༄༅། །བོད་མིའི་སྒྲིག་འཛུགས་ཆོས་རིག་ལས་ཁུངས་ནས་ཕྱི་ལོ་ ༢༠༢༤ ཟླ་ ༦ ཚེས་ ༦ དང་ ༧ དེ་བཞིན་ཚེས་ ༡༣ བཅས་ཉིན་གྲངས་གསུམ་རིང་འདི་ལས་ནས་གོ་སྒྲིག་ཞུས་པའི་བོད་ཀྱི་རིག་གཞུང་དང་སྒྱུ་རྩལ་ལས་གཞི་ཐེངས་ ༧ པའི་ནང་མཉམ་ཞུགས་གནང་མཁན་གྱི་སྙན་འབུལ་བ་རྣམས་ལ་ངོ་འཕྲད་དང་དྲྭ་ཐོག་གང་རུང་ཐོག་ནས་ཆོས་རིག་ལས་ཁུངས་ཀྱི་ཚོགས་ཁང་ནང་འདྲི་གླེང་གནང་ཡོད།ཐེངས་འདིའི་ལས་གཞིའི་ནང་སྙན་འབུལ་བ་ཚོགས་སྒེར་ཁྱོན་བསྡོམས་ ༡༠༣ ནས་བོད་ཀྱི་རིག་གཞུང་དང་འབྲེལ་བའི་ལས་རིག་འདྲ་མིན་ཐོག་མཉམ་ཞུགས་གནང་ཡོད་པ་དང་། དེ་དག་གི་ཁོངས་ནས་སྙན་འབུལ་བ་ ༣༦ གི་ལས་འཆར་ལ་རོགས་དངུལ་ཧིན་སྒོར་འབུམ་ ༡ ནས་ ༤ བར་ཐོབ་ཡོད། ལས་གཞི་འདི་ཕྱི་ལོ་ ༢༠༡༧ ནས་ཨ་རིའི་རོགས་ཚོགས་ཀྱི་རོགས་དངུལ་མཐུན་འགྱུར་འོག་བོད་ཀྱི་ཐུན་མོང་མ་ཡིན་པའི་གནའ་དེང་གི་རིག་གཞུང་མི་ཉམས་རྒྱུན་འཛིན་ཐུབ་ཐབས་ལ་དམིགས་ཏེ་རྒྱ་གར་ནང་དུ་ཡོད་པའི་བོད་རིགས་སྒྱུ་རྩལ་བ་དང་། ཉམས་ཞིབ་པ། རིག་གཞུང་བསྟི་གནས་ཁག་ལ་ཆེད་ལས་ཡར་རྒྱས་དང་རྒྱུན་གནས་སླད་རོགས་དངུལ་ཕྲན་བུ་འབུལ་གྱི་ཡོད། ད་བར་ལས་གཞི་འདིའི་འོག་རོགས་དངུལ་ཐོབ་མཁན་ཚོགས་སྒེར་ཁྱོན་བསྡོམས་ ༡༧༦ ལ་རོགས་དངུལ་ཐོབ་ཡོད་པ་དེས་བོད་རིགས་སྒྱུ་རྩལ་བ་དང་། ཉམས་ཞིབ་པ། རིག་གཞུང་བསྟི་གནས་སོགས་ལ་ཕན་ཐོགས་ཧ་ཅང་ཆེན་པོ་བྱུང་ཡོད།།