༄༅། །འཕྲོད་བསྟེན་ལས་ཁུངས་ཀྱི་སྡེ་འགན་བསྟན་འཛིན་ལམ་བཟང་ལགས་ཕྱི་ལོ་ ༢༠༢༤ ཟླ་བ་ ༦ ཚེས་ ༡༤ ཉིན་གྱི་ཕྱེད་ཡོལ་ཆུ་ཚོད་ ༢ མ་ཟིན་ཙམ་ལ་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་དཔལ་ལྡན་བཀའ་ཤག་ཏུ་སྙན་སེང་བྱུང་བར་ཆེས་ཐུགས་ཕམ་དང་འབྲེལ་དམ་པ་ཁོང་གིས་ཚེ་རབས་ཕྲེང་བར་བསགས་པའི་སྡིག་སྒྲིབ་བྱང་ཞིང་དག་ནས་མངོན་མཐོ་ངེས་ལེགས་ཀྱི་གོ་འཕང་མགྱོགས་ནས་མྱུར་དུ་འཐོབ་པའི་སྨོན་ལམ་གསོལ་འདེབས་ཞུ་ཕྱིར་དེ་རིང་ཕྱི་ཚེས་ ༡༤ ཉིན་གྱི་ཕྱེད་ཡོལ་ཆུ་ཚོད་ ༣ པའི་ཐོག་རྡ་ས་གངས་སྐྱིད་སྲིད་སྐྱོང་ཚོགས་ཁང་དུ་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་། ལྷན་ཁང་ཁག་གི་དྲུང་ཆེ་ཆུང་རྣམ་པ། དེ་བཞིན་སྲི་ཞུའི་ལས་བྱེད་བཅས་ཚང་འཛོམས་ཐོག་བཀའ་དྲུང་ཆུ་སྐྱ་སྦྲ་གཉིས་ཚེ་རྒྱལ་ལགས་ཀྱིས་དམ་པ་ཁོང་གི་ལོ་རྒྱུས་སྙིང་བསྡུས་ཤིག་སྒྲོགས་སྦྱང་གནང་རྗེས་དམ་པ་ཁོང་ལ་མྱ་ངན་གུས་འདུད་དང་གདུང་སེམས་མཉམ་སྐྱེ་མཚོན་སླད་ཕྱི་དྲོ་ཆུ་ཚོད་ ༤ ནས་བོད་མིའི་སྒྲིག་འཛུགས་ཀྱི་དབུས་ལས་ཁུངས་ཁག་ལས་མཚམས་བཞག་ཡོད།
དམ་པ་ཁོང་ནི། ཕྱི་ལོ་ ༡༩༨༣ ཟླ་ ༤ ཚེས་ ༢༤ ཉིན་ལ་དྭགས་བོད་མིའི་གཞིས་ཆགས་སུ་སྐྱེས་ཤིང་། ཕྱི་ལོ་ ༢༠༡༠ ཟླ་བ་ ༡༡ ཚེས་ ༡༨ ནས་སྤུ་རུ་ཝ་ལ་ས་འགོའི་ཆོད་ལྟའི་ལས་དྲུང་དུ་བཀོད་སྒྲིག ཕྱི་ལོ་ ༢༠༡༢ ཟླ་བ་ ༥ ཚེས་ ༢༢ ནས་ཕྱི་ལོ་ ༢༠༡༣ ཟླ་བ་ ༥ ཚེས་ ༡༦ བར་ཕྱེད་ཕོགས་ནད་དགོངས། ཕྱི་ལོ་༢༠༡༣ ཟླ་བ་ ༥ ཚེས་ ༡༧ ནས་ཤེས་རིག་ལས་ཁུངས་ཀྱི་ལས་དྲུང་གནས་སྤོས། ཕྱི་ལོ་ ༢༠༡༤ཟླ་བ་ ༩ ཚེས་ ༡༥ ལས་ཁུངས་དོ་དམ་པར་གནས་སྤར། ཕྱི་ལོ་ ༢༠༡༤ ཟླ་བ་ ༡༠ ཚེས་ ༠༡ ནས་ཤེས་རིག་ལས་ཁུངས་ཀྱི་ལས་དོ་ལ་གནས་སྤར་བསྐོ་གཞག ཕྱི་ལོ་ ༢༠༡༩ ཟླ་བ་ ༡༠ ཚེས་ ༢༨ ཉིན་སྡེ་འགན་གནས་སྤར་གྱིས་ལས་འགན་རང་འཇགས། ཕྱི་ལོ་ ༢༠༢༠ ཟླ་བ་ ༡༢ ཚེས་ ༠༣ ཉིན་བཀའ་ཡིག་ཁྱབ་ཁོངས་བར་བརྒལ་ལས་བཀོད་སྡེ་ཚན་དུ་གནས་སྤོས། ཕྱི་ལོ་ ༢༠༢༢ ཟླ་བ་ ༠༤ ཚེས་ ༡༨ ནས་ཕྱི་ལོ་ ༢༠༢༢ ཟླ་བ་ ༡༠ ཚེས་ ༡༤ བར་ཟླ་དྲུག་དམིགས་བསལ་ཕོགས་མེད་གུང་གསེང་། ཕྱི་ལོ་ ༢༠༢༢ ཟླ་བ་ ༡༠ ཚེས་ ༡༧ ཉིན་ནས་འཕྲོད་བསྟེན་ལས་ཁུངས་ཀྱི་སྡེ་འགན་དུ་གནས་སྤོས། ཕྱི་ལོ་ ༢༠༢༣ ཟླ་བ་ ༠༢ ཚེས་ ༠༢ ནས་ཕྱི་ལོ་ ༢༠༢༣ ཟླ་བ་ ༠༢ ཚེས་ ༡༠ བར་དམིགས་བསལ་ནད་དགོངས། ཕྱི་ལོ་ ༢༠༢༣ ཟླ་བ་ ༠༨ ཚེས་ ༡༠ ནས་ཟླ་གྲངས་ ༠༦ རིང་དམིགས་བསལ་ཕོགས་མེད་ནད་དགོངས། ཕྱི་ལོ་ ༢༠༢༤ ཟླ་བ་ ༠༡ ཚེས་ ༡༧ ནས་འཕྲོད་བསྟེན་ལས་ཁུངས་སུ་ལས་བཅར་སྔ་སྣུར་ཞུས། ཕྱི་ལོ་ ༢༠༢༤ ཟླ་བ་ ༠༦ ཚེས་ ༡༤ ཉིན་ཕྱེད་ཡོལ་ཆུ་ཚོད་ ༠༢ པ་མ་ཟིན་ཙམ་ལ་འདས་གྲོངས་སུ་གྱུར་ཡོད།། 
