ཕྱི་ལོ་ ༢༠༠༩ ཟླ་ ༣ ཚེས་ ༦ རེས་གཟའ་པ་སངས།

༄༅། །རྒྱལ་སྤྱིའི་གསར་ལམ་ཁག་ནས་གནས་ཚུལ་སྤེལ་བར་གཞིགས་ན། བཙན་བྱོལ་བོད་གཞུང་བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་མཆོག་ནས་ཕྱི་ལོ་ ༢༠༠༩ ཟླ་ ༣ ཚེས་ ༤ ནས་ཚེས་ ༥ བར་ཉིན་གྲངས་གཉིས་རིང་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་རྒྱ་གར་དང་རྒྱལ་སྤྱིའི་བསྟི་གནས་ཁང་ (India and International Centre)དུ་ཚོགས་པའི་ལྷོ་ཨེ་ཤི་ཡའི་སྤྱི་མཐུན་རྒྱལ་ཁབ་ཀྱི་རྩོམ་པ་པོའི་ལྷན་ཚོགས་ཀྱི་དབུ་འབྱེད་གསུང་བཤད་གཙོ་བོ་གནང་ཡོད་པ་རེད།

དེ་ཡང་མཁས་པའི་ལྷན་ཚོགས་དེའི་བརྗོད་གཞི་ནི། ནང་ཆོས་ཀྱི་ཐོག་ནས་དེང་དུས་ཀྱི་ཨེ་ཤི་ཡའི་སྤྱི་ཚོགས་ནང་ཞི་བདེ་སྐྲུན་ཐབས། ཞེས་པའི་ཐོག་བཀའ་བློན་ཁྲི་པ་མཆོག་ནས་ནང་ཆོས་ནི་དེང་སྐབས་སྤྱི་ཚོགས་ཀྱི་ཞི་བདེའི་ཐབས་ལམ་ཞིག་ཆགས་ཡོད་སྐོར་གྱི་གསུང་བཤད་གནང་དོན། ང་ཚོས་ད་ལྟའི་དུས་རབས་དེ་དེང་དུས་ཀྱི་དུས་རབས་ཡར་ཐོན་ཞིག་ཏུ་ངོས་འཛིན་བྱེད་ཀྱི་ཡོད་ནའང་སྤྱི་ཚོགས་རྙིང་པའི་སྟོབས་ཤུགས་ཀྱིས་འཛིན་སྐྱོང་བྱེད་པའི་ལམ་ལུགས་དེ་རང་འཇགས་གནས་ཡོད་པ་མ་ཟད། ལྷག་པར་དུ་སྟོབས་ཤུགས་ཀྱི་གཉའ་གནོན་དང་ཁེར་རྐྱང་འཚོ་གནས་ཞེས་པའི་ལྟ་བ་གཉིས་རང་འཇགས་གནས་བཞིན་ཡོད། དེང་སྐབས་དྲང་པོ་དང་བདེན་པ་ཞེས་པ་དེ་ལྕེ་ཙམ་གྱི་སྐད་ཆ་མ་གཏོགས་ཆེ་མཐོང་རྩ་བ་ནས་མེད་པར་གྱུར་ཡོད། ངས་དཔེ་མཚོན་ཞིག་ཞུས་པ་ཡིན་ན། ལོ་ངོ་བཅུ་ཕྲག་འགའ་ཤས་སྔོན་ནས་ཡོངས་ཁྱབ་འགྲོ་བ་མིའི་ཐོབ་ཐང་གི་གསལ་བསྒྲགས་བྱས་ཡོད་ནའང་དེ་དག་ལག་བསྟར་དངོས་སུ་བྱེད་རྒྱུ་ལས་ལྡོག་སྟེ་རྒྱལ་ཁབ་སྟོབས་ཤུགས་ཆེ་བས་གོ་ལ་གཅིག་གྱུར་དང་། ཆབ་སྲིད་ཀྱི་དགོས་མཁོ། དཔལ་འབྱོར་གྱི་ཁེ་ཕན་བཅས་ལ་བརྟེན་ནས་ད་ལྟ་ཉམས་ཞིབ་བྱས་པ་ཡིན་ན་དུས་ཚོས་དེའི་རྗེས་སུ་འགྲོ་བ་མིའི་ཐོབ་ཐང་བརྡལ་བཤིག་དེ་ལས་མང་བ་བཏང་བ་གསལ་པོ་ཆགས་ཡོད།

བཀའ་ཁྲི་མཆོག་ནས་ནང་ཆོས་ཀྱིས་དཀའ་ངལ་སེལ་ཐུབ་རྒྱུའི་སྐོར་ལ་གསུང་བཤད་གནང་དོན། ད་ལྟའི་དུས་སྐབས་དེ་མིའི་སྤྱི་ཚོགས་ནང་ཧམ་པ་དང་འདོད་རྔམ་གྱི་ཚད་མཐོ་ཤོས་ཤིག་ཏུ་སླེབས་ཡོད་པ་དང་། གནས་སྟངས་དེའི་འོག་སྤྱི་ཚོགས་ནང་ཞི་བདེ་མེད་པ་ཆགས་ཡོད་པ་རེད། དེ་དག་གི་རྒྱུ་རྐྱེན་གཙོ་བོ་ནི་ཕྱི་དངོས་པོའི་མཐུན་རྐྱེན་གྱི་འདོད་རྔམ་དེ་ཡིན་པའི་ཆ་ནས་རང་ཉིད་ཀྱི་ནང་སེམས་བཏུལ་ཐུབ་མིན་ལ་རག་ལུས་པ་ཞིག་ཡིན་སྟབས་གནས་སྟངས་དེར་ནང་ཆོས་ཀྱིས་ཕན་རླབས་ཏན་ཏན་སྒྲུབ་ཀྱི་རེད་བསམ་གྱི་ཡོད། ཅེས་གསུངས་ཡོད་པ་རེད།།