༢༠༡༠ ཕྱི་ཟླ་ ༡ ཚེས་ ༧ རེས་གཟའ་ཕུར་བུ།
༄༅། །ཕྱི་ལོ་ ༢༠༠༩ ཟླ་ ༡༢ ཚེས་ ༢༨ ཉིན་བོད་མི་གློག་བརྙན་བཟོ་མཁན་དོན་གྲུབ་དབང་ཆེན་ལ་ཟི་ལིང་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གིས་་ཁྲིམས་ཆད་ལོ་ ༦ བཏང་པའི་ཁྱབ་བསྒྲགས་བྱས་ཡོད། ཕྱི་ལོ་ ༢༠༠༨ ལོར་བོད་ནང་བོད་མི་ཚོས་༸གོང་ས་མཆོག་བོད་དུ་གདན་འདྲེན་ཞུ་རྒྱུའི་མངོན་འདོད་དང་བོད་མིའི་གནས་སྟངས་ཐོག་གློག་བརྙན་བཟོ་མཁན་དོན་གྲུབ་དབང་ཆེན་རྒྱ་ནག་གཞུང་གིས་འཛིན་བཟུང་བྱས་ཡོད། རང་ལོ་ ༣༥ ཡིན་པའི་དོན་གྲུབ་དབང་ཆེན་ལགས་ཀྱིས་བོད་ནང་གི་གནས་སྟངས་དང་འབྲེལ་བའི་གློག་བརྙན་ཞིག་བཟོས་ཡོད་པར་བསྙད་འདོགས་བྱས་ནས་ཕྱི་ལོ་ ༢༠༠༨ ཟླ་ ༣ ཚེས་ ༢༦ ཉིན་རྒྱ་ནག་གཞུང་གིས་དོན་གྲུབ་དབང་ཆེན་ལགས་དང་ཁོང་གི་རོགས་པ་གྲྭ་འཇིགས་མེད་རྒྱ་མཚོ་ལགས་ལྷན་འཛིན་བཟུང་བྱས་ཡོད། འོན་ཀྱང་དོན་གྲུབ་དབང་ཆེན་ལགས་ཟླ་བ་བདུན་རྗེས་ཕྱི་ལོ་ ༢༠༠༨ ཟླ་ ༡༠ ཚེས་ ༡༥ ཉིན་ཁག་ཐེག་ཐོག་བཙོན་ཁང་ནས་གློད་བཀྲོལ་ཐོབ་ཡོད། བཙོན་འཇུག་སྐབས་ཁོང་ལ་སྡུག་སྦྱོང་མནར་གཅོད་བཏང་ཡོད་སྐོར་བརྗོད་ཡོད། ཕྱི་ལོ་ ༢༠༠༩ ཟླ་བ་ ༩ ཚེས་ ༡༧ ཉིན་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པ་དང་ཨ་རིར་རྟེན་གཞི་བྱས་པའི་འགྲོ་བ་མིའི་ཐོབ་ཐང་ཚོགས་པས་སྙན་ཐོ་ཞིག་བཏོན་པའི་ནང་རྒྱ་གཞུང་གིས་དོན་གྲུབ་དབང་ཆེན་ལགས་ཀྱི་གཟུགས་ཁམས་མི་བདེ་བར་སྨན་བཅོས་མཐུན་འགྱུར་སྤྲོད་དགོས་པའི་འབོད་སྐུལ་ཞུས་ཡོད། ཕྱི་ལོ་ ༢༠༠༩ ཟླ་ ༧ ནང་དོན་གྲུབ་དབང་ཆེན་ལགས་ཀྱིས་གླས་པའི་ཁྲིམས་རྩོད་པ་དེ་རྒྱ་གཞུང་གིས་ཆེད་མངགས་བཙན་བཀའ་བཏང་ནས་གཞུང་གིས་བསྐོ་གཞག་བྱས་པའི་ཁྲིམས་རྩོད་པ་ཞིག་དང་བརྗེ་པོ་རྒྱག་བཅུག་ཡོད་པ་དེར་རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་རྟོག་ཚོགས་པས་རྒྱ་གཞུང་གི་བྱེད་ཕྱོགས་དེ་ནི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་དང་འགལ་བ་མ་ཟད། རྒྱ་ནག་རང་གི་རྩ་ཁྲིམས་དང་ཡང་འགལ་ཡོད་ཚུལ་བརྗོད་ཡོད། གང་ཡིན་བརྗོད་ན་རྒྱ་ནག་གི་རྩ་ཁྲིམས་ནང་ཁྲིམས་ཆད་ཕོག་མཁན་སུ་ཡིན་རུང་རང་གི་ཁྲིམས་རྩོད་པ་དེ་རང་གི་འདེམས་རྒྱུའི་ཐོབ་ཐངཡོད་པ་གསལ་པོ་འཁོད་ཡོད་པ་དང་། ནག་ཉེས་ཕོག་མཁན་ཁོང་རང་ཁྲིམས་ཀྱི་བཀག་ཉར་སྐབས་རང་གི་འདེམས་པའི་ཁྲིམས་རྩོད་པ་དེ་ཐུག་འཕྲད་བྱེད་ཆོག དོན་གྲུབ་དབང་ཆེན་ཟླ་བ་ ༡༦ རྒྱ་གཞུང་གིས་བཙོན་འཇུག་རིང་ཁོང་གིས་ཁྲིམས་འགལ་གྱི་བྱ་སྤྱོད་རིགས་སྤེལ་བའི་ངོས་ལེན་རྩ་བ་ནས་བྱས་མེད་པ་བཅས།། ་
