༄༅། །ཕྱི་ལོ་ ༢༠༢༤ ཟླ་བ་ ༡༡ ཚེས་ ༢༨ ནས་ ༢༩ བར་ཉིན་གྲངས་གཉིས་རིང་སུད་སི་ཇི་ནི་ཝར་འཛམ་གླིང་མཉམ་འབྲེལ་རྒྱལ་ཚོགས་ཀྱི་གྲངས་ཉུང་མི་རིགས་ཀྱི་གནད་སྐོར་གྱི་གླེང་སྟེགས་ཐེངས་ ༡༧ པ་བསྐོང་ཚོགས་གནང་ཡོད་པ་ལྟར། སུད་སི་དོན་ཁང་གི་རྒྱལ་ཚོགས་འབྲེལ་མཐུད་པ་ཕུན་ཚོགས་སྟོབས་རྒྱལ་ལགས་མཉམ་ཞུགས་ཀྱིས་བོད་ནང་གི་ཛ་དྲག་གནས་སྟངས་སྤྱི་དང་། ལྷག་པར་བོད་ནང་མི་སེར་སྤེལ་ཡུལ་གཏན་འཇགས་སློབ་གྲྭ་སོགས་བརྒྱུད་དེ་བོད་མི་རིགས་ཀྱི་ངོ་བོ་རྩ་མེད་གཏོང་བཞིན་པའི་གནས་སྟངས་སྐོར་ཞུ་གཏུག་གནང་ཡོད།
དེ་ཡང་རྒྱལ་ཚོགས་འབྲེལ་མཐུད་པས་རྒྱ་ནག་གཞུང་ངོས་ནས་བོད་ནང་གི་བོད་ཕྲུག་རྣམས་མི་སེར་སྤེལ་ཡུལ་གཏན་འཇགས་སློབ་གྲྭ་ཁག་ཏུ་བཙན་འཇུག་བྱས་ཏེ། རྒྱ་སྐད་གཙོ་བོར་གྱུར་པའི་སློབ་ཁྲིད་དང་། ཆབ་སྲིད་ཀྱི་སློབ་གསོ་སྤྲད་དེ་བོད་ཀྱི་ཆོས་དང་རིག་གཞུང་སྐད་ཡིག་བཅས་པ་རྩ་མེད་གཏོང་བྱུས་བྱེད་བཞིན་པའི་ཛ་དྲག་གནས་སྟངས་གསལ་སྟོན་གནང་བའི་ཁར། རྒྱ་ནག་གཞུང་ནས་ཨ་ཚོགས་དགོན་པ་གཏོར་བཤིག་དང་། བོད་མི་རྣམས་རང་གནས་ནས་བཙན་ཤེད་ཀྱིས་གནས་སྤོ་རུ་འཇུག་བཞིན་པའི་གནས་སྟངས་གསལ་བཤད་གནང་ཡོད།
དེ་མཚུངས་ཕུན་ཚོགས་སྟོབས་རྒྱལ་ལགས་ནས་རྒྱ་ནག་གཞུང་གིས་མི་རིགས་དབྱེན་འབྱེད་ཀྱི་སྲིད་བྱུས་ལ་ངོ་རྒོལ་བྱེད་མཁན་བོད་མི་ཚེ་རིང་མཚོ་ལྟ་བུར་བཙན་གནོན་གཏོང་བཞིན་པ་མ་ཟད། དགོན་སྡེ་ཁག་ནས་གྲྭ་བཙུན་ཕྱིར་འབུད་གཏོང་བཞིན་པའི་གནས་སྟངས་སྐོར་ཞུ་གཏུག་གནང་ཡོད་པ་རེད།
སྤྱིར་མཉམ་འབྲེལ་རྒྱལ་ཚོགས་ཀྱི་གྲངས་ཉུང་མི་རིགས་ཀྱི་གནད་དོན་སྐོར་གྱི་གླེང་སྟེགས་དེ་ནི་གྲངས་ཉུང་མི་རིགས་ཚོར་འཕྲད་བཞིན་པའི་དཀའ་ངལ་གསལ་སྟོན་དང་། དེ་དག་དཀའ་སེལ་ཡོང་སླད་གྲོས་བསྡུར་བྱ་ཡུལ་གྱི་སྡིངས་ཆ་ཞིག་ཡིན་པ་དང་། ཚོགས་འདུའི་ཐོག་གསུང་བཤད་གནང་མཁན་རྣམས་ཀྱི་དགོངས་ཚུལ་དང་རྒྱབ་གཉེར་ཇི་བྱུང་རྣམས་རྒྱལ་ཚོགས་ཀྱི་ཆེད་མཁས་པས་སྙན་ཐོ་བཟོས་ཏེ། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་སུ་ཞུ་སྐུལ་གནང་གི་ཡོད།
འདི་ལོ་གླེང་སྟེགས་ནང་མཁས་པ་དང་། གཞུང་ཁོངས་མིན་པའི་ཚོགས་པ། མི་སྒེར་སོགས་འཚུད་པའི་མི་གྲངས་ ༦༩༠ ལྷག་མཉམ་ཞུགས་གནང་སྟེ། བརྗོད་སྙིང་གཙོ་བོ་གྲངས་ཉུང་མི་རིགས་རྣམས་སྤྱི་དམངས་ཀྱི་གནད་དོན་ཐག་གཅོད་ཐོག་མཉམ་ཞུགས་ཡོང་ཐབས་དང་། ཤེས་ཡོན་ཐོག་ནས་གྲངས་ཉུང་མི་རིགས་ཀྱི་ལོ་རྒྱུས་དང་སྲོལ་རྒྱུན་རྒྱུན་འཛིན་བྱེད་ཕྱོགས། གྲངས་ཉུང་མི་རིགས་ཀྱི་གནད་དོན་གསལ་སྟོན་ཡོང་ཐབས་སུ་གསར་ཁང་དང་རིག་གཞུང་སྡེ་ཁག་གི་འགན་ཁུར་ཕྱོགས་སྐོར་བགྲོ་གླེང་གནང་གི་ཡོད་པ་རེད། །
