ཕྱི་ལོ་ ༢༠༠༩ ཟླ་ ༣ ཚེས་ ༣ རེས་གཟའ་མིག་དམར།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ག་གྷལ་གནམ་ཐང་དུ་༸ཞབས་སོར་འཁོད་སྐབས་གསར་འགོད་པའི་དྲི་བ་ཁག་ལ་བཀའ་ལན་གནང་བཞིན་པ།
༄༅། །བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་ལྷོ་ཕྱོགས་ཀོ་ལེ་གྷའི་མཛད་འཆར་ཁག་ལེགས་པར་གྲུབ་རྗེས་ཕྱི་ཚེས་ ༡༩ སྔ་དྲོ་ཀོ་ལེ་གྷལ་ནས་མའི་སོར་ཁུལ་དུ་༸ཞབས་སོར་འཁོད་དེ་དེ་གར་མཛད་འཆར་ཁག་གྲུབ་མཚམས་དེ་ཉིན་དགོང་དྲོ་སྦེལ་ཀོབ་སེ་ར་ཆོས་སྒར་དུ་ཆིབས་ཞལ་བསྒྱུར་ཏེ་ཕྱི་ཚེས་ ༢༠ ནས་བསྙེན་རྫོགས་ཀྱི་སྡོམ་པ་འབོགས་གནང་མཛད་པ་དང་། ཕྱི་ཚེས་ ༢༥ བོད་ཀྱི་ལོ་གསར་ཚེས་ ༡ སྔ་དྲོ་སེ་ར་ཆོས་སྒར་དུ་༸གོང་ས་མཆོག་ཚོགས་མགོན་དུ་ཆིབས་སྒྱུར་བསྐྱངས་ཏེ་ཚེ་དབང་དང་བརྟན་བཞུགས་བསྟར་འབུལ་གྲུབ་རྗེས་མུ་མཐུད་བསྙེན་རྫོགས་ཀྱི་སྡོམ་པ་འབོགས་གནང་མཛད། 
ཕྱི་ཟླ་ ༣ ཚེས་ ༡ ཉིན་རྒྱབ་སེ་ར་ཆོས་སྒར་ནས་ལྡི་ལིར་ཆིབས་ཞལ་བསྒྱུར་ཏེ་ཚེས་ ༢ ཉིན་རྒྱབ་ལྡི་ལི་ནས་མཁའ་ཐོག་བརྒྱུད་ག་གྷལ་གནམ་ཐང་དུ་༸ཞབས་སོར་འཁོད་སྐབས་གནམ་ཐང་དུ་ཕེབས་བསུར་དཔལ་ལྡན་བཀའ་བློན་ཁྲི་པ་མཆོག་དང་། བོད་མི་མང་སྤྱི་འཐུས་ཚོགས་གཙོ་མཆོག རྒྱུད་སྟོད་མཁན་རིན་པོ་ཆེ་དང་ས་གནས་གྲོས་ཚོགས་ཀྱི་ཚོགས་གཙོ། ས་གནས་བདེ་དོན་བཅས་གཞུང་དང་གཞུང་འབྲེལ་མ་ཡིན་པའི་ཚོགས་སྐྱིད་ཁག་དང་སློབ་གྲྭ་ཁག་གི་འགན་འཛིན་རྣམ་པ། ཐང་སྟོང་གླུ་གར་ནས་བཀྲ་ཤིས་པའི་རྟེན་འབྲེལ་མཚོན་ཆེད་བཀྲིས་ཞོལ་པ་གཟིགས་འབུལ་སོགས་ཀྱིས་ཕེབས་བསུ་ཞུ་སྐབས་ཕེབས་ལམ་གཡས་གཡོན་གང་སར་སློབ་ཕྲུག་དང་མི་མང་བཅས་ནས་ལག་ཏུ་སྤོས་སྣེ་དང་མེ་ཏོག་སོགས་ཐོགས་ཏེ་ཕེབས་བསུ་གཟབ་རྒྱས་ཞུས་གནང་བ་དང་། གངས་ཅན་སྐྱིད་གཤོངས་སུ་བཙན་བྱོལ་བོད་གཞུང་གི་དྲུང་ཆེ་རྣམ་པས་དབུས་སྲི་ཞུའི་ལས་བྱེད་ཆེ་ཕྲ་ཆུང་གསུམ་བཅས་ནས་མེེ་ཏོག་དང་། མཇལ་དར། སྤོས་སྣེ་སོགས་ཐོགས་པ་དང་། གནས་ཆུང་དང་དགའ་གདོང་གྲྭ་ཚང་གི་དགེ་འདུན་པས་སེར་སྦྲེངས་བསྒྲིགས། དེ་བཞིན་སྨན་རྩིས་ཁང་དང་བདེ་ལེགས་སྨན་ཁང་གི་ལས་བྱེད་དང་ཉེ་འཁོར་མི་མང་བཅས་ནས་རང་རང་གི་ལག་ཏུ་མཆོད་རྫས་སྣ་ཚོགས་བསྣམས་ཏེ་གུས་བསུ་ཞུས། བཞུགས་སྒར་ཕོ་བྲང་དུ་སྐུ་བཅར་རྣམ་གྲྭའི་མཁན་རིན་པོ་ཆེས་གཙོས་དགེ་འདུན་པ་རྣམས་པས་སེར་སྦྲེངས་དང་། ཀིརྟི་བྱེས་པ་གྲྭ་ཚང་དང་། རིགས་ལམ་སློབ་གཉེར་ཁང་སོགས་དགེ་བཙུན་ཁག་དང་། མི་མང་བཅས་བརྒྱ་ཕྲག་བརྒལ་བས་ཕེབས་བསུ་ཞུ་སྐབས་བོད་གཞུང་ཟློར་གར་ཚོགས་པས་ཕོ་བྲང་གི་གཟིམ་སྒོའི་མདུན་ཐང་དུ་བཀྲིས་ཞོལ་པ་གཟིགས་འབུལ་དང་། གྲོ་སོ་ཕྱེ་མར་བཅས་འདེགས་འབུལ་ཞུས། ཕོ་བྲང་གི་གཟིམ་སྒོའི་ནང་དུ་དཔལ་ལྡན་ཁྲིམས་ཞིབ་པ་ཆེ་བ་དང་། བོད་མི་མང་སྤྱི་འཐུས་ཚོགས་གཞོན། བཀའ་བློན་རྣམ་པ་དང་སྤྱི་འཐུས་རྒྱུན་ལས་རྣམ་པ་བཅས་ནས་ཕེབས་བསུ་གཟབ་རྒྱས་ཞུས་པའི་གནས་ཚུལ་དུ།།
