ཕྱི་ལོ་ ༢༠༠༩ ཟླ་ ༣ ཚེས་ ༤ རེས་གཟའ་ལྷག་པ།
༄༅། །འདི་གར་ཁུངས་ལྡན་གྱི་གནས་ཚུལ་འབྱོར་བར་གཞིགས་ན། ཕྱི་ལོ་ ༢༠༠༩ ཕྱི་ཟླ་ ༣ ཚེས་ ༡ ཉིན་གྱི་སྔ་དྲོ་ཆུ་ཚོད་ ༨ གཡས་གཡོན་དུ་རྔ་པ་རྫོང་ཁོངས་སུ་ཡོད་པའི་ཇོ་ནང་བསྭེ་དགོན་ཐུབ་བསྟན་ཕྱོགས་རྒྱལ་གླིང་གི་དགེ་འདུན་པ་ ༢༠༠ ཡས་མས་ཤིག་ནས་རང་འགུལ་ངང་དགོན་པའི་འདུ་ཁང་ནང་ཚོགས་འཚོགས་སྐབས་དགོན་པར་བཅའ་སྡོད་ལས་དོན་ཚོགས་ཆུང་དང་ཉེན་རྟོག་པ་སོགས་ཡོང་ནས་སྨོན་ལམ་ཚོགས་མི་ཆོག་པའི་བཀའ་རྒྱ་སྔོན་ནས་བཏང་ཟིན་པ་ལྟར་ད་ལྟ་ཉིད་དུ་ཚོགས་མཚམས་འཇོག་དགོས་ཚུལ་བཙན་བཀའ་བཏང་སྐབས། དགེ་འདུན་པ་མང་ཆེ་བས་རིམ་བཞིན་ཡར་ལངས་ཏེ་ང་ཚོ་སྨོན་ལམ་ཅིའི་ཕྱིར་ཚོགས་མི་ཆོག་པ་རེད། ངེས་པར་འཚོགས་དགོས་ཀྱི་ཡོད། ན་ནིང་ནས་ད་བར་བོད་པ་མང་པོ་ཞིག་བཙོན་འཇུག་བྱས་ཡོད་པ་དེ་དག་གློད་བཀྲོལ་གཏོང་དགོས་ཀྱི་ཡོད་ཅེས་སོགས་ཀྱི་འབོད་ཚིག་སྒྲོག་བཞིན་འདུ་ཁང་ཕྱི་ལོག་ལ་ཐོན་ཏེ་དགོན་པའི་རྒྱབ་ཀྱི་ལམ་ཆེན་ནས་རྔ་པ་རྫོང་ཐོག་ཏུ་བསྐྱོད་སྐབས་དམག་མི་ཧ་ཅང་མང་པོ་སླེབས་ཏེ་ལམ་བཀག་འགོག་བྱས་པ་དང་། དགོན་པའི་ལས་སྣེ་དང་བླ་མ་སོགས་སླེབས་ཏེ་དམག་མི་དང་གདོང་ཐུག་བྱས་ན་གྱོང་གུན་ཕོག་རྒྱུ་སོགས་ཀྱི་ལམ་སྟོན་གསལ་བཤད་མང་པོ་གནང་མཐར་དགེ་འདུན་པ་རྣམས་ཕྱིར་དགོན་པའི་ནང་ལོག་རྗེས་དམག་མིས་རྗེས་འདེད་ཀྱིས་དགོན་པའི་ཕྱི་ནང་ཚང་མར་སླེབས་ཏེ་དམ་བསྒྲགས་ནན་པོ་བྱེད་བཞིན་ཡོད་འདུག་པ་དང་། ལོ་སྔོན་མར་དགོན་པའི་ནང་ངོ་རྒོལ་སབྱར་ཡིག་བཀྲམ་པ་དང་བོད་ཀྱི་རྒྱལ་དར་འཕྱར་བ་སོགས་བྱས་ནས་དགོན་པའི་གྲྭ་ཤག་ཡོངས་རྫོགས་སྔོག་བཤེར་དང་དགེ་འདུན་པ་འཛིན་བཟུང་། ལོ་གསུམ་ཕྱོགས་གསུམ་ལ་བཞུགས་པའི་དགེ་འདུན་པ་རྣམས་ཀྱང་མཚམས་ཁང་ནས་ཕྱིར་ཐོན་དགོས་བྱུང་བ་སོགས་དམ་བསྒྲགས་བྱས་པའི་གནས་ཚུལ་བྱུང་ཡོད་པ་རེད་འདུག
