༄༅། །ཕྱི་ལོ་ ༢༠༢༥ ཟླ་བ་ ༠༥ ཚེས་ ༡༤ ཉིན་ཡུ་རོབ་རྒྱལ་སྤྱིའི་བོད་དོན་ལས་འགུལ་ཁང་གིས་མགྲོན་འབོད་གནང་བ་ལྟར། བེལ་ཇི་ཡམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས་ཡུ་རོབ་གྲོས་ཚོགས་སུ་བོད་ནང་དུ་ཆུ་མཛོད་གསར་རྒྱག་གི་ལས་གཞི་དེ་དག་གིས་འགྲོ་བ་མི་དང་། ཁོར་ཡུག ས་ཁམས་ཆབ་སྲིད་བཅས་ལ་གནོད་འཚེ་ཐེབས་ཚུལ་སྐོར་མཇུག་བསྡོམས་གསུང་བཤད་གནང་ཡོད། ཚོགས་འདུ་དེར་ཁོར་ཡུག་ཐོག་ཆེད་མཁས་པ་དང་། ཁོར་ཡུག་སྲུང་སྐྱོབ་ཐོག་ཞུ་གཏུག་གནང་མཁན། དེ་བཞིན་ཡུ་རོབ་ཀྱི་འབྲེལ་ཡོད་མི་སྣ་བཅས་ལྷན་ཞུགས་ཀྱིས་རྒྱ་ནག་གཞུང་ནས་བོད་མཐོ་སྒང་དུ་ཆུ་མཛོད་གློག་ཁང་གསར་རྒྱག་གི་ལས་གཞི་དེ་དག་གིས་ཤུགས་རྐྱེན་ཇི་ལྟར་ཐེབས་མིན་ཐོག་ཞིབ་འཇུག་གནང་འདུག
དེ་ཡང་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས་བོད་ཀྱི་ས་ཁམས་ཆབ་སྲིད་དང་ཁོར་ཡུག་གི་གནད་འགག་སྐོར་གསུང་ཞིང་། ཆུ་མཛོད་གློག་ཁང་གསར་རྒྱག་གི་ལས་གཞི་དེ་དག་བརྒྱུད་ཨེ་ཤི་ཡའི་ཆུ་མཛོད་དུ་གྲགས་པའི་བོད་ཀྱི་ཆུ་བོ་ཁག་ལ་རྟེན་པའི་ཨེ་ཤི་ཡའི་མི་འབོར་ས་ཡ་མང་པོའི་འཚོ་རྟེན་ལ་དོ་ཕོག་འགྲོ་རྒྱུའི་ཉེན་ཚབས་སྐོར་གསལ་སྟོན་དང་སྦྲགས། འཛམ་གླིང་ཡོངས་ཀྱི་གནམ་གཤིས་འགྱུར་ལྡོག་དང་། ཁོར་ཡུག་སྲུང་སྐྱོབ་ཀྱི་ཚོགས་སྡེ་ཁག་ནས་བོད་མཐོ་སྒང་གི་ས་ཁམས་ཆབ་སྲིད་དང་ཁོར་ཡུག་གི་གལ་གནད་ལ་ངོས་འཛིན་གནང་བའི་ཐོག་རྒྱལ་སྤྱིའི་སྲུང་སྐྱོབ་ཀྱི་སྒྲོམ་གཞིའི་ནང་འཇོག་དགོས་པའི་རེ་སྐུལ་ཞུས་ཡོད།
གཞན་ཡང་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས་ཡུ་རོབ་གྲོས་ཚོགས་ཀྱི་འཐུས་མི་ཁག་ཅིག་དང་མཇལ་འཕྲད་གནང་སྟེ་ཉེ་ཆར་གྲོས་ཚོགས་ཀྱིས་བོད་ནང་གི་ཆོས་དད་རང་དབང་རྡོག་རོལ་གཏོང་བཞིན་པའི་སྐོར་གྱི་གྲོས་ཆོད་བཞག་པར་ཐུགས་རྗེ་ཆེ་ཞུས་ཡོད། སྐབས་དེར་ཡུ་རོབ་ཞུ་གཏུག་འགན་འཛིན་བསྟན་འཛིན་ཕུན་ཚོགས་ལགས་ལྷན་བཅར་ཞུས་ཡོད་པ་བཅས།།
