ཕྱི་ལོ་ ༢༠༠༩ ཟླ་ ༣ ཚེས་ ༡༧ རེས་གཟའ་མིག་དམར།
༄༅། །བོད་མི་མང་སྤྱི་འཐུས་ལྷན་ཚོགས་སྐབས་བཅུ་བཞི་པའི་ཚོགས་དུས་བདུན་པའི་ཐོག་ལ་ཚོགས་ཞུགས་གནང་མཁན་དཔལ་ལྡན་བཀའ་བློན་ཁྲི་པས་དབུས་བཀའ་བློན་ལྷན་རྒྱས་རྣམ་པ་དང་། དཔལ་ལྡན་ཚོགས་གཙོ་གཞོན་པས་དབུས་བཀུར་འོས་སྤྱི་འཐུས་རྣམ་པ་ལྷན་རྒྱས། དེ་བཞིན་དུ་བོད་གཞིས་བྱེས་གཉིས་སུ་ཡོད་པའི་བོད་མི་ཚང་མར་གྲོས་ཚོགས་འདི་བརྒྱུད་ནས་ཚོགས་གཙོས་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་ཡིན། དེ་རིང་གྲོས་ཚོགས་མ་ཚུགས་གོང་ལ་མ་བསྒྲིགས་ལྷུན་གྲུབ་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཆོས་རིག་ལས་ཁུངས་ཀྱིས་གོ་སྒྲིག་འོག་བཙན་བྱོལ་བོད་གཞུང་གིས་བརྟན་བཞུགས་བསྟར་འབུལ་ཞུས་པ་དེ་བཞིན་རྟེན་འབྲེལ་བཟང་པོ་ཞིག་ཏུ་བརྩི་གི་ཡོད།
སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ནས་གཏམ་བཤད་གནང་བཞིན་པ།
དེ་བཞིན་ཞོགས་པ་བརྟན་ཞུགས་ལ་ཕེབས་རྒྱུ་བྱུང་མེད་ན་མ་གཏོགས། དེ་རིང་མཇལ་ཁ་ཞུས་ནས་གྲོས་ཚོགས་ལ་ཕེབས་སྐབས་སྐེ་ལ་བྱིན་མདུད་དམར་པོ་འདོགས་རྒྱུའི་གོ་སྐབས་བྱུང་ཡོད་རེད། ད་ལན་གྱི་གྲོས་ཚོགས་འཚོགས་པའི་དུས་ཚིགས་དེ་བོད་ནང་གི་གནས་སྟངས་དང་། ༸རྒྱལ་བ་རིན་པོ་ཆེས་གཙོས་པའི་བོད་གཞུང་དགའ་ལྡན་ཕོ་བྲང་དང་བཙན་བྱོལ་བོད་མི་ཚང་མ་སོ་སོའི་རང་དབང་ལུང་པ་ནས་གྱར་དགོས་བྱུང་ནས་ལོ་ ༥༠ འཁོར་བའི་དུས་མཚམས་ཤིག་ལ་ཁེལ་ཡོད། དེར་བརྟེན་ལོ་རྒྱུས་ཀྱི་ཐོག་ནས་གལ་གནད་ཆེན་པོ་ཞིག་ལ་བརྩི་གི་ཡོད། ཆབ་སྲིད་ཀྱི་ཐོག་ནས་སྤྱི་ཡོངས་ཀྱི་གནས་སྟངས་དེ་བཞིན་གྲོས་ཚོགས་ཀྱི་ཚོགས་ཞུགས་ཚང་མས་མཁྱེན་གསལ་རེད། ད་ལྟ་བོད་ནང་དམ་བསྒྲགས་གང་འདྲ་བྱུང་མིན་དང་། ཉེས་མེད་ཁག་འདོགས་ཀྱིས་བོད་མི་ཚོར་དྲག་གནོན་གང་ཙམ་ཞིག་བྱེད་ཀྱི་ཡོད་མེད་ཞུ་མི་དགོས་པ་རེད། ཆབ་སྲིད་ཀྱི་གནད་དོན་དེའི་ཐོག་ལ་ཚོགས་གཙོས་དམིགས་བསལ་དེ་རིང་ཞུ་འདོད་གང་ཡང་མེད། གང་ཡིན་ཟེར་ན། སང་ཉིན་གསུམ་བཅུའི་དུས་དྲན་གྱི་ཉིན་མོ་རེད། དེར་འཛིན་སྐྱོང་བཀའ་ཤག་དང་། བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས་གཏམ་བཤད་ཡོད་ཅིང་། ལྷག་པར་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གསུང་འཕྲིན་ཡོད་པར་སོང་། ཆབ་སྲིད་ཀྱི་གནས་སྟངས་འདི་སང་ཉིན་གྱི་དུས་ཚོད་དེ་ལ་རན་པ་ཡོད་པར་སྙམ། ཡིན་ནའང་ད་ལྟའི་བོད་ནང་གི་ཛ་དྲག་གི་གནས་སྟངས་ལ་གཞི་བཅོལ་ནས་ད་ལན་གྱི་གྲོས་ཚོགས་འདིའི་ཐོག་ལ་ཆབ་སྲིད་ཀྱི་ལས་དོན་གལ་འགངས་ཆེ་བ་ཁག་གསུམ་ཡོད་པ་ཚོགས་གཙོས་ཚོགས་འདུའི་དབུ་འབྱེད་ཀྱི་གཏམ་བཤད་ནང་གལ་ཆེ་དོན་ཆེན་ཞུ་རྒྱུར། ད་ལན་གྱི་ལས་རིམ་དང་འབྲེལ་བའི་ཐོག་སྤྱི་འཐུས་ཚོས་ཐུགས་གཟབ་ག་རེ་གནང་དགོས་མིན་དང་། བཀའ་ཤག་ངོས་ནས་དགོངས་པ་ག་རེ་བཞེས་དགོས་མིན་ཐོག་ལ་ཞུ་འདོད་བྱུང་། ཆབ་སྲིད་དང་འབྲེལ་བའི་གནད་དོན་ཐད་ནས་ད་རེས་ཀྱི་གྲོས་ཚོགས་འདིའི་ནང་ལ་ད་ལྟའི་བོད་ནང་གི་ཛ་དྲག་གི་གནས་སྟངས་ཐོག་བགྲོ་གླེང་ཤུགས་ཆེན་པོ་ཞིག་ཡོང་དགོས་ཀྱི་རེད་ལ། དུས་ཀྱི་དགོས་མཁོ་ཞིག་ཀྱང་ཆགས་ཡོད་པ་རེད། དེ་འདྲ་སོང་ཙང་སྤྱི་འཐུས་རྣམ་པ་ཚོའི་ངོས་ནས་ད་ལྟའི་བོད་ནང་གི་ཛ་དྲག་གི་ཆབ་སྲིད་གནས་སྟངས་འདི་དང་། གཞིས་ལུས་བོད་མི་ཚོས་ལས་འགུལ་སྤེལ་བ་དེ་ལ་ང་ཚོ་བཙན་བྱོལ་བོད་མིའི་ངོས་ནས་གདུང་སེམས་མཉམ་བསྐྱེད་དང་། ལས་འགུལ་ཅི་འདྲ་སྤེལ་དགོས་མིན་ཐོག་ལ་བསམ་གཞིགས་གནང་རྒྱུའི་གོ་སྐབས་ཤིག་ད་ལན་གྱི་གྲོས་ཚོགས་འདིའི་ནང་ལ་སྤྱི་འཐུས་རྒྱུན་ལས་ཀྱི་ངོས་ནས་གཞུང་འབྲེལ་གྲོས་འཆར་ཞིག་བསྣམ་ཕེབས་ཀྱི་ཡོད་ཅེས་ཞུ་རྒྱུ་ཡིན།
དེ་བཞིན་སྔ་ལོ་ཕྱི་ཟླ་ ༡༡ ནང་དམིགས་བསལ་ཚོགས་ཆེན་ཚོགས་རྗེས་དམིགས་བསལ་ཚོགས་ཆེན་གྱི་སྙན་ཐོའི་ནང་ལ་ལག་ལེན་བྱ་དགོས་རྒྱུ་མང་པོ་ཞིག་ཚུད་ཡོད་རེད། དེའི་མཇུག་སྐྱོང་ལག་བསྟར་གང་འདྲ་བྱ་དགོས་མིན་དང་། དམིགས་བསལ་ཚོགས་ཆེན་ཚོགས་པའི་རྗེས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཚོགས་བཅར་བ་ཚང་མ་ལ་དམིགས་བསལ་བཀའ་སློབ་ཕེབས་དོན་དུ། ད་ལན་དམིགས་བསལ་ཚོགས་ཆེན་ཚོགས་པ་དེ་ལོ་འཁོར་ལས་བསྡོམས་ཚོགས་པ་ལྟ་བུ་ཆགས་སོང་། དེ་ཕན་ཐོགས་ཆེན་པོ་ཡོད་པ་རེད། བྱུང་ན་ལོ་གཅིག་ནང་དང་། མ་བྱུང་ན་ལོ་གཉིས་ནང་ལ་འཚོགས་ཐུབ་ན་དགེ་མཚན་འདུག་ཅེས་བཀའ་ཕེབས་པ་ནང་བཞིན། ད་ལྟའི་གྲོས་ཚོགས་འདིའི་ནང་ལ་གཞུང་འབྲེལ་གྲོས་འཆར་གཅིག་དམིགས་བསལ་ཚོགས་ཆེན་གྱི་ལས་དོན་མཇུག་སྐྱོང་ཁུངས་སོ་སོ་ནས་གང་འདྲ་གནང་དགོས་མིན་དང་། མ་འོངས་པར་དམིགས་བསལ་ཚོགས་ཆེན་འཚོགས་པ་ཡིན་ན། གང་འདྲ་འཚོགས་དགོས་མིན་དང་། དམིགས་བསལ་ཚོགས་ཆེན་རང་མ་ཡིན་པར་སྤྱིར་བཏང་ཚོགས་ཆེན་གྱི་ངོ་བོའི་ཐོག་ནས་འཚོགས་དགོས་པ་ཡིན་ན། གང་འདྲ་འཚོགས་དགོས་མིན་གྱི་ཐོག་ལ་བགྲོ་གླེང་གྲོས་འཆར་དང་། བགྲོ་གླེང་གྲུབ་པའི་རྗེས་ལ་སྤྱི་འཐུས་དང་། བཀའ་བློན་རྣམ་པ་ཚོའི་ངོས་ནས་དགོངས་ཚུལ་མང་བ་ག་རེེ་བྱུང་བ་དེ་དང་འབྲེལ་བ་ཡོད་པ་གཅིག
སྔ་ལོ་ཕྱི་ཟླ་ ༡༠ ནང་༸རྒྱལ་བ་རིན་པོ་ཆེའི་དམིགས་བསལ་སྐུ་ཚབ་རྣམ་པ་རྒྱ་ནག་ལ་ཕེབས་ནས་བོད་མི་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཞིག་ཕུལ་བའི་ཐོག་ལ་བཀའ་ཤག་ནས་དམིགས་བསལ་གསལ་བཤད་དགོས་པའི་གྲོས་འཆར་ཞིག་ད་ལྟའི་གྲོས་ཚོགས་ནང་ཡོང་གི་ཡོད། བཀའ་ཤག་གིས་གསལ་བཤད་གནང་གྲུབ་རྗེས་གྲོས་ཚོགས་ནས་འདིའི་ཐོག་ལ་བགྲོ་གླེང་གནང་དགོས་མིན་སྐབས་བབ་ལ་གཟིགས་ནས་གནང་དགོས་ཀྱི་འདུག་ན་བགྲོ་གླེང་གནང་རྒྱུའི་གོ་སྐབས་ཤིག་ཡོང་གི་རེད་བསམ་གྱི་འདུག་ལ། སྤྱི་འཐུས་རྒྱུན་ལས་ནང་ལ་གོ་བསྡུར་བྱེད་པའི་སྐབས་སུ་དོན་ཚན་གསུམ་དེ་བཏོན་པ་ཡིན་ན་དེའི་ནང་ལ་ཆབ་སྲིད་ཀྱི་གནད་དོན་གང་ཡང་མ་ལྷག་པའི་ཐོག་ནས་བགྲོ་གླེང་བྱ་རྒྱུའི་གོ་སྐབས་ཤིག་ཡོང་གི་རེད་བསམས། གྲོས་ཚོགས་འདིའི་ནང་ལ་ཆབ་སྲིད་ཀྱི་གནད་དོན་དེ་ཙམ་ཡིན།
ཕྱི་ཟླ་ ༣ པའི་གྲོས་ཚོགས་འཚོགས་རྒྱུ་དེ་གཙོ་བོ་དཔལ་འབྱོར་གྱི་ལས་དོན་ཐོག་ལ་འཚོགས་ཀྱི་ཡོད་རེད། ༢༠༠༩ ཕྱི་ཟླ་ ༤ ཚེས་ ༡ ནས་བཀའ་ཤག་གིས་འགྲོ་སོང་གཏོང་རྒྱུའི་བཀའ་འཁྲོལ་ཡོངས་རྫོགས་བོད་མི་མང་སྤྱི་འཐུས་ལྷན་ཚོགས་ནས་བཀའ་འཁྲོལ་གནང་དགོས་ཀྱི་ཡོད་པར་སོང་ཙང་། ད་རེས་ཀྱི་དུས་ཚོད་མང་བ་དཔལ་འབྱོར་གྱི་ལས་དོན་ཐོག་ལ་འགྲོ་རྒྱུའི་གནས་སྟངས་ཆགས་ཡོད། ཡིན་ནའང་སྔར་རྒྱུན་དང་མི་འདྲ་བའི་དཔལ་འབྱོར་གྱི་ལས་དོན་དེ་ཏོག་ཙམ་སྔོན་ལ་ཚར་བའི་རེ་བ་ཞུ་བཞིན་ཡོད། སྔོན་ལ་ཚར་བ་ཡིན་ན་འཛིན་སྐྱོང་དང་ལྷག་པར་དུ་དཔལ་འབྱོར་ལས་ཁུངས་དང་འབྲེལ་ཡོད་ལས་ཁུངས་སོ་སོའི་ངོས་ནས་ལས་དོན་བྱེད་ཕྱོགས་ལ་ཐུགས་ཕན་གསོ་ས་རེད། ད་ལན་གྱི་སྔོན་རྩིས་ཀྱི་བགྲོ་གླེང་སྐབས་སུ། ལྷན་ཁང་སོ་སོའི་ལས་དོན་གྱི་ཐོག་ལ་དྲི་བ་འདྲི་མི་དགོས་པ་གཙོ་འདོན་བྱ་རྒྱུ་ཡིན། རྩིས་རང་ཐོག་ལ་དོ་སྣང་སྤྲད་ནས་མ་འོངས་པའི་ལས་འཆར་ཐོག་དྭོགས་འདྲི་བགྲོ་གླེང་གང་ཡོད་པ་དེའི་ཐོག་ལ་གནང་རྒྱུ་གཞི་རྩར་བཟུང་ནས་ཕྱག་ལས་གནང་རྒྱུ་ཡིན། དཔལ་འབྱོར་སྤྱི་ཡོངས་ཀྱི་གནས་སྟངས་ཐོག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཞལ་བཞུགས་པའི་སྐབས་བཙན་བྱོལ་བོད་གཞུང་ལ་དམིགས་བསལ་དཀའ་ངལ་གང་ཡང་འཕྲད་ཀྱི་མ་རེད། ཡིན་ནའང་མ་འོངས་པར་དཔལ་འབྱོར་གྱི་དཀའ་ངལ་འཕྲད་མི་སྲིད་པ་མིན་པར་སོང་ཙང་། ང་ཚོའི་དཔལ་འབྱོར་གྱི་གནས་སྟངས་དེ་རང་ཁ་རང་གསོ་ག་ཚོད་ཐུབ་ཐུབ་འབད་བརྩོན་ཞུ་རྒྱུ་གནད་འགག་ཆེན་པོ་ཆགས་ཀྱི་འདུག བཙན་བྱོལ་བོད་མིས་བཙན་བྱོལ་གཞུང་གི་སྔོན་རྩིས་ལ་ཕན་པའི་རྒྱུན་གྲོན་དང་། དམིགས་བསལ་ལ་བརྒྱ་ཆ་ ༤༠ ལྷག་དཔྱ་ཁྲལ་ལམ་ནས་བསྡུ་བཞིན་ཡོད། ཡིན་ནའང་དེང་སང་སྔར་དང་མི་འདྲ་བར་བཙན་བྱོལ་བོད་མིའི་སྤྱི་ཚོགས་དེ་ཡང་ཡར་རྒྱས་ཆེན་པོ་ཞེ་དྲག་ཕྱིན་ཚར་བ་རེད། དེ་འདྲ་ཡིན་དུས་མ་འོངས་པར་རྒྱུན་གྲོན་དང་དམིགས་བསལ་རིགས་བཙན་བྱོལ་བོད་མིའི་སྤྱི་ཚོགས་རང་ནས་བསྡུ་ཐུབ་པའམ། ཡང་ན་ཞལ་འདེབས་འབུལ་ཐུབ་པ་ཡིན་ན། མ་འོངས་པར་གང་ཅིའི་ཐད་ནས་དཔལ་འབྱོར་གྱི་དཀའ་ངལ་མི་འཕྲད་པའི་གཞི་རྩ་བརྟན་པོ་ཞིག་ཆགས་ཀྱི་རེད། དེ་འདྲ་སོང་ཙང་ད་ལྟ་དཔལ་འབྱོར་དཀའ་བློན་མཆོག་གིས་གསུང་བཤད་གནང་གི་རེད། ཡིན་ནའང་ལོ་རྗེས་མ་ནས་དཔྱ་ཁྲལ་བསྡུ་ཕྱོགས་དང་ཞལ་འདེབས་བསྡུ་ཕྱོགས་སྐོར་ཏོག་ཙམ་ཤུགས་ཆེ་རུ་གང་འདྲ་གཏོང་དགོས་མིན་དང་། ལྷག་པར་དུ་གཞི་རིམ་མང་ཚོགས་ནང་ལ་ས་གནས་འཐུས་ཚོགས་སོགས་ཀྱི་འགྲོ་སོང་མང་ཚོགས་རང་གིས་བསྡུས་ནས་རང་ཁ་རང་གསོ་ཐུབ་པ་ཡིན་ན། ང་ཚོའི་སྤྱི་ཚོགས་འདི་རྒྱུན་གནས་ཐུབ་པ་དང་། མ་འོངས་དཔལ་འབྱོར་ཐོག་ལ་དཀའ་ངལ་མི་འཕྲད་པའི་གཞི་རྩ་གཙོ་བོ་རེད་བསམ་གྱི་འདུག དེ་དག་ནན་ཏན་གྱིས་ཚོགས་གཙོའི་གཏམ་བཤད་ནང་ཞུ་འདོད་བྱུང་། འཛིན་སྐྱོང་བཀའ་ཤག་ངོས་ནས་དཔལ་འབྱོར་བཀའ་བློན་གྱི་གསུང་བཤད་ནང་གང་ཐུབ་ཅི་ཐུབ་ཀྱིས་སྔར་བས་ཞིབ་ཚགས་པ་དང་། སྤྱི་འཐུས་རྣམ་པ་ཚོས་གཟིགས་བདེ་བའི་ཆེད་དུ་འབད་བརྩོན་ཆ་ཚང་གནང་ཡོད་རེད། དེས་ཐུགས་ཕན་ག་ཚོད་གསོས་ཡོད་མེད་སྔོན་རྩིས་ཀྱི་བགྲོ་གླེང་འབྱུང་བའི་སྐབས་ལ་གསལ་པོ་ཆགས་མདོག་ཁ་པོ་རེད། དེའི་ནང་ལྷག་པར་ལེགས་བཅོས་གནང་དགོས་པའི་རིགས་གང་ཡོད་དགོངས་ཚུལ་གསུང་ཐུབ་པ་ཡིན་ན། མ་འོངས་ལས་རིམ་བྱེད་ཕྱོགས་ལ་ཁྱད་པར་ཞེ་དྲག་ཡོང་གི་རེད་བསམ་གྱི་འདུག
ད་རེས་སྔོན་རྩིས་གཏན་འབེབས་བྱེད་པའི་སྐབས་སུ་འཛིན་སྐྱོང་གི་ལས་དོན་ཐོག་ལ་དམིགས་སུ་བཀར་ནས་དྲི་བ་འདྲི་རྒྱུ་མེད་པར་སོང་ཙང་། འཛིན་སྐྱོང་གི་ལས་དོན་བྱེད་ཕྱོགས་ཐོག་ལ་བགྲོ་གླེང་ལྷུག་པོ་ཞིག་ཡོང་རྒྱུ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་རྡ་སྟེང་བོད་ཁྱིམ་དབུ་བརྙེས་པའི་མཛད་སྒོའི་སྐབས་སུ་བཀའ་གནང་བ་དང་། དམིགས་བསལ་ཚོགས་ཆེན་གྱི་རྗེས་སུ་དམིགས་སུ་བཀར་ནས་ཤེས་ཡོན་སྤྱི་དང་། རིགས་གཅིག་རྐང་འཛིན། གཞིས་ཆགས་སྲ་བརྟན་གནས་རྒྱུ་སོགས་ལ་ཐུགས་འཚབ་ཆེན་པོའི་ཐོག་ནས་བཀའ་སློབ་རིམ་ཕེབས་ལ་བརྟེན། ཤེས་ཡོན་དང་འབྲེལ་བའི་གྲོས་ཆོད་གྲོས་འཆར་ཞིག་ཡོང་གི་ཡོད། རྩ་བའི་འཛིན་སྐྱོང་བཀའ་ཤག་གིས་ངོས་ནས་དེའི་ཐོག་ལ་ཐུགས་སྣང་ཆེན་པོ་གནང་གི་ཡོད་རེད་དེ། གལ་ཆེ་དོན་ཆེན་ལ་སོང་སྤྱི་འཐུས་ལྷན་ཚོགས་ངོས་ནས་ཞིབ་འཇུག་ཚོགས་ཆུང་འཛུགས་རྒྱུའི་གྲོས་འཆར་ཞིག་ཡོང་གི་ཡོད་པ་དེའི་སྐབས་ལ། ཤེས་ཡོན་དང་འབྲེལ་བའི་ཡར་རྒྱས་གཏོང་ཕྱོགས་ཀྱི་དགོངས་ཚུལ་གང་ཡོད་པ་དེ་དག་གྲོས་ཆོད་ཕྱིན་པ་ཡིན་ན། ཚོགས་ཆུང་གི་ཕྱག་ལས་གནང་རྒྱུ་ལའང་ཕན་གྱི་རེད། བོད་སྤྱི་པ་རང་ལ་ཕན་པའི་གནད་དོན་ཞིག་ཆགས་ཡོད་རེད་ཅེས་ཞུ་རྒྱུ་ཡིན། དེ་དང་འབྲེལ་བའི་ཐོག་ནས་གཞིས་ཆགས་སྲ་བརྟན་གནས་རྒྱུ་དེ་རྩ་བའི་ལས་གཞི་ལས་སླ་པོ་ཞིག་མ་རེད། ཡིན་ནའང་འཛིན་སྐྱོང་བཀའ་ཤག་གིས་འབད་བརྩོན་གནང་བཞིན་དུ་དེའི་ཐོག་ལ་བོད་མི་མང་སྤྱི་འཐུས་རང་གི་དགོངས་པ་བཞེས་ནས་ཡར་རྒྱས་གཏོང་རྒྱུ་གང་ཡོད་དེ་ཚོ་དགོངས་པ་བཞེས་རྒྱུ་གལ་ཆེན་པོ་རེད།
ལྷག་པར་དུ་ད་ལོ་ནས་བཟུང་ ༢༠༠༣ ལོར་བཞག་པའི་བོད་མི་མང་སྤྱི་འཐུས་ལྷན་ཁང་ནས་བཞག་པའི་གྲོས་ཆོད་བོད་མི་འདུ་སྡོད་ཀྱི་ས་གནས་སོ་སོར་སྤྱི་འཐུས་རྣམ་པ་ཆ་བགོས་གནང་སྟེ། གྲོས་ཚོགས་འདི་གྲུབ་པའི་རྗེས་སུ་གཟིགས་སྐོར་ཕེབས་དགོས་པའི་སྙིང་དོན་དེ་གཞི་རིམ་མི་མང་ལ་ཆབ་སྲིད་སློབ་གསོ་སྤྲོད་རྒྱུ་དང་། གཞི་རིམ་མང་གཙོའི་ནུས་ཤུགས་ཆེ་རུ་གཏོང་རྒྱུ། གཞིས་ཆགས་སྲ་བརྟན་གནས་རྒྱུའི་ལས་གཞིའི་ཐོག་ལ་ལམ་སྟོན་གནང་རྒྱུ། ལས་གཞི་ལག་བསྟར་བྱེད་བཞིན་པ་དེ་ཚོར་བྱ་ར་བཏང་འཛིན་བྱ་རྒྱུ། གཞིས་ཆགས་སོ་སོར་ཤེས་ཡོན་གོང་འཕེལ་གཏོང་རྒྱུའི་ཐབས་ལམ་གང་ཡོད་མེད་ཀྱི་ལམ་སྟོན་གནང་རྒྱུ། བོད་མི་འདུ་སྡོད་ཀྱི་གཞིས་ཆགས་ཁག་ལ་ད་བར་དུ་བོད་གཞུང་གིས་གཟིགས་སྐྱོང་གནང་མུས་ཀྱང་། ད་དུང་ཡང་རོགས་སྐྱོར་དགོས་ངེས་ལྷག་ལུས་སུ་སོང་བ་དེ་འདྲ་ཡོད་ན་དེ་ཚོ་ཆ་ཚང་གི་འགན་དེ་སྤྱི་འཐུས་ཀྱིས་འཁྱེར་ནས་སྔར་དང་མི་འདྲ་བའི་འཛིན་སྐྱོང་བཀའ་ཤག་གི་ངོས་ནས་གྲོས་ཚོགས་ཀྱི་ཕྱག་ལས་གནང་ཕྱོགས་འགན་འཁྱེར་བའི་ཐོག་ནས་ང་ཚོའི་ལས་རིམ་འདིར་འགྱུར་བ་གཏོང་རྒྱུ་རེད། སྤྱི་འཐུས་རྣམ་པ་ཚོ་ཆ་བགོས་བྱས་པ་དེ་བརྒྱུད་ནས་ལོ་རེར་ཐེངས་གཉིས་ས་གནས་དེར་བསྐྱོད་དགོས་པ་དང་། ས་གནས་ལ་མེད་པའི་སྐབས་སུའང་ས་གནས་དེ་དང་འབྲེལ་བའི་དཀའ་ངལ་ག་རེ་ཡོད་ནའང་སྤྱི་འཐུས་དེ་བརྒྱུད་ནས་སྤྱི་འཐུས་རྒྱུན་ལས་ལ་ཡར་ཡོང་རྒྱུ་ཞིག་དང་། སྤྱི་འཐུས་རྒྱུན་ལས་བརྒྱུད་ནས་འཛིིན་སྐྱོང་གིས་འགན་འཁྱེར་སྟངས་ཀྱི་ཐོག་ལ་ལམ་སྲོལ་གསར་པ་ཞིག་བཏོད་བཞིན་ཡོད། དེ་ལ་རེ་བའང་ཆེན་པོ་ཞེ་དྲག་ཞུ་གི་ཡོད། སྤྱི་འཐུས་རྣམ་པ་ཚོར་ཕྱག་ལས་ཀྱང་མང་དུ་འགྲོ་གི་རེད། མང་གཙོའི་འཕེལ་རིམ་གྱི་ཐོག་ལའང་ཞེ་དྲག་ཕན་གྱི་རེད་བསམ་གྱི་འདུག མི་མང་གིས་ཐད་ཀར་འོས་འདེམས་བྱས་པའི་འཐུས་མི་དང་མི་མང་དབར་འབྲེལ་ལམ་དམ་ཟབ་ཡོང་རྒྱུ་དང་། དེ་འདྲའི་རྒྱུ་མཚན་མང་པོ་ཞིག་གཟིགས་ནས་བྱེད་ཀྱི་ཡོད་དུས། གྲོས་ཚོགས་ཀྱི་ནང་ལ་བཀའ་འགུགས་གནང་རྗེས་གཞིས་ཆགས་ལ་ཕེབས་རྒྱུ་ཚང་མ་དང་འབྲེལ་བ་ཡོད་པར་བརྟེན་ཐུགས་ཁུར་ཆེ་བཞེས་ཀྱིས་བགྲོ་གླེང་གནང་བའི་སྐབས་སུ་ཆ་ཤས་བླངས་བའི་རེ་བ་ཞུ་བཞིན་ཡོད།
དེ་ནས་བཀའ་ཤག་སྐབས་ ༡༢ པ་ནས་སྲོལ་རྒྱུན་སོ་ནམ་དེ་གཞིས་ཆགས་ཁག་ནང་ལག་བསྟར་བྱས་པ་རེད། ཡིན་ནའང་དེའི་གྲུབ་འབྲས་སོན་དང་མ་སོན་གྱི་གནས་ཚུལ་མང་པོ་ཞིག་ཡོང་གི་ཡོད་རེད། སྲོལ་རྒྱུན་སོ་ནམ་གྱི་ལྟ་གྲུབ་ལ་སྐྱོན་གནད་བགྲང་རྒྱུ་གང་མེད་ཀྱང་། འཛིན་སྐྱོང་གི་ངོས་ནས་ལས་དོན་བྱེད་ཕྱོགས་སམ་ཡང་མིན་ན་ཞིང་པ་སོ་སོའི་ངོས་ནས་དོ་ཁུར་གང་ཙམ་བྱེད་ཀྱི་ཡོད་མེད། གཞན་ཁྲོམ་རྭ་ལ་སོགས་པའི་མཐུན་རྐྱེན་གྱིས་འགྲིགས་མ་འགྲིགས་ཀྱི་གནས་སྟངས་མང་པོ་ཞིག་ཆགས་ཀྱི་ཡོད་དུས། དེའི་ཐོག་ལ་གཞུང་འབྲེལ་གྲོས་ཆོད་གྲོས་འཆར་གཅིག་ཡོང་གི་ཡོད། དེ་ཚོ་གསུམ་གྱི་ནང་ལ་ཕལ་ཆེར་འཛིན་སྐྱོང་གི་ལས་དོན་ཐོག་ལ་བགྲོ་གླེང་བྱེད་རྒྱུའི་གོ་སྐབས་ཆ་ཚང་ཞིག་རག་པའི་རེ་བ་ཞུ་བཞིན་ཡོད།
ཁྲིམས་བཟོའི་ལས་དོན་ཐོག་ལ་གྲོས་ཚོགས་སྔོན་མ་ནས་ལྷག་བསྡད་ཁག་གཅིག་ཡོད་རེད། སྤྱི་འཐུས་རྒྱུན་ལས་ཀྱི་ངོས་ནས་གཞུང་འབྲེལ་ཁྲིམས་འཆར་ལས་དོན་ཁག་གཅིག་ཡོད། དེ་བཞིན་དུ་འཛིན་སྐྱོང་བཀའ་ཤག་གི་ངོས་ནས་གཞུང་འབྲེལ་ཁྲིམས་བཟོའི་ལས་དོན་ཁག་གཅིག་ཕེབས་བཞིན་ཡོད། ཚོགས་དྲུང་ལས་ཁུངས་ངོས་ནས་འབད་བརྩོན་ཞུ་རྒྱུ་དེ་ཚོགས་གཙོ་སྦྲེལ་པོ་གཉིས་ཀྱིས་བཏང་འཛིན་འོག་སྔ་ལོ་ནང་ཁུལ་ལྷན་ཚོགས་འཚོགས་པའི་སྐབས་དགོངས་ཚུལ་བྱུང་བ་ནང་བཞིན་ཡིག་ཆ་དེ་ཚོ་གང་སྔ་སྔ་ཕར་འབུལ་ཐུབ་པའི་འབད་བརྩོན་ཞུ་གི་ཡོད། གཅིག་བྱས་ན་ད་ལྟ་འདིར་ཡིག་ཆ་གཟིགས་པའི་སྐབས་ཡིག་ཆ་མང་པོ་ཞེ་པོ་ཞིག་འདུག་གང་ཡིན་ནམ་དགོངས་པའི་ཉེན་ཁ་ཡོད་རེད། དེ་རིང་གི་ལས་རིམ་དེ་ཁ་སང་བཀྲམ་ཐུབ་པའི་འབད་བརྩོན་ཞུས་ཡོད། ཚེས་ ༡༢ ཀྱི་ལས་རིམ་དེ་དེ་རིང་བཀྲམ་ཐུབ་པའི་འབད་བརྩོན་ཞུས་ཡོད། གཞུང་འབྲེལ་གྱི་གྲོས་ཆོད་གྲོས་འཆར་ཁག་མ་གཏོགས་ཡིག་ཆ་དེ་ཚོ་མང་ཆེ་བ་ཚུད་ཡོད་བསམ་གྱི་འདུག དེ་འདྲ་སོང་ཙང་ཁྲིམས་བཟོའི་ལས་དོན་དང་། ལྷག་པར་དུ་ད་རེས་དཔལ་འབྱོར་བཀའ་བློན་གྱི་གསུང་བཤད། ཚོད་དཔག་འཆར་རྩིས་ཚོགས་ཆུང་གི་སྙན་ཐོ་འགྲེམ་སྤེལ་སྙན་སྒྲོན་གནང་རྒྱུ་དང་། དེ་ལ་ཐུགས་ཞིབ་བྱ་རྒྱུའི་གོ་སྐབས་གནང་ས་སང་ཉིན་ཉིན་རྒྱབ་ལ་གྲོས་ཚོགས་འཐུས་མི་ཚོས་དུས་ཚོད་ཆུད་ཟོས་སུ་མ་བཏང་བའི་ཐོག་ནས་ཡིག་ཆ་དེ་ཚོར་དོ་སྣང་གནང་རོགས་གནང་ཞེས་འབོད་བསྐུལ་ཞུ་རྒྱུ་ཡིན།
ཚོགས་གཙོ་རྣམ་པ་གཉིས་དང་ཚོགས་དྲུང་ལས་ཁུངས་ངོས་ནས་བྱེད་ཐུབ་པ་གང་རེད་ཅེ་ན། ཚོགས་ཞུགས་པ་རྣམ་པ་ཚང་མར་ཕྱིའི་མཐུན་རྐྱེན་སྦྱར་རྒྱུ་དེ་རེད། དེ་དང་ད་ལྟའི་གནས་སྟངས་ལ་དཔག་པའི་མཐུན་རྐྱེན་གང་ཐུབ་ཅི་ཐུབ་སྦྱར་རྒྱུ་དང་། ཡིག་ཆ་དེ་ཚོ་སྔོན་ལ་བཀྲམ་རྒྱུའི་འབད་བརྩོན་ཆ་ཚང་ཞུས་ཡོད། སྐབས་མཚམས་སོ་སོར་ཡར་རྒྱས་གཏོང་ཕྱོགས་ཀྱི་དགོངས་ཚུལ་ག་རེ་ཡོད་ནའང་ཐད་ཀར་བཀའ་སློབ་གནང་རོགས་གནང་ཞེས་ཞུ་རྒྱུ་ཡིན།
ཚོགས་གཙོས་གལ་ཆེ་དོན་ཆེན་གྱི་ཐོག་ནས་འབོད་བསྐུལ་ཞུ་རྒྱུ་ཞིག་ལ། ད་ལྟ་བོད་ནང་ལ་ཆབ་སྲིད་ཀྱི་གནས་སྟངས་ཛ་དྲག་པོ་ཡོད་པ་དང་། རྒྱ་ནག་ནང་རྒྱ་ནག་མི་དམངས་འཐུས་མིའི་ཚོགས་ཆེན་དང་། རྒྱལ་ཡོངས་ཆབ་སྲིད་གྲོས་ཚོགས་གཉིས་འཚོགས་བཞིན་པ་རེད། དེ་འདྲའི་གནས་སྟངས་ཀྱི་ཐོག་ནས་བོད་ནང་གི་བོད་མི་ཚོ་དང་། རྒྱ་ནག་གི་གཞུང་། རྒྱལ་སྤྱིའི་སྤྱི་ཚོགས་བཅས་ལ་བཙན་བྱོལ་བོད་གཞུང་ངོས་ནས་རྣམ་འགྱུར་དང་། གོ་བརྡ་གང་འདྲ་ཞིག་སྤྲད་དགོས་པ་རྣམས་རྡོག་རྩ་ཆིག་སྒྲིལ་གྱི་ཐོག་ནས་སྤྲད་ཐུབ་ན་དགེ་མཚན་ཆེན་པོ་ཡོད་རེད་བསམས་ནས་འབོད་བསྐུལ་ཞུ་རྒྱུ་ཡིན། གྲོས་ཚོགས་ཀྱི་ནང་ལ་བཀའ་མོལ་ག་རེ་གནང་བ་ཡིན་ནའང་། གྲོས་ཚོགས་ཀྱི་ངོས་ནས་ཡིན་ནའང་འདྲ། བཀའ་ཤག་གི་ངོས་ནས་ཡིན་ནའང་འདྲ། དེ་འདྲ་ཞིག་ཡོང་བའི་འབོད་བསྐུལ་ཞུ་བཞིན་ཡོད། འོ་མ་ལྟ་བུའི་དཔེར་མཚོན་པ་ཡིན་ན། དེའི་ནང་ལ་སྐྱུར་བླུགས་ནས་རུལ་མ་བཅུག་པར་འོ་མ་དཀྲུགས་ཏེ་མར་ཐོན་པའི་རེ་བ་ཞུ་བཞིན་ཡོད།
དེ་ནས་གསལ་བཤད་ཞུ་རྒྱུ་ཞིག་ལ། གྲོས་ཚོགས་འདིའི་ནང་ལ་ཨི་ཊ་ལི་(Italy)ནས་སྐུ་མགྲོན་ཁག་གཅིག་ཕེབས་ཡོད་པ་དེ་དག་ནི། ལོ་མང་པོ་ནས་བོད་དོན་རྒྱབ་སྐྱོར་བྱེད་མཁན་གྱི་ནང་ནས་ (Italy) ཀྱི་གྲོས་ཚོགས་འཐུས་མི་PrentinoRobertདང་། ནམ་རྒྱུན་བོད་དོན་རྒྱབ་སྐྱོར་ཤུགས་ཆེན་པོ་བྱེད་མཁན་ Guintar Coloniaཕེབས་ཡོད། ཁོང་ཚོ་ལ་ཕེབས་བསུ་ཞུ་རོགས་གནང་ཞུ་རྒྱུ་ཡིན། (ཚང་མས་དགའ་བསུའི་ཐལ་མོ་བརྡབ་)ཐུགས་རྗེ་ཆེ་གནང་།།
