༄༅། །ཕྱི་ལོ་ ༢༠༡༠ ཟླ་ ༡ ཚེས། ༥ ཉིན་བཙན་བྱོལ་བོད་མིའི་བོད་ཀྱི་གསོ་བ་རིག་པའི་ཆེས་མཐོའི་སྨན་པའི་ལྷན་ཚོགས་ཀྱིས་གོ་སྒྲིག་ཐོག་སྨན་པའི་ལྷན་ཚོགས་དབུ་བརྙེས་ནས་ལོ་ངོ་དྲུག་འཁོར་བའི་དུས་དྲན་སྲུང་བརྩི་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་བོད་གཞུང་སྨན་རྩིས་ཁང་གི་ཚོགས་ཁང་དུ་ཚོགས་ཡོད། དེ་ཡང་སྐུ་མགྲོན་གཙོ་བོ་བོད་གཞུང་འཕྲོད་བསྟེན་ལས་ཁུངས་ཀྱི་བཀའ་བློན་མཆོག་དང་སྨན་རྩིས་ཁང་གི་འགན་འཛིན་བགྲེས་གཞོན་རྣམ་གཉིས། ས་གནས་བདེ་དོན། སྨན་པ་ཁག་གཅིག་དང་། གསར་འགོད་པ་བཅས་ལྷན་འཛོམས་ཀྱིས་ཐོག་མར་སྐུ་མགྲོན་གཙོ་བོ་མཆོག་གིས་སྣང་གསལ་ཞལ་ཕྱེ་གནང་། དེ་ནས་ཆེས་མཐོའི་སྨན་པའི་ལྷན་ཚོགས་ཀྱི་དྲུང་ཆེ་སྨན་རམས་པ་ཐོགས་མེད་དཔལ་འབྱོར་ལགས་ནས་ལྷན་ཚོགས་ཀྱི་ལོ་འཁོར་ལས་བསྡོམས་སྒྲོགས་སྱང་གྲུབ་མཚམས་སྐུ་མགྲོན་གཙོ་བོ་མཆོག་གིས་གསུང་བཤད་གནང་དོན། ཐོག་མར་སྐྱབས་བཅོལ་ཆགས་པའི་སྐབས་བོད་ཀྱི་གསོ་བ་རིག་པ་ཟེར་བ་དེ་རྩ་སྟོང་དུ་འགྲོ་ལ་ཉེ་ནའང་། ༸གོང་ས་༸སྐྱབས་མགོན་ཆེན་པོའི་བླ་ན་མེད་པའི་གཟིགས་སྐྱོང་འོག་སྨན་རྩིས་ཁང་ཙམ་མ་ཟད། ད་ལྟ་སྨན་པའི་ལྷན་ཚོགས་ཡོད་པ་འདི་འདས་པའི་ལོ་ལྔ་བཅུའི་བོད་ཀྱི་གསོ་བ་རིག་པའི་བརྒྱུད་རིམ་ནང་བསམ་བློ་བཏང་ན་ད་ལྟའི་གནས་སྟང་འདི་གོམ་པ་རླབས་ཆེན་པོ་སྤོས་པ་ཞིག་ལ་ངོས་འཛིན་བྱེད་ཀྱི་ཡོད

ང་ཚོའི་གསོ་བ་རིག་པའི་གཞུང་འདི་འཛམ་གླིང་ནང་ཕུན་སུམ་ཚོགས་ཤོས་ཤིག་དང་། གཏིང་ཟབ་པོ་ཞིག་ཡིན་པའི་ཁར་ཐོག་མཐའ་བར་གསུམ་དུ་ནད་པའི་ལུས་ཁམས་གསོ་བ་དང་། ཕྱི་ལུགས་སྨན་གྱིས་གཅིག་ཕན་གཅིག་གནོད་ལས་ཡོངས་སུ་རྫོགས་པར་ཕན་གྱི་མེད་སྟབས། ང་རང་ཚོ་བོད་པའི་ཐུན་མོང་མ་ཡིན་པའི་གསོ་བ་རིག་པ་དེས་ལུས་ཀྱི་ནད་ཙམ་མ་ཡིན་པར་ནང་གི་ནད་འཇོམས་པ་དང་། དེ་ལྟའི་ནད་པ་བྱེ་བྲག་པ་དེའི་ནད་གསོ་ཐབས་ཙམ་མ་ཡིན་པར་ཚེ་ཕྱི་མ་ཕན་ཆད་སེམས་ཅན་ནད་མནར་དེའི་ལམ་སྟོན་ཡོང་བའི་ཆ་རྐྱེན་ཚང་ཡོད། དེར་བརྟེན་ཆེས་མཐོའི་སྨན་པའི་ལྷན་ཚོགས་ཀྱི་སྒྲིག་འཛུགས་གལ་ཆེན་པོ་ཆགས་ཀྱི་ཡོད། བོད་ཀྱི་གསོ་བ་རིག་པའི་སྨན་གཞུང་དེ་དག་གཅིག་གྱུར་གྱི་ཚད་ལྡན་ཡོང་ཆེད་ཐུགས་འགན་གཙོ་བོ་རྒྱལ་སྤྱིའི་སྡིངས་ཆའི་སྟེང་བོད་ཀྱི་གསོ་བ་རིག་པའི་ཐུན་མིན་ཁྱད་ཆོས་དེ་དག་སྟོན་ཐུབ་པ་དང་། དེང་གསོ་རིག་འཛམ་གླིང་སྤྱི་ལ་སྙན་གྲགས་ཁྱབ་བཞིན་པའི་སྐབས་འདིར་སྨན་སྱོར་བརྒྱུད་རིམ་ཕྱག་ལེན་ཚད་ལྡན་མ་བྱུང་ན་རང་བདེ་དོན་གཉེར་ཁ་ཤས་ནས་བེད་སྤྱོད་ལོག་པར་ཕྱིན་ཏེ་བོད་སྨན་སྙན་གྲགས་ལ་ཉམས་རྒུད་ཡོང་སྲིད་པར་སོང་། སྨན་པའི་ལྷན་ཚོགས་ངོས་ནས་ཐུགས་སྣང་བྱེད་དགོས་ཀྱི་འདུག མཐའ་མར་བོད་གཞུང་འཕྲོད་བསྟེན་ལས་ཁུངས་ངོས་ནས་བོད་ཀྱི་ཐུན་མིན་གསོ་བ་རིག་པའི་བསྟན་པ་དར་བ་དང་། བོད་གཞུང་གི་སྒྲིག་འཛུགས། ༸གོང་ས་མཆོག་གི་དགོངས་བཞེད་ལྟར་རྒྱབ་སྐྱོར་མཐའ་གཅིག་ཏུ་ཞུ་རྒྱུ་ཡིན། ཞེས་སོགས་ཀྱི་གསུང་བཤད་གནང་། དེ་རྗེས་ཆེས་མཐོའི་སྨན་པའི་ལྷན་ཚོགས་ཀྱི་ཚོགས་མི་སྨན་རམས་པ་ཆོས་ལོ་ཐར་ནས་ཐུགས་རྗེ་ཆེ་ཞུས་ཏེ་མཛད་སྒོ་གྲོལ་བའི་གནས་བསྡུས་སུ།།