༢༠༡༠ ཕྱི་ཟླ་ ༡ ཚེས་ ༡༤ རེས་གཟའ་ཕུར་བུ།
༸གོང་ས་མཆོག་དང་ནམ་མཁའ་རིན་པོ་ཆེ་མཆོག།
༄༅། །ཕྱི་ལོ་ ༢༠༡༠ ཟླ་ ༡ ཚེས་ ༡༢ ཉིན་བོད་མིའི་ཆོས་སྲིད་གཉིས་ཀྱི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྔ་དྲོ་ཆུ་ཚོད་ ༩ ཙམ་ལ་རི་དགོན་ཐུབ་བསྟན་སྨིན་གྲོལ་གླིང་གཙུག་ལག་ཁང་གི་ཕོ་བྲང་ནས་པདྨ་སམ་བྷ་བ་གཙུག་ལག་ཁང་དུ་ཆིབས་སྒྱུར་བསྐྱངས་པ་དང་འབྲེལ་མགོན་པོ་གང་ཉིད་མཆོག་གིས་ཞལ་སྔ་ནས་འཕགས་པ་བཀྲ་ཤིས་རྩེག་པའི་ཚིགས་སུ་བཅད་པའི་སྔོན་བསུས་ཏེ་ཕུན་སུམ་ཚོགས་པའི་གཤིས་བརྗོད་བཅས་དར་ཚོན་གཅོད་འབྲེག་དང་གཙུག་ལག་ཁང་དབུ་འབྱེད་བཀའ་དྲིན་བསྐྱངས་ཡོད། དེ་ནས་མགོན་པོ་གང་ཉིད་མཆོག་གིས་མཆོད་མེ་ཞལ་ཕྱེ་དང་སྦྲགས་གཙུག་ལག་ཁང་གི་དཔེ་མཛོད་ཁང་ལ་གཟིགས་ཞིབ་མཛད། དེ་རྗེས་བླ་སྤྲུལ་དང་། དགེ་འདུན་གྱི་སྡེ། བཙན་བྱོལ་བོད་གཞུང་གི་བཀའ་བློན་ཁྲི་པ་དང་སྤྱི་འཐུས། གཞན་ཡང་ཨོ་རི་ས་ཕུན་ཚོགས་གླིང་བོད་མིའི་གཞིས་སྒར་གྱི་འགན་འཛིན་རྣམ་པ། དེ་བཞིན་ས་གནས་མི་མང་བཅས་ཁྱོན་བསྡོམས་མི་གྲངས་སྟོང་ཕྲག་བརྒལ་བ་འདུ་འཛོམས་ཀྱིས་ཐོག་མར་དགོན་པའི་དབུ་བླ་ནམ་མཁའ་རིན་པོ་ཆེ་མཆོག་གིས་འཚམས་འདྲིའི་གསུང་བཤད་གནང་ཡོད། དེ་རྗེས་༸གོང་ས་མཆོག་གིས་གཞིས་ཆགས་ཁུག་ཀྱོག་འདི་འདྲ་ཞིག་ཏུ་གཙུག་ལག་ཁང་གསར་བཙུགས་ཐུབ་པར་ལེགས་གསོའི་བསྔགས་བརྗོད་ཀྱི་བཀའ་སློབ་སྩལ་བ་དང་ཆབས་ཅིག་དེར་ཡོད་དགེ་འདུན་པ་རྣམས་གཙོ་བོར་གྱུར་བའི་མིི་མང་ལ་བཀའ་སློབ་ཕེབས་དོན། ལུང་རྟོགས་ཀྱི་བསྟན་པ་འཛིན་སྐྱོང་སྤེལ་གསུམ་ནིེ་བཤད་སྒྲུབ་གཉིས་ཀྱི་ཐོག་ནས་བྱེད་དགོས་པ་ཡིན་དུས་ཁྱེད་རང་ཚོས་པདྨ་ནོར་བུ་རིན་པོ་ཆེའི་བཤད་གྲྭ་ནས་མཁན་པོ་གདན་དྲངས་ཏེ་འཆད་ཉན་གྱི་ལས་ལ་འབད་པར་ཡག་པོ་ཞེ་དྲག་བྱུང་འདུག དེ་བཞིན་འདིེ་གར་ཐུན་མོང་མ་ཡིན་པའི་ཆོས་བརྒྱུད་ཀྱི་སྒྲུབ་ཆེན་ཁག་ཚུགས་གནང་རྒྱུ་དེའང་ཧ་ཅང་གི་གལ་ཆེན་པོ་རེད། ག་ལེར་མཐུན་རྐྱེན་ཡག་པོ་འཛོམས་པ་ཡིན་ན་སྒྲུབ་གྲྭ་དང་བཤད་གྲྭ་ཁག་གཅིག་བྱུང་ན་ཡག་པོ་ཡོད་པ་རེད། ༸གོང་ས་མཆོག་དང་ནམ་མཁའ་རིན་པོ་ཆེ་མཆོག། དེ་འདྲ་ཡིན་དུས་སྒྲུབ་གྲྭ་ལ་སྡེ་ཚན་གཉིས་སུ་ཕྱེ་སྟེ་ལོ་གསུམ་ཕྱོགས་གསུམ་གྱི་སྡེ་ཚན་གཅིག་དང་།
༸གོང་ས་མཆོག་དང་ནམ་མཁའ་རིན་པོ་ཆེ་མཆོག།
ཚེ་དང་སྒྲུབ་པ་མཉམ་ནས་སྡོད་མཁན་དེ་འདྲ་ཞིག་བྱུང་བ་ཡིན་ན་དངོས་གནས་བསྟན་པའི་མིག་རྒྱན་རེད། དངོས་གནས་ཚེ་གཅིག་ལ་གཟུང་འཇུག་གི་གོ་འཕང་སྒྲུབ་ཅེས་པ་དེ་བཅོམ་ལྡན་འདས་རང་ཉིད་ནས་ཀྱང་ཐུན་མོང་གདུལ་བྱའི་སྣང་ངོར་ལོ་དྲུག་དཀའ་སྤྱད་མཛད་ཡོད་པ་རེད། ང་ཚོས་དེ་བས་ཀྱང་དཀའ་ལས་རྒྱག་དགོས་རེད་མ་གཏོགས་སྐྱིད་པོ་བྱས་ནས་བསྡད་ན་སངས་རྒྱས་ཀྱི་གོ་འཕང་བསྒྲུབ་རྒྱུ་ཁག་པོ་རེད། གཞུང་ཆེན་ལ་སློབ་གཉེར་གནང་རྒྱུ་གལ་ཆེན་པོ་ཡིན། ཆོ་ག་འདོན་རྒྱུ་གལ་ཆེ་རེད་དེ་སྔོན་ལ་ཆོ་གའི་དོན་དེར་སློབ་སྦྱོང་བྱས་ནས་དོན་ཤེས་པའི་ཐོག་ནས་ཆོ་ག་འདོན་གྱི་ཡིན་ན་བྱིན་རླབས་ཆེ་བ་ཡོད། དོན་དག་མ་ཤེས་པའི་སྒོ་ནས་ཆོ་ག་བཏོན་ན་ཚིག་སྐམ་པོ་ཞིག་རེད་མ་གཏོགས་ཞེ་དྲག་ནུས་པ་ཐོན་རྒྱུ་མེད། ཅེས་དང་། དེ་བཞིན་༸གོང་ས་མཆོག་གིས་དགོན་པ་དེའི་ནང་ཡོད་པའི་ཧི་མ་ལའི་རི་རྒྱུད་ནས་ཡིན་པའི་གྲྭ་རྒྱུན་མང་ཡོད་པ་ཚོར་བཀའ་སློབ་ཕེབས་དོན། འདིར་གྲྭ་རྒྱུན་ནང་བོད་རིགས་ཙམ་མ་ཡིན་པར་ཧི་མ་ལ་ཡའི་རི་རྒྱུད་ནས་གྲྭ་རྒྱུན་གང་ཙམ་ཡོད་པ་དེ་ཡག་པོ་ཞེ་དྲག་བྱུང་འདུག ང་ཚོ་ལུང་པ་བྲལ་ཏེ་བསྡད་ཡོད་པ་རེད། བོད་རང་གི་ལུང་པར་ཆ་མཚོན་ན་ཆོས་ཞེས་བརྗོད་ན་སྐྱོན་དུ་བརྩི་རྒྱུ་དང་རྗེས་ལུས་ཀྱི་རང་བཞིན་དུ་ལྟ་གི་ཡོད། བོད་ནང་སངས་རྒྱས་ཀྱི་ཆོས་ཉག་ཕྲ་བོ་ཞིག་གི་སྟེང་ལ་གནས་ཡོད། ང་ཚོ་བཙན་བྱོལ་བའི་ནང་བོད་མི་འབུམ་གཅིག་དང་ཕྱེད་ཀ་ཙམ་རེད། ཧི་མཱ་ལ་ཡའི་རི་རྒྱུད་ལ་ཡོད་པའི་མི་དེ་དག་དང་དེ་བཞིན་བལ་ཡུལ་དང་འབྲུག་བཅས་གང་ལྟར་བོད་ཀྱི་ཆོས་བརྒྱུད་གཅིག་པ་ཆགས་ཡོད། རི་དགོན་ཐུབ་བསྟན་སྨིན་གྲོལ་གླིང་།
རི་དགོན་ཐུབ་བསྟན་སྨིན་གྲོལ་གླིང་།
གངས་ཅན་ལྗོངས་ཀྱི་འདབས་ལ་ཆགས་པའི་ཡུལ་གྲུ་དེ་དག་གང་ལྟར་བཀའ་འགྱུར་བསྟན་འགྱུར་ཉར་སྡོད་མཁན་གཅིག་པ་རེད། མིང་བྷོ་ཊི་ཡ་དང་། རྫོང་ཁ་ཞེས། གང་བཏགས་རུང་དོན་དག་ང་ཚོའི་བོད་ཡིག་དབྱངས་དང་གསལ་བྱེད་ཡོད་པ་དེ་དང་གཅིག་པ་ཆགས་ཀྱི་ཡོད་པ་རེད། དེ་འདྲ་ཡིན་དུས་དེ་ཚོའི་ནང་ནས་ཡུལ་པ་ཚོས་བོད་ཀྱི་སངས་རྒྱས་ཀྱི་ཆོས་དང་རིག་གཞུང་ཐོག་དོ་སྣང་གསར་པ་སླེབས་ཡོང་གི་ཡོད། སློབ་སྦྱོང་ལ་དོ་སྣང་གསར་པ་སླེབས་སྐབས་སློབ་ཁྲིད་བྱེད་ས་ཞིག་དགོས་དུས་བཙན་བྱོལ་བོད་གཞུང་གི་སྒྲིག་འཛུགས་ཆ་ནས་བོད་གཞུང་གི་སློབ་གྲྭ་ཁག་ནང་གོང་དུ་ཧི་མ་ལ་ཡ་རི་རྒྱུད་ཀྱི་བུ་ཕྲུག་བོད་ཡིག་དང་བོད་ཀྱི་རིག་གཞུང་སྦྱང་འདོད་ཡོད་མཁན་རྣམས་ལ་ང་ཚོས་མཐུན་རྐྱེན་སྱར་དགོས་འདུག་ཅེས་ང་ཚོར་བསམ་ཚུལ་ཡོད་པ་དང་། རྒྱ་གར་གཞུང་ལའང་བཀའ་མོལ་ཞུས་ཏེ་ཕལ་ཆེར་འགྲིག་པའི་བཟོ་འདྲ་པོ་ཡིན། རིམ་པས་ལག་ལེན་འགེལ་རྒྱུ་ཆགས་ཀྱི་རེད། དགོན་པ་ཁག་གི་ནང་རྩ་བའི་ཆོས་ཁག་བོད་མི་བཙན་བྱོལ་བའི་ཆོས་ཁག་རེད་དེ་ང་ཚོའི་ཞབས་འདེགས་སྒྲུབ་ས་དེ་བོད་མི་གཅིག་པུའི་དོན་དག་མ་ཡིན་པར། གང་ལྟར་ང་རང་ཚོ་ཆོས་བརྒྱུད་གཅིག་པ་ཡིན་པ་དང་བོད་ཀྱི་ཆོས་དང་རིག་གཞུང་ལ་དོ་སྣང་ཡོད་མཁན་ཚོར་མཐུན་རྐྱེན་བསྒྲུབ་ཐུབ་རྒྱུ་དང་རེ་འདོད་སྐོང་ཐུབ་རྒྱུ་ང་ཚོའི་ལས་འགན་རེད། ད་ལྟ་འདིར་གྲྭ་རྒྱུན་ཁག་མང་པོ་ཡོད་པ་ཡག་པོ་ཞེ་དྲག་བྱུང་འདུག ཐུགས་རྗེ་ཆེ་ཞུ་རྒྱུ་ཡིན། ད་དུང་ཡིན་ནའང་ཐུགས་ཁུར་གནང་རོགས་ཞུ་རྒྱུ་ཡིན། ཞེས་བཀའ་སློབ་བཀའ་དྲིན་ཆེ་བ་སྩལ་ཡོད། དེ་རྗེས་བཙན་བྱོལ་བོད་གཞུང་གི་བཀའ་བློན་ཁྲི་པ་མཆོག་གིས་གསུང་བཤད་གནང་དོན། ཕྱིའི་གཙུག་ལག་ཁང་གསར་བཞེངས་གྲུབ་པའི་རྗེས་ལ་ནང་གི་དགེ་འདུན་ཚོའི་བསླབ་པ་ཐོས་བསམ་དང་སྤོང་བ་བསམ་གཏན་གྱི་བྱ་བ་དེ་དག་ངེས་པར་དུ་ཡར་རྒྱས་ཆེན་པོ་གཏོང་རྒྱུ་དང་། ལྷག་པར་དུ་གངས་ཅན་གཏེར་སྟོན་དེ་དག་གི་ཁྱད་པར་དུ་འཕགས་པ་སྟག་ཤམ་ནུས་ལྡན་རྡོ་རྗེ་གཏེར་ཆོས་ལོ་སུམ་བརྒྱ་བརྒལ་བའི་བྱུང་རབས་ཡོད་པ་ཞིག་རེད། དེའི་རྒྱུད་འཛིན་འདུས་སྡེ་ཉུང་བ་ཞིག་ལས་མེད་པ་དེའི་ནང་ནས་རི་དགོན་ཐུབ་བསྟན་སྨིན་གྲོལ་གླིང་འདི་གཅིག་ཆགས་ཀྱི་ཡོད། དེའི་གཏེར་ཆོས་དེ་དག་མི་ཉམས་རྒྱུད་འཛིན་བོད་བསྟན་སྲིད་དོན་དང་སེམས་ཅན་སྐྱེ་འགྲོའི་ཆེད་དུ་རྒྱུན་གནས་ཡོང་བ་གཅིག་དང་། ལྷག་པར་དུ་ཨོ་རི་ས་འདི་སྔ་མོ་ནས་ནང་ཆོས་དར་ཁྱབ་ཆེ་བའི་ལུང་པ་ཞིག་ཡིན་པ་དང་། བོད་པའི་གཞིས་ཆགས་ཨོ་རི་ས་ལ་ཡོད་པ་འདི་གཞིས་ཆགས་ཆེ་བ་ཞིག་དང་དྲག་གྲས་ཤིག་ཡིན་པར་བརྟེན། གཞིས་ཆགས་འདིའི་སྐྱེ་འགྲོའི་བདེ་དོན་ཆེད་དུ་ཡང་ཐུབ་བསྟན་སྨིན་གྲོལ་གླིང་འདིས་ཕན་ཐོགས་ཆེན་པོ་ཞིག་ཡོང་གི་ཡོད་པ་ཡིད་ཆེས་ཞུ་གི་ཡོད། འདི་འདྲ་ཡིན་དུས་བསྟན་པ་དང་སྐྱེ་འགྲོ་ཡོང་ལ་སྨན་པའི་མཛད་བཟང་རྒྱུན་འཁྱོང་ཡོང་བའི་སྨོན་འདུན་ཞུ་གི་ཡིན། ཞེས་གསུང་བཤད་གནང་ཡོད། ཡང་མཛད་སྒོ་དེའི་ཐོག་གདུང་སྲས་འཇིགས་མེད་རིན་པོ་ཆེ་མཆོག་གིས་དགོན་པ་ངོ་སྤྲོད་དང་འབྲེལ་དབྱིན་སྐད་ཐོད་གསུང་བཤད་གནང་བའི་ནང་། ཨོ་རི་ས་མངའ་སྡེ་གཞུང་དང་། རིག་གཞུང་ལྷན་ཁང་ནས་རི་དགོན་ཐུབ་བསྟན་སྨིན་གྲོལ་གླིང་འདི་རྒྱ་གར་གཞུང་གི་ཡུལ་སྐོར་སྤྲོ་འཆམ་པའི་བསྟི་གནས་སུ་ངོས་འཛིན་གསལ་བསྒྲགས་གནང་རྒྱུ་ཡིན་སྐོར་གསུངས་ཡོད། འཕགས་ཡུལ་རི་དགོན་ཐུབ་བསྟན་སྨིན་གྲོལ་གླིང་དགོན་པ་ནི་རིག་གྲོལ་རིག་འཛིན་ཆོས་རྒྱལ་རིན་པོ་ཆེ་མཆོག་དང་གཏེར་སྟོན་ནམ་མཁའ་དྲི་མེད་རབ་འབྱམས་རིན་པོ་ཆེ་རྣམ་གཉིས་ཀྱིས་ཕྱི་ལོ་ ༡༩༦༨ ལོར་ཨོ་རི་སར་བསྐྱར་འཛུགས་གནང་བ་དང་དགོན་པ་དེའི་མཚན་ཡང་༸གོང་ས་མཆོག་གིས་སྩལ་བ་ཞིག་ཡིན་པ་བཅས་ཀྱི་གནས་བསྡུས་སུ།།
