ཕྱི་ལོ་ ༢༠༠༩ ཟླ་ ༣ ཚེས་ ༡༤ རེསགཟའ་སྤེན་པ།
༄༅། །འདི་གར་ཁུངས་ལྡན་གྱི་གནས་ཚུལ་འབྱོར་གསལ་ལྟར་ན། ཕྱི་ལོ་ ༢༠༠༩ ཕྱི་ཟླ་ ༣ ཚེས་ ༥ སྔ་དྲོ་བོད་ནང་གི་ཆུ་ཚོད་ ༡༠།༢༠ ཙམ་ལ་དཀར་མཛེས་རྫོང་སེ་ངོ་ཤང་ཞི་ལུ་མདའ་གྲོང་ཚོ་ནས་ཡིན་པའི་བཙུན་མ་པདྨ་དབྱངས་མཚོ་ནས་དཀར་མཛེས་རྫོང་དུ་ཞི་བའི་ངོ་རྒོལ་བྱས་པར་བརྟེན་རྫོང་འབྲེལ་ཡོད་སྤྱི་བདེ་ཚན་པས་འཛིན་བཟུང་བྱས་ཡོད་པ་དང་།
ཡང་ཉིན་དེ་རང་གི་ཕྱེད་ཡོལ་ཆུ་ཚོད་ ༡ ཙམ་ལ་རང་ལོ་ ༡༥ སོན་པའི་སློབ་མ་རིན་ཆེན་ཕུན་ཚོགས་དང་། རང་ལོ་ ༡༨ དུ་སོན་པ་གྲྭ་ཆོས་ཉིད་རྒྱ་མཚོ། རང་ལོ་ ༡༦ སོན་པ་སློབ་མ་ཚེ་རིང་གྲགས་པ་བཅས་ནས་དཀར་མཛེས་རྫོང་དུ་ཞི་བའི་ངོ་རྒོལ་དང་ཡིག་རིགས་འགྲེམས་གཏོར་བྱས་རྗེས་ས་གནས་འབྲེལ་ཡོད་སྤྱི་བདེ་ཚན་པས་འཛིན་བཟུང་བྱས་པའི་གནས་ཚུལ་ཐོན་འདུག
