ཕྱི་ལོ་ ༢༠༠༩ ཟླ་ ༣ ཚེས་ ༤ རེས་གཟའ་ལྷག་པ།
ཀླུ་ཚང་དགོན་པའི་དགེ་འདུན་པས་མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཁུལ་མང་ར་རྫོང་མི་དམངས་སྲིད་གཞུང་གི་སྒོ་འགྲམ་དུ་མར་མེའི་ཁྲོམ་སྐོར་བྱེད་བཞིན་པ།
༄༅། །འདི་གར་ཁུངས་ལྡན་གྱི་གནས་ཚུལ་འབྱོར་བར་གཞིགས་ན། ཕྱི་ལོ་ ༢༠༠༩ ཕྱི་ཟླ་ ༢ ཚེས་ ༢༥ ཉིན་བོད་ཀྱི་ལོ་གསར་ཚེས་གཅིག་ཕྱི་དྲོ་བོད་ནང་གི་ཆུ་ཚོད་དྲུག་དང་ཕྱེད་ཀ་ཙམ་དུ་མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཁུལ་མང་ར་རྫོང་(ཀུའི་ནན་རྫོང་)ཁོངས་སུ་
ཡོད་པའི་ཀླུ་ཚང་དགོན་པའི་དགེ་འདུན་པ་ ༢༠༠ ལྷག་གིས་དགོན་པའི་ལ་མོ་ཡོངས་འཛིན་རིན་པོ་ཆེའི་གཟིམ་ཤག་ནས་འགོ་བཙུགས་ཏེ་ཀི་ལོ་མི་ཀྲར་གཅིག་ལྷག་ཙམ་ཡོད་པའི་རྫོང་མི་དམངས་སྲིད་གཞུང་གི་སྒོ་ཁར་འདུ་འཛོམས་ཀྱིས་ཞི་བའི་ངོ་རྒོལ་གནང་སྟེ་གཞིས་བྱེས་བོད་མི་ཡོངས་ཀྱི་བདེན་དོན་མྱུར་དུ་གསལ་བའི་སྨོན་འདུན་མཚོན་པར་བྱས་ཡོད་པ་རེད། སྐབས་དེར་ས་གནས་བོད་རིགས་ལས་བྱེད་རྒན་གྲས་དང་དགེ་རྒན་རྣམས་ཡོང་ནས་ཞུ་བ་བྱས་ཏེ་དགེ་འདུན་པ་རྣམས་ཕྱིར་དགོན་པར་ལོག་ཏུ་བཅུག་ཡོད་ཀྱང་། ཚེས་ ༢༦ ཉིན་རྫོང་སྤྱི་བདེ་ལས་ཁུངས་ཀྱི་ཁྲོམ་སྲང་དུ་གསལ་བསྒྲགས་སབྱར་ཏེ་ཆུ་ཚོད་ ༤༨ རིང་རང་འགུལ་གྱིས་མགོ་འདོགས་དང་ཉེས་པ་ངོས་ལེན་བྱེད་དུ་མ་ཡོང་ཚེ་ཁྲིམས་གཅོད་ནན་པོ་གཏོང་རྒྱུའི་ཉེན་བརྡ་བཏང་ཡོད་འདུག་པ་མ་ཟད། ཚེས་ ༢༧ ཉིན་ནས་ལས་འགུལ་ཁྲོད་ཞུགས་པའི་དགེ་འདུན་པ་ཛིན་བཟུང་བྱ་འགོ་བཙུགས་པ་དང་། དགེ་འདུན་པ་ ༡༩༠ མིང་གཞུང་བསྡུ་ལེན་གྱིས་རེ་རེ་བཞིན་བཀག་ཉར་གྱིས་ཚ་འདྲི་བྱས་ཡོད་པའི་ཁྲོད་དགེ་འདུན་པ་ཐབས་མཁས་རྒྱ་མཚོ་དང་། ཤེས་རབ་རྒྱ་མཚོ་གཉིས་ལ་ཉེས་རྡུང་ཚད་མེད་བཏང་སྟེ་གློད་བཀྲོལ་བཏང་ཡོད་པའི་གནས་ཚུལ་ཐོན་འདུག་ཀྱང་། ལྷག་འཕྲོས་དགེ་འདུན་པ་རྣམས་བཀག་ཉར་གྱིས་རེ་རེ་བཞིན་འདྲི་གཅོད་བྱེད་བཞིན་ཡོད་པའི་གནས་ཚུལ་ཐོན་འདུག་ལ། ད་ལྟའི་ཆར་ཐོག་མར་ཞི་རྒོལ་ཡོང་རྐྱེན་གྱི་བརྒྱུད་རིམ་ཐད་རྫོང་འབྲེལ་ཡོད་ལས་བྱེད་དང་དགེ་འདུན་པའི་དབར་གནས་ཚུལ་ཤེས་རྟོགས་ཡོད་པར་དོགས་གཞི་བྱས་ཏེ་བོད་རིགས་ལས་བྱེད་ཁག་ལའང་བསུན་གཙེར་ཤུགས་ཆེ་བཟོ་བཞིན་ཡོད་པའི་གནས་ཚུལ་ཐོན་འདུག་ལ། ཕྱི་ཟླ་ ༣ ཚེས་ ༡ ནས་བཟུང་དྲག་ཆས་དམག་མི་ ༡༠༠ ལྷག་གིས་དགོན་པ་ཡོངས་སུ་མཐའ་བསྐོར་ཏེ་དམ་བསྒྲགས་ཆེན་པོ་བྱེད་བཞིན་ཡོད་པའི་གནས་ཚུལ་ཐོན་བཞིན་འདུག
