༢༠༠༩ ཕྱི་ཟླ་ ༥ ཚེས་ ༡༦ རེས་གཟའ་སྤེན་པ།
༸གོང་ས་མཆོག་ནས་བཙུན་དགོན་འཇམ་དབྱངས་ཆོས་གླིང་གཙུག་ལག་ཁང་གི་འདུ་ཁང་ཆེན་པོའི་དབུ་འབྱེད་ཀྱི་དར་སྣ་གཅོད་འབྲེག་གནང་བཞིན་པ།
༄༅། །ས་སྟེང་རྒྱལ་བསྟན་ཡོངས་རྫོགས་ཀྱི་མངའ་བདག་འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་སྐུ་འཁོར་བཅས་བོད་རྒྱལ་ལོ་ ༢༡༣༦ རབ་བྱུང་བཅུ་བདུན་པའི་ས་གླང་ཕྱི་ལོ་ ༢༠༠༩ ཕྱི་ཟླ་ ༥ ཚེས་ ༡༦ རེས་གཟའ་སྤེན་པའི་སྔ་དྲོ་ཆུ་ཚོད་ ༡༠།༠༠ ཐོག་བཙུན་དགོན་འཇམ་དབྱངས་ཆོས་གླིང་དུ་༸ཞབས་སོར་འཁོད་སྐབས་བཙུན་དགོན་གྱི་ཕེབས་སྒོའི་མདུན་ནས་བཙུན་མ་རྣམས་ནས་མེ་ཏོག་དང་མཆོད་རྫས་སྣ་ཚོགས་ཐོགས་ནས་ཕེབས་བསུ་ཞུས་ཏེ་གཙུག་ལག་ཁང་གི་མདུན་དུ་༸གོང་ས་མཆོག་ཕེབས་འཁོར་ནས་ཕྱིར་གཤོལ་སྐབས་དབུ་དགེ་རིན་པོ་ཆེ་དགེ་བཤེས་ཚུལ་ཁྲིམས་རྒྱ་མཚོ་དང་དབུ་འཛིན་ལས་རོགས་བཙུན་པ་རྣམ་གཉིས་ནས་དཀར་གཙང་གི་མཇལ་དར་རྐྱང་འབུལ་ཞུས་ཏེ་གཙུག་ལག་ཁང་བར་སྤོས་སྣེས་གདན་ཞུ་མཛད། གཙུག་ལག་ཁང་གི་སྒོ་འཕྱོར་འོག་༸ཞབས་སོར་འཁོད་དེ་དབུ་འབྱེད་ཀྱི་དར་སྣ་གཅོད་འབྲེག་གྲུབ་མཚམས་འདུ་ཁང་ནང་ཆིབས་སྒྱུར་བསྐྱངས་ཏེ་སྐུ་གསུང་ཐུགས་རྟེན་གི་དྲུང་དུ་སྣང་གསལ་ཞལ་ཕྱེ་གནང་བ་དང་སྟབས་བསྟུན་གནས་གཟིགས་གནང་གྲུབ་རྗེས་བཞུགས་ཁྲི་རིན་པོ་ཆེར་སྐུ་བཞུགས་ཏེ་དབུ་དགེ་རིན་པོ་ཆེ་ནས་མཎྜལ་རྟེན་གསུམ་འདེགས་འབུལ་ཞུས།
༸གོང་ས་༸སྐྱབས་མགོན་ཆེན་པོ་མཆོག་ནས་སེར་སྐྱ་མི་མང་ལ་བླང་དོར་བྱེད་སྒོའི་བཀའ་སློབ་བཀའ་དྲིན་སྩོལ་བཞིན་པ།
དེ་རྗེས་ཞལ་འདོོན་དཀོན་མཆོག་རྗེས་དྲན་གྱི་མདོ་དང་། པཎ་གྲུབ་བཅུ་བདུན་གྱི་གསོལ་འདེབས། ༸རྒྱལ་བའི་ཞབས་བརྟན། མཎྜལ་བཅས་གསུང་གྲུབ་རྗེས་༸གོང་ས་མཆོག་ནས་ཆོས་འབྲེལ་སྩལ། དེ་ནས་སློབ་གཉེར་ཁང་དེའི་དབུ་ཕར་རབ་འབྱམས་ཐོན་པ་འཛིན་རིམ་གསུམ་ཁོངས། ཕར་ཕྱིན་གྱི་ཕྱག་འཁྱེར་བཞེས་མཁན་བཙུན་མ་གྲངས་ ༢༦ དང་དབུ་ཕར་གཉིས་ཀའི་ཕྱག་འཁྱེར་བཞེས་མཁན་བཙུན་མ་གྲངས་ ༡༣ དཔལ་ལྡན་ཆོས་རིག་བཀའ་བློན་མཆོག་ནས་ཕྱག་འཁྱེར་དང་མཇལ་དར་གནང་། དེ་བཞིན་རིམ་པས་དཔེ་ཆའི་དགེ་རྒན་དང་། སྦྱིན་བདག དགོན་པའི་ཨར་རྒྱག་གི་བཟོ་བཀོད་པ་སོགས་གནད་ཡོད་མི་སྣར་དཔལ་ལྡན་ཆོས་རིག་བཀའ་བློན་མཆོག་ནས་མཇལ་དར་དང་རྟེན་སྐུ་རེ་གནང་གྲུབ་རྗེས་༸གོང་ས་མཆོག་ནས་བཀའ་སློབ་ཕེབས་དོན། དེ་རིང་ཁ་སང་གི་དུས་ཚོད་འདིར་འཛམ་གླིང་སྤྱི་ཡོངས་ལ་བལྟས་པ་ཡིན་ན་སངས་རྒྱས་ཀྱི་ཆོས་ལ་དོ་སྣང་བྱེད་མཁན་མང་དུ་འགྲོ་གི་ཡོད། སངས་རྒྱས་ཀྱི་ཆོས་འགྲེལ་བཤད་རྒྱག་སྟངས་དེ་ངོ་མཚར་སྐྱེས་གཞི་ལྟ་བུ་བྱས་ཏེ་རྒྱ་ཅེར་འགྲོ་མུས་ཡིན། ང་ཚོ་ཕ་མེས་ནས་སྤྱིར་སངས་རྒྱས་ཀྱི་ཆོས་ཉམས་ལེན་བྱེད་མཁན། ཡང་སྒོས་དཔལ་ནཱ་ལེཎྡྲ་ཆོས་བརྒྱུད་འཛིན་མཁན་གྱི་སངས་རྒྱས་ཀྱི་ཆོས་བྱེད་མཁན་ཡུལ་གྲུ་དེ་དག་ནང་ནས་གཅིག་རྒྱ་ནག་ཡིན་པ་རེད། དེ་སྔོན་དཀའ་ངལ་མང་པོ་ཞིག་འཕྲད་ཟིན། འོན་ཀྱང་དེ་རིང་ཁ་སང་ཕྲན་བུ་འགྱུར་བ་ཕྱིན་ཏེ་ཆོས་ལ་བཤད་སྒྲུབ་ཉམས་ལེན་བྱེད་རྒྱུའི་གོ་སྐབས་ཕྲན་བུ་ཡོད།
དཔལ་ལྡན་ཆོས་རིག་བཀའ་བློན་མཆོག་ནས་དབུ་ཕར་རབ་འབྱམས་པའི་འཛིན་རིམ་གསུམ་ལ་ཕྱག་འཁྱེར་གནང་བ།
ལྷག་པར་དུ་མཁན་ཆེན་ཞི་འཚོ་ཡབ་སྲས་ཀྱི་རྗེས་འབྲང་ངོ་མ་ནི་ང་ཚོ་བོད་པ་ཡིན། དེ་ནས་སོག་པོ་ཡིན་ནའང་བར་སྐབས་ཉམས་ཆག་ཆེན་པོ་ཕྱིན་ཟིན་པ་རེད། བོད་ལ་ཉམས་ཆག་འགྲོ་བཞིན་པའི་སྐབས་རེད། གང་ལྟར་དཔལ་ནཱ་ལེཎྡྲ་མཁས་པའི་གཙུག་རྒྱན་གྱི་གྲས་མཁན་ཆེན་ཞི་འཚོ་ཡབ་སྲས་ཀྱི་ཕྱག་སྲོལ་གཏོད་པའི་བོད་གངས་ཅན་ལྗོངས་སུ་སངས་རྒྱས་ཀྱི་བསྟན་པ་ཐེག་པ་ཆེ་ཆུང་སྔགས་དང་བཅས་པ་ཡོངས་རྫོགས་རང་གི་ལུང་པའི་ནང་ཉམས་ཆག་འགྲོ་གི་ཡོད། སོག་ཡུལ་རང་དབང་ཐོབ་ནས་བསྟན་པའི་མེ་རོ་སླར་གསོ་རྒྱུའི་འབད་བརྩོན་ཆེན་པོ་བྱས་པ་རེད། ཧི་མ་ལའི་རི་རྒྱུད་དུ་གནས་པའི་མི་མང་དེ་དག་ལ་རང་དབང་ཡོད་ལ་ཁྱེད་ཚོ་བོད་པ་དང་ཆོས་ཚུལ་གཅིག་པ་ཆགས་ཡོད། བོད་ཀྱི་མ་འོངས་པའི་གནས་སྟངས་ངེས་མེད་ཡིན་རྐྱེན་ནང་པ་སངས་རྒྱས་པའི་བསྟན་པ་དེ་མི་ཉམས་རྒྱུན་འཛིན་བྱ་རྒྱུ་དེ་ནི་ཁྱེད་རང་ཚོའི་འོས་འགན་ཡིན། ཞེས་བཀའ་སློབ་རྒྱ་ཆེ་གནང་གྲུབ་རྗེས་མཇུག་ཏུ་གཏང་རག་མཎྜལ་འབུལ་སྐབས་གནད་ཡོད་མི་སྣར་མཇལ་ཕྱག་སྩལ་བཞིན་དབུ་མཛད་ནས་ཞལ་འདོན་བསྟན་རྒྱས་སྨོན་ལམ་དང་རིས་མེད་ཐུབ་བསྟན་རྒྱས་པའི་སྨོན་ལམ་གསུངས་ཏེ་མཛད་སྒོ་གྲུབ་པ་དང་༸གོང་ས་མཆོག་དབུ་རྩེའི་གཟིམ་ཆུང་དུ་ཉིན་གུང་གི་ལྗགས་སྨིན་དུ་ཆིབས་ཞལ་བསྒྱུར་བ་དང་། སྐུ་མགྲོན་ཁག་དང་མི་མང་། ས་གནས་རྒྱ་གར་ཡུལ་མི་བཅས་ལ་ཡང་ཉིན་གུང་གི་གསོལ་ཚིགས་ཀྱང་གནང་ཡོད།
ད་རེས་ཀྱི་བཙུན་དགོན་འཇམ་དབྱངས་ཆོས་གླིང་གཙུག་ལག་ཁང་གི་དབུ་འབྱེད་མཛད་སྒོར་ཕེབས་པའི་སྐུ་མགྲོན་གཙོ་བོ་དཔལ་ལྡན་ཆོས་རིག་བཀའ་བློན་མཆོག་དང་། བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག དེ་བཞིན་སྤྱི་འཐུས་དང་། དགོན་སྡེ་ཁག་གི་བླ་སྤྲུལ་མཁན་པོ། དེ་བཞིན་ས་གནས་བདེ་དོན། རྡ་སྟེང་བོད་ཁྱིམ་སློབ་གྲྭའི་སྤྱི་ཁྱབ་འགན་འཛིན། ས་གནས་གཞོན་ནུ། བུད་མེད་ཚོགས་པ། བོད་ཀྱི་དགུ་བཅུ་གསུམ་ལས་འགུལ་ཚོགས་པ། རྒྱལ་ཡོངས་མང་གཙོ་ཚོགས་པ། སེར་སྐྱ་མི་མང་བཅས་ཁྱོན་སྟོང་ཕྲག་ཉེ་བ་བཅར་ཞུགས་གནང་བའི་གནས་བསྡུས་སུ།།
