༄༅། །ཕྱི་ལོ་ ༢༠༢༤ ཟླ་བ་ ༡༡ ཚེས་ ༢༨ ཉིན་གྱི་སྔ་དྲོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་མོན་གྷོ་འདོད་རྒུ་གླིང་བོད་མིའི་གཞིས་ཆགས་ཀྱི་གཞིས་གྲོང་ལྔ་པ་དང་། གཞིས་གྲོང་བཞི་པའི་བཀའ་བརྒྱུད་དགོན་འཚམས་གཟིགས་གནང་ཞིང་། སྐབས་དེར་སྲིད་སྐྱོང་མཆོག་ནས་བོད་མིའི་གཞིས་ཆགས་ཁག་ཏུ་འཚམས་གཟིགས་ཐེངས་གཉིས་པ་གནང་བཞིན་པའི་དགོས་དམིགས་འགྲེལ་བརྗོད་གནང་རྗེས་འབྲས་སྤུངས་བློ་གསལ་གླིང་གྲྭ་ཚང་དུ་ཆེད་ཕེབས་ཀྱིས་འཇམ་མགོན་༸རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་ ༡༠༥ རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་གི་ཁྲི་འདོན་མཛད་སྒོར་ལྷན་ཞུགས་གནང་ཡོད།
འཁྲི་འདོན་མཛད་སྒོ་གྲུབ་མཚམས་དཔལ་ལྡན་སྲིད་སྐྱོང་མཆོག་གིས་གཞིས་ཆགས་སུ་འཚམས་གཟིགས་མུ་མཐུད་བསྐྱངས་ཏེ། ནོར་བུ་རི་དང་། གཞིས་གྲོང་དྲུག་པ་དང་། སཾ་བྷོ་ཊ་ཉིན་སློབ། གཞིས་གྲོང་བདུན་པ། གཞིས་གྲོང་བརྒྱད་པ་སོ་སོར་གཟིགས་སྐོར་གནང་རྗེས་དགའ་ལྡན་བླ་སྤྱིར་ཉིན་གུང་གསོལ་ཚིགས་བཞེས་ཡོད། ཉིན་རྒྱབ་སྲིད་སྐྱོང་སྤེན་པ་ཚེ་རིང་མཆོག་ནས་གཞིས་ཆགས་ཀྱི་ཚོགས་ཁང་དུ་ས་གནས་བོད་མི་རྣམས་ལ་གསུང་བཤད་གནང་། སྐབས་དེར་སྲིད་སྐྱོང་མཆོག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་རྗེས་དྲན་ཞུས་པ་དང་སྦྲགས། བོད་ཕྲུག་གཞོན་སྐྱེས་རྣམས་ལ་བོད་ཀྱི་ལོ་རྒྱུས་ཐེ་བའི་ཆོས་དང་རིག་གཞུང་སློབ་སྟོན་གནང་དགོས་པའི་གལ་གནད་དང་། ལྷག་པར་དུ་བོད་མིའི་འཐབ་རྩོད་གསོན་གནས་ཐུབ་མིན་བོད་ཀྱི་ཆོས་དང་རིག་གཞུང་རྒྱུན་འཛིན་ཐུབ་མིན་ལ་རག་ལུས་སྐོར་གསལ་བཤད་གནང་རྗེས་མང་ཚོགས་ཀྱི་དོགས་དྲི་ཁག་ཅིག་ལ་ལན་འདེབས་གསལ་བཤད་གནང་ཡོད་པ་རེད།
དེ་རྗེས་དཔལ་ལྡན་སྲིད་སྐྱོང་མཆོག་ནས་ས་གནས་འགོ་འཛིན་ལས་ཁུངས་དང་། ས་གནས་རང་བདེན་ཚོགས་ཆུང་གི་ལས་ཁུངས། ས་གནས་མཉམ་འབྲེལ་ལས་ཁུངས། ས་གནས་འཐུས་ཚོགས་ཀྱི་ལས་ཁུངས། ཞི་བ་འཚོ་དཔེ་མཛོད་ཁང་སོགས་སུ་གཟིགས་སྐོར་དུ་ཕེབས་ཏེ། ཚོགས་སྡེ་སོ་སོའི་ལས་དོན་བརྩམས་ཕྱོགས་སྐོར་རྒྱུས་ལོན་གནང་ཡོད་པ་བཅས།།
