༄༅། །ཁམས་ཀཿཐོག་ས་གནས་འགོ་འཛིན་ལས་ཁུངས་དང་། ཀཿཐོག་བཟོ་ཚོགས་ལས་ཁུངས་ནས་ཕྱི་ལོ་ ༢༠༢༤ ཟླ་བ་ ༧ ཚེས་ ༢༤ ལྷག་དཀར་དང་སྟབས་བསྟུན་ཨ་རི་སྲིད་གཞུང་ནས་བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་གནང་བར་ཐུགས་རྗེ་ཆེ་མཚོན་སླད་གཞིས་མི་མང་ཚོགས་ནས་དགའ་ཚོར་ཆེན་པོའི་ངང་ཐུགས་རྗེ་ཆེ་ཞུ་ཆེད་ཉིན་འཁྱོངས་མང་ཚོགས་མཉམ་སྡོད་ཀྱིས་གཞས་སྣ་སོགས་ལ་རོལ་ཡོད།

དེ་ཡང་གོང་ཚེས་ཉིན་གྱི་སྔ་དྲོ་བསལ་གསོལ་དང་། ༸རྒྱལ་བའི་སྐུ་པར་མཐོང་གྲོལ་རིན་པོ་ཆེ་གདན་ཞུ་ཀྱིས་བཞུགས་ཁྲིར་འཁོད་བསྟུན་ས་གནས་འགོ་འཛིན་དང་། ས་འཐུས་ཚོགས་གཙོ། ས་གནས་རང་བདེན་ཚོགས་གཙོ་བཅས་ནས་མཎྡལ་རྟེན་གསུམ་འདེགས་འབུལ་གྱིས་མཇལ་ཁ་དང་། རིམ་བཞིན་ས་གནས་འཕགས་ཡུལ་རྙིང་མའི་དགོན་གྱི་མཁན་བླ་སྤྲུལ་དང་། གྲྭ་མང་། མང་ཚོགས་བཅས་ནས་མཇལ་ཕྱག་བཅར། རྟེན་འབྲེལ་མཚོན་ཆེད་འབྲས་བསིལ་འདེགས་འབུལ་དང་ས་གནས་འགོ་འཛིན་གྱིས་ཁྲིམས་ཡིག་དེ་ཉིད་འབྱུང་སྟངས་ངོ་སྤྲོད། མཛད་སྒོ་གྲ་སྒྲིག་བཅས་ཀྱི་སྐོར་གསུང་བཤད་གནང་ཡོད་པ་བཅས།།