༢༠༡༠ ཕྱི་ཟླ་ ༡ ཚེས་ ༡༤ རེས་གཟའ་ཕུར་བུ།
་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་
༄༅། །ཕྱི་ལོ་ ༢༠༡༠ ཟླ་ ༡ ཚེས་ ༡༣ ཉིན་སྔ་དྲོ་ཆུ་ཚོད་ ༩།༣༠ ཐོག་ཨོ་རི་ས་བོད་མིའི་གཞིས་ཆགས་ཀྱི་རི་དགོན་ཐུབ་བསྟན་སྨིན་གྲོལ་གླིང་གི་གཙུག་ལག་ཁང་ཆེན་མོར་བླ་སྤྲུལ་དགེ་འདུན་གྱི་སྡེ་དང་།
༸གོང་ས་མཆོག་ཕྱི་ཟླ་ ༡ ཚེས་ ༡༣ ཉིན་ཐད་འཕུར་གནམ་གྲུའི་ནང་ཆིབས་སྒྱུར་མ་གནང་གོང་གི་སྐུ་དཔར།
ས་གནས་བོད་མི། ཕྱི་རྒྱལ་བ་བཅས་མི་གྲངས་སྟོང་ཕྲག་བརྒལ་བ་འདུས་པའི་དབུས་སུ་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་ཕེབས་དོན། ངོས་ཀྱི་མི་ཚེ་ཉིན་ཞག་ཕྲུག་གཅིག་གི་ནང་ལ་ཕལ་ཆེར་དུས་ཚོད་བརྒྱ་ཆ་བརྒྱད་ཅུ་དགུ་བཅུ་ཆོས་ཕྱོགས་ཐོག་གཏོང་གི་ཡོད། ཞོགས་པ་ཆུ་ཚོད་གསུམ་དང་ཕྱེད་ཀ་ཙམ་ནས་འཆར་ཅན་བྱས་ཏེ་ལངས་ཀྱི་ཡོད། ཆུ་ཚོད་གསུམ་དང་ཕྱེད་ཀ་ཙམ་ནས་བརྒྱད་དང་ཕྱེད་ཀ་བར་དུ་འདོན་པ་བཏོན་བསམ་བློ་ཏོག་ཙམ་བཏང་འདི་འདྲ་བྱས་འགྲོ་བསྡད་ཀྱི་ཡོད། ཉིན་རེ་ཉིན་རེར་མི་ཐུག་ནས་མང་ཆེ་བའི་བར་ཆོས་ཀྱི་སྐོར་ཤོད་ཀྱི་ཡོད། ༧རྒྱལ་བ་རིན་པོ་ཆེའི་མིང་ཡོད་པའི་ཐོག་ནས་ངོས་ལ་ལས་འགན་ཞིག་འཁྲིས་ཡོད་སྐབས། དུས་ཡུན་གང་ཙམ་འབྲེལ་ཡོད་མི་ཚོ་ཐུག་སྟེ་སྡོད་ཀྱི་ཡོད། ལྷག་པར་ཕྱི་ལོ་ ༢༠༠༡ ལོ་ནས་བཀའ་བློན་ཁྲི་པ་འོས་བསྡུའི་ཐོག་ནས་འདེམས་བསྐོ་བྱེད་རྒྱུ་བྱུང་བའི་རྗེས་ལ་གང་ལྟར་ངོས་ཀྱི་གནས་སྟངས་དེ་ཕྱེད་རྒས་ཡོལ་ལྟ་བུ་ཡིན་ཞེས་ཤོད་ཀྱི་ཡོད་ལ་དོན་ངོ་མ་དེ་རང་རེད། ཅེས་བཀའ་སྩལ། ཡང་དེ་ཉིན་སྔ་དྲོ་༸གོང་ས་མཆོག་གིས་མང་ཚོགས་ལ་དགེ་བསྙེན་གྱི་སྡོམ་པ་སོགས་ཀྱི་སྔོན་འགྲོའི་གསུང་ཆོས་ལ་ཆོས་སློབ་སྦྱོང་བྱེད་དགོས་པའི་སྐོར་ལ་ལམ་སྟོན་བཀའ་སློབ་སྩལ་དོན། བོད་གངས་ཅན་ལྗོངས་ལ་ཆ་བཞག་ན་མི་མང་ཚང་མ་ནང་ཆོས་ལ་དད་པ་བྱེད་མཁན་ཤ་སྟག་རེད། འོན་ཀྱང་དད་པ་ཤུགས་ཆེན་པོ་ཡོད་པ་མ་གཏོགས་དད་པ་བྱེད་སའི་ཡུལ་སངས་རྒྱས། ཆོས། དགེ་འདུན་དེ་ཚོའི་གྲས་གང་འདྲ་ཞིག་ཡིན་པ་རྩད་གཅོད་བྱེད་ཀྱི་མེད་པ་རེད་ལ་དོ་སྣང་ཡང་བྱེད་ཀྱི་མེད། དེ་འདྲ་ཡིན་དུས་ང་ཚོ་བོད་རྒྱ་ཆེའི་མི་དམངས་ཀྱི་ནང་ཆོས་ཀྱི་ཤེས་ཚད་དེ་ཞེ་དྲག་སྐྱོ་པོ་རེད་འདུག སངས་རྒྱས་ཀྱི་ཆོས་ཤེས་ནས་དད་པ་ཐོབ་པ་ཞིག་དགོས་ཀྱི་རེད་མ་གཏོགས་ལམ་དང་ལུགས་སྲོལ་ལྟ་བུ་བྱས་ནས་ཕྱིན་པ་ཡིན་ན་ཞེ་དྲག་གི་ཞག་རྩི་དང་གཏིང་རིང་པོ་མེད་པ་རེད། དེར་བརྟེན་སློབ་སྦྱོང་བྱ་རྒྱུ་གལ་ཆེན་པོ་རེད། ཅེས་བཀའ་སློབ་སྩལ་ཡོད།
་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་
