༢༠༡༠ ཕྱི་ཟླ་ ༡ ཚེས་ ༡༤ རེས་གཟའ་ཕུར་བུ།
༄༅། །ཕྱི་ལོ་ ༢༠༡༠ ཟླ་ ༡ ཚེས་ ༡༣ ཉིན་གྱི་སྔ་དྲོ་ཆུ་ཚོད་ ༩།༠༠ ཐོག་ཨོ་རི་ས་བོད་མིའི་གཞིས་ཆགས་སུ་སྔོན་འགྲོའི་ཆོས་འབྲེལ་མ་སྩལ་སྔོན་གསར་འགོད་ལྷན་ཚོགས་ཤིག་ལ་གསར་འགོད་པ་ཞིག་གིས་དྲི་བར་བཀའ་ལན་སྩལ་དོན། རྒྱ་དཀར་ནག་གཉིས་ཀྱི་འབྲེལ་བ་གོང་འཕེལ་ཡོང་རྒྱུའི་ཆེད་ངོས་ནས་རྒྱུན་དུ་རྒྱབ་སྐྱོར་བྱེད་ཀྱི་ཡོད། གང་ཡིན་ཟེར་ན་རྒྱ་དཀར་ནག་གཉིས་ནི་འཛམ་གླིང་ནང་ནས་མི་འབོར་ཆེན་པོ་ཡོད་པའི་རྒྱལ་ཁབ་ཡིན་དུས་དེའི་འབྲེལ་བ་བརྒྱུད་ནས་འཛམ་གླིང་ཞི་བདེར་ཕན་རྒྱུ་ཡིན་པར་བརྟེན། ཕྱོགས་གཉིས་ཀྱི་འབྲེལ་བ་གོང་འཕེལ་ཡོང་རྒྱུར་སྨོན་ལམ་དང་རེ་བ་བྱེད་ཀྱི་ཡོད། ཡིན་ནའང་འབྲེལ་བ་དེ་དྲང་པོ་དྲང་བཞག་དང་ཕྱི་གསལ་ནང་གསལ་དགོས་རྒྱུ་དེ་གལ་ཆེན་པོ་རེད། སྟབས་མ་ལེགས་པ་ཞིག་ལ་མི་འབོར་ཆེ་ཤོས་རྒྱ་ནག་མི་དམངས་སྤྱི་མཐུན་རྒྱལ་ཁབ་ནང་ཕྱི་གསལ་ནང་གསལ་མེད་པ་དེ་དཀའ་ངལ་གཅིག་རེད། ཡང་གསར་འགོད་པ་ཞིག་གིས་བོད་མི་རྣམས་ཐོག་མར་བཙན་བྱོལ་དུ་འབྱོར་སྐབས་རྒྱ་གར་གཞུང་གིས་གཞིས་ཆགས་ཆེད་ས་ཆ་གནང་ཡོད་ཀྱང་། ད་ཆ་བོད་མིའི་མི་འབོར་མང་དུ་འགྲོ་ཡོད་དུས་ས་ཆ་འཕར་མ་དགོས་པའི་དགོས་པ་གཟིགས་ཀྱི་ཡོད་དམ། ཞེས་པའི་དྲི་བར་བཀའ་ལན་སྩལ་དོན། ང་ཚོར་ཕྱི་ལོ་ ༡༩༦༠ ལོ་འགོར་གཞིས་ཆགས་ཆེད་ས་ཆ་དེ་འདྲ་གནང་བ་དེ་བསོད་ནམས་ཆེན་པོ་ཞིག་རེད་བསམ་གྱི་ཡོད། ས་ཆ་དེ་ཙམ་མ་ཟད་ཀ་ཌྷ་ཊ་ཀ་མངའ་སྡེ་དང་། མ་ཧཱ་རཤཱེ་ཊ་མངའ་སྡེ། ཨ་རུ་ན་ཅལ་མངའ་སྡེས་མཚོན་ས་ཆ་མང་པོ་གནང་ཡོད་དུས་བསོད་ནམས་ཆེན་པོ་རེད་བསམ་གྱི་ཡོད། དེང་སང་མི་འབོར་མང་དུ་ཕྱིན་ནས་དཀའ་ངལ་ཡོད་ཀྱང་ང་ཚོས་ས་ཆ་འཕར་མ་གནང་རོགས་ཞེས་ཞུ་རྒྱུའི་འཆར་གཞི་མེད་ཀྱང་ས་ཆ་གང་ཡོད་པ་དེ་བེད་སྤྱོད་ཆ་ཚང་བ་ཞིག་ཐུབ་པའི་འཆར་གཞི་སྒྲིག་བཞིན་ཡོད། ཅེས་གསར་འགོད་པ་ཚོར་བཀའ་ལན་སྩལ་ཡོད
