༢༠༠༩ ཕྱི་ཟླ་ ༥ ཚེས་ ༡༥ རེས་གཟའ་པ་སངས།
༄༅། །འདི་གར་ཁུངས་ལྡན་གྱིས་གནས་ཚུལ་འབྱོར་བར་གཞིགས་ན། བོད་རང་སྐྱོང་ལྗོངས་ཀྱི་ཁོངས་གཏོགས་སུ་ཡོད་པའི་རྫོང་སོ་སོའི་དགོན་སྡེ་ཁག་གི་ནང་ཡོད་གྲྭ་བཙུན་རྣམས་ལ་རྒྱལ་གཅེས་རིང་ལུགས་ཀྱི་སློབ་གསོའི་ལས་འགུལ་སྤེལ་ཆེད་བོད་རང་སྐྱོང་ལྗོངས་ཀྱི་འབྲེལ་ཡོད་ཚན་པས་བྱ་ཐབས་གསར་པ་ལག་ལེན་བསྟར་ཏེ་རིང་མིན་དགོན་སྡེ་ཁག་གི་གྲྭ་བཙུན་གཙོ་བཟུང་ཐོག་རྫོང་ཁག་སོ་སོའི་ནང་སློབ་གསོའི་ཚོགས་ཆེན་འཚོག་སྟེ་དཔར་ལེན་བྱ་འཆར་ཡོད་པའི་གནས་ཚུལ་ཐོན་འདུག
དེ་བཞིན་བོད་རང་སྐྱོང་ལྗོངས་ཀྱི་ཁོངས་སུ་གཏོགས་པའི་རྫོང་ཁག་གི་དགོན་སྡེའི་ནང་འབྲེལ་ཡོད་ཚན་པས་དགོན་སྡེ་ཉམས་གསོ་བྱ་རྒྱུར་ཀྲུང་དབྱང་ནས་རོགས་དངུལ་སྤྲོད་དགོས་པའི་ཡིག་ཆ་གསར་པ་ཞིག་ཐོན་ཡོད་པའི་དྲིལ་བསྒྲགས་བྱེད་བཞིན་ཡོད་པ་མ་ཟད། དགོན་སྡེ་ཁག་ནང་བརྙན་འཕྲིན་ཆེ་གྲས་གཉིས་ནས་གསུམ་བར་དང་། གྲྭ་བཙུན་སོོ་སོའི་ཤག་ནང་བརྙན་འཕྲིན་དང་མཐུད་བྱེད་ཀྱི་ཅ་དངོས་ཀྱང་རིན་མེད་ཐོག་མཁོ་སྤྲོད་བྱས་ཏེ་གྲྭ་བཙུན་ཚོར་འདོད་པ་མེད་བཞིན་དུ་མི་སྣ་ཆེད་གཏོང་གིས་བསྒྲིགས་བཀོད་བྱེད་དུ་བཅུག་གི་ཡོད་པ་རེད།
དེ་མཚུངས་གྲྭ་བཙུན་ཚོར་ཐབ་ཆས་དང་ཉལ་གདན་སོགས་ཀྱང་སྤྲད་དེ་རྒྱལ་ཁབ་ནས་གཟིགས་སྐྱོང་གནང་བ་ཞིག་ཡིན་ཚུལ་འབྲེལ་ཡོད་ལས་བྱེད་པས་ཁོང་རྣམས་ལ་འགྲེལ་བརྗོད་བྱེད་བཞིན་ཡོད། དེའི་དམིགས་ཡུལ་གཙོ་བོ་ཁག་གཉིས་འཛིན་ཡོད་འདུག གཅིག་ནི་རིང་མིན་བོད་རང་སྐྱོང་ལྗོངས་ཁོངས་གཏོགས་རྫོང་ཁག་གཅིག་ནང་ཡོད་དགོན་སྡེ་ཆེན་པོ་ཁག་ནང་ཡུལ་སྐོར་སྤྲོ་འཆམ་པ་འགྲོ་སའི་ལྟེ་གནས་ཙམ་མ་ཡིན་པར་རྫོང་ཁག་གི་གཞིས་དགོན་ཆུང་གྲས་ཁག་གཅིག་གནས་ཡུལ་དུ་ཡུལ་སྐོར་སྤྲོ་འཆམ་པ་འགྲོ་སའི་ཁོངས་སུ་བཅུག་སྟེ་དགོན་སྡེ་དེ་དག་གི་གྲྭ་བཙུན་བེད་སྤྱད་དེ་རྒྱལ་སྤྱིའི་གླེང་ཕྱོགས་ལས་གཡོལ་ཐབས་ཆེད་བོད་ནང་ཆོས་དད་རང་མོས་དང་གྲྭ་བཙུན་ཚོའི་གནས་སྟངས་མཚོན་ཐབས་བྱ་རྒྱུ་དང་། གཉིས་ནི། དུས་ཐུང་ནང་བོད་རང་སྐྱོང་ལྗོངས་ཀྱི་རྫོང་ཁག་ནང་གྲྭ་བཙུན་གཙོ་བོར་གྱུར་བའི་ས་གནས་མང་ཚོགས་བསྡུ་བསྐོང་བྱས་ནས་སློབ་གསོའི་ཚོགས་འདུ་ཚོགས་ཏེ་གོང་གསལ་གྱི་བརྒྱུད་རིམ་ཁག་བརྙན་འཕྲིན་ཐོག་དཔར་ལེན་གྱིས་དྲིལ་བསྒྲགས་བྱ་འཆར་ཡོད་འདུག
དེ་ནི་བོད་རང་སྐྱོང་ལྗོངས་ཀྱི་ཁོངས་སུ་གཏོགས་པའི་མང་ཚོགས་དང་གྲྭ་བཙུན་ཚོར་དགོས་ངེས་མ་ཡིན་པའི་མཐུན་རྐྱེན་ཁག་གཅིག་མཁོ་སྤྲོད་བྱས་ཏེ་གྲྭ་བཙུན་དང་མང་ཚོགས་ནས་རྒྱ་གཞུང་གི་རྒྱལ་གཅེས་རིང་ལུགས་ཀྱི་སློབ་གསོའི་ལས་འགུལ་ཞེས་པ་དེར་རྒྱབ་སྐྱོར་ཐོབ་རྒྱུར་འབད་བརྩོན་བྱེད་བཞིན་པའི་རྣམ་པ་གསར་པ་ཞིག་རེད་འདུག
