན་དགོས།
༦༽ ཨ་རིའི་ནང་རྒྱ་ནག་གཞུང་འབྲེལ་མི་སྣ་ཚོར་དམ་བསྒྲགས་མེད་པ་ལྟར། རྒྱ་ནག་གཞུང་ནས་ཀྱང་ཨ་རིའི་གཞུང་འབྲེལ་མི་སྣ་ཚོ་བོད་ཀྱི་ས་ཁུལ་ཁག་ཏུ་དམ་བསྒྲགས་མེད་པའི་ཐོག་ནས་འགྲོ་བསྐྱོད་འཇུག་དགོས་པའི་ཆ་རྐྱེན་འདོན་དགོས།
༧༽ ལྷ་སའི་ནང་ཨ་རིའི་གཞུང་ཚབ་འཛུགས་རྒྱུའི་ཆ་རྐྱེན་དེ་གལ་ཆེ་ཤོས་སུ་བརྩི་དགོས། ཞེས་འཁོད་འདུག
གོང་འཁོད་ཞུ་སྙན་དེར་ད་བར་རྒྱབ་སྐྱོར་གནང་མཁན་ཨ་རིའི་གྲོས་ཚོགས་གོང་མའི་འཐུས་མི་བཅུ་ཙམ་བྱུང་ཡོད་པ་རྣམས་ནི། སྐུ་ཞབས་མཀ་ཨུ་ཌལ་ (Mark Udall) མཆོག་དང། མར་ཀོ་རུ་བྷི་ཡོ་ (Marco Rubio) མཆོག ཌེན་ནེ་ཕ་ཡིན་སི་ཊེན་ (Dianne Feinstein) མཆོག བྷར་བྷ་ར་བྷོག་སར་ (Barbara Boxer) མཆོག རི་ཆ་ཌི་ཌིཀ་ཌུར་བྷན་མཆོག (Richard ‘Dick’ Durban) བྷེན་ཀར་ཌིན་ (Ben Cardin) མཆོག པེ་ཊིཀ་ལི་ཧེ་ (Patrick Leahy) མཆོག ཊོམ་ཨུ་ཌལ་ (Tom Udall) མཆོག རོན་ཝེ་ཌན་ (Ron Wyden) མཆོག རི་ཆ་ཌི་བྷུ་ལུ་མན་ཐལ་ (Richard Blumenthal) མཆོག་བཅས་ཡིན་འདུག
