༢༠༡༢ ཟླ་ ༡༢ ཚེས་ ༢༠ རེས་གཟའ་ཕུར་བུ།
༄༅། །བོད་ནང་བོད་མི་ཚོས་རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་ལ་ཞི་རྒོལ་ཆེད་རང་ལུས་མེར་སྲེག་གི་དོན་རྐྱེན་བསྟུད་མར་འབྱུང་བཞིན་ཡོད་རྐྱེན་ཉེ་ཆར་ཡུ་རོབ་སྤྱི་མཐུན་ཚོགས་པ་དང་། ཨ་རི། ཁེ་ན་ཌ་བཅས་རྒྱལ་ཁབ་སོ་སོའི་གཞུང་འབྲེལ་མི་སྣ་དང་གྲོས་ཚོགས་འཐུས་མི་སོགས་ཀྱིས་བོད་ནང་གི་ཛ་དྲག་གནས་སྟངས་ཐོག་བློ་འཚབ་ཡོད་པའི་རྣམ་པ་ཤུགས་ཆེ་བཏོན་པའི་ཐོག རྒྱ་ནག་གཞུང་ལ་བོད་ནང་དུ་དམ་བསྒྲགས་ཅན་གྱི་སྲིད་བྱུས་མཚམས་འཇོག་དགོས་པའི་རེ་འདུན་བཏོན་པ་བཞིན། འདི་ཟླའི་ཕྱི་ཚེས་ ༡༨ ཉིན་པེ་ཅིང་དུ་རྟེན་གཞི་བྱས་པའི་དབྱིན་ཇིའི་གཞུང་ཚབ་ཁང་གིས་དབྱིན་ཇིའི་ཕྱི་སྲིད་བློན་ཆེན་སྐུ་ཞབས་ཧུ་གོ་སུ་ཝ་ཡེར་མཆོག་ (Hugo Swire) གི་མཚན་ཐོག་ནས་བསྒྲགས་གཏམ་ཞིག་སྤེལ་བ་དེའི་ནང་འཁོད་དོན། བོད་ནང་དུ་བོད་མི་ཚོས་རང་ལུས་མེར་སྲེག་བཏང་བའི་གནས་སྟངས་དེར་དབྱིན་ཇིའི་གཞུང་ལ་བློ་འཚབ་ཧ་ཅང་ཡོད་པ་མ་ཟད། རྒྱ་ནག་གཞུང་ནས་བོད་ནང་དམ་བསྒྲགས་མཚམས་འཇོག་གིས་བོད་ཀྱི་གནད་དོན་སེལ་ཆེད་དོན་སྙིང་ལྡན་པའི་བོད་རྒྱ་གྲོས་མོལ་བསྐྱར་གསོ་གནང་དགོས་པའི་རེ་འདུན་ཞུ་རྒྱུ་དང།
ཉེ་ལམ་ཡུ་རོབ་སྤྱི་མཐུན་ཚོགས་པའི་བདེ་འཇགས་དང་ཕྱི་འབྲེལ་ལས་དོན་ཚན་པའི་ཆེས་མཐོའི་སྐུ་ཚབ་ལྕམ་སྐུ་ཁེ་ཐེ་རིན་ཨེ་ཤི་ཊོན་ (Catherine Ashton) མཆོག་གིས་བོད་ནང་གི་གནས་སྟངས་ཐོག་བསྒྲགས་གཏམ་ཞིག་སྤེལ་བ་དེར་ང་ཚོས་མཐའ་གཅིག་ཏུ་རྒྱབ་སྐྱོར་ཞུས་པ་དང་སྦྲགས། ཕྲན་ནས་ཀྱང་ལྕམ་སྐུ་ཨེ་ཤི་ཊོན་མཆོག་གིས་གསུངས་པ་ལྟར། ང་ཚོས་བོད་ནང་གི་བོད་མི་ཚོར་རང་ལུས་མེར་སྲེག་གཏོང་རྒྱུས་མཚོན་ཚབས་ཆེའི་ལས་འགུལ་རིགས་མ་སྤེལ་རོགས་ཞེས་འབོད་སྐུལ་ཞུ་རྒྱུ་མ་ཟད། འབྲེལ་ཡོད་བོད་མིའི་སྤྱི་ཚོགས་དང་ཆོས་ཕྱོགས་ཀྱི་དབུ་ཁྲིད་རྣམ་པས་རང་ནུས་གང་ཡོད་ཀྱིས་རང་སྲེག་གི་ལས་འགུལ་དེ་རིགས་མཚམས་འཇོག་ཡོང་ཐབས་གནང་རོགས་ཞེས་ཞུ་རྒྱུ་ཡིན། ང་ཚོའི་ཕྱོགས་ནས་ཀྱང་བོད་ཀྱི་གནད་དོན་སེལ་ཆེད་བོད་རྒྱ་གཉིས་དབར་དོན་སྙིང་ལྡན་པའི་གྲོས་མོལ་བསྐྱར་གསོ་གནང་དགོས་པའི་འབོད་སྐུལ་ཞུས་ཐོག བོད་མིའི་དཀའ་ངལ་སེལ་ཆེད་ཕུགས་རྒྱང་རིང་པོའི་ཐབས་ལམ་ནི་རྒྱ་ནག་གི་རྩ་ཁྲིམས་ནང་འཁོད་པ་བཞིན་བོད་མི་ཚོར་གཞི་རྩའི་འགྲོ་བ་མིའི་ཐོབ་ཐང་དང་རང་སྐྱོང་གི་གནས་བབ་ཚད་ལྡན་ཞིག་སྤྲོད་རྒྱུ་དེ་ཡིན། ཞེས་འཁོད་ཡོད་པ་བཅས།།
