བོད་ཀྱི་སྐད་ཡིག་དང་ནང་དོན་རིག་པའི་ཟབ་ཁྲིད་ཐེངས་བཅུ་པ་ལེགས་གྲུབ་བྱུང་བ།

གསར་ལས་ཁང་གི་གསར་འགོད་པས།

༢༠༢༣-༡༢-༣༠

༄༅། །འདི་གར་ཆོས་རིག་ལས་ཁུངས་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་ཆོས་རིག་ལས་ཁུངས་དང་གངས་ཅན་རིག་གནས་སློབ་གྲྭ་ཟུང་འབྲེལ་ཐོག་གོ་སྒྲིག་ཞུས་པའི་བོད་ཀྱི་སྐད་ཡིག་དང་ནང་དོན་རིག་པའི་ཟབ་ཁྲིད་ཐེངས་བཅུ་པ་དེ་རིང་ལེགས་གྲུབ་བྱུང་ཡོད།

ལས་གཞི་འདིའི་དམིགས་ཡུལ་གཙོ་བོ་ནི། མཐོ་སློབ་ཐོན་པའི་བོད་པའི་གཞོན་སྐྱེས་རྣམས་དེང་དུས་ཤེས་ཡོན་ལྡན་པའི་ཐོག བོད་ཀྱི་སྐད་ཡིག་དང་ལྷག་པར་ནང་དོན་རིག་པའི་ཐོག་ཤེས་རྟོགས་ལེགས་པོ་ཡོད་པའི་འདབ་ཤོག་གཉིས་ལྡན་གྱི་བོད་མི་ཞིག་ཏུ་འགྱུར་ཐབས་ལ་དམིགས་ཏེ་གོ་སྒྲིག་ཞུ་བཞིན་ཡོད།

དུས་ཡུན་ཟླ་བ་དྲུག་གི་རིང་སློབ་ཕྲུག་རྣམས་ལ་བོད་ཀྱི་སྐད་ཡིག་དང་། ནང་དོན་རིག་པ། གཞུང་ཆེན་ཁག་གི་ངོ་སྤྲོད། རིགས་ལམ། སྒོམ་སྒྲུབ་ཉམས་ལེན་སོགས་སློབ་ཁྲིད་གནང་ཡོད།

ཐེངས་འདིའི་ཟབ་ཁྲིད་ནང་ས་གནས་ཁག་བཅུ་ཙམ་ནས་བོད་པའི་སློབ་ཕྲུག་ ༡༩ ཡིས་མཉམ་བཞུགས་ཀྱིས་སྦྱང་འབྲས་ལེགས་པར་གྲུབ་ཡོད། མཇུག་བསྡོམས་མཛད་སྒོའི་སྐུ་མགྲོན་གཙོ་བོར་ཆོས་རིག་དྲུང་ཆེ་འཆི་མེད་ཚེ་དབྱངས་ལགས་དང་། དམིགས་བསལ་སྐུ་མགྲོན་ཕྱོགས་བཞུགས་བོད་མི་མང་སྤྱི་འཐུས་མི་འགྱུར་རྡོ་རྗེ་ལགས། དེ་བཞིན་ཧོན་སོར་རབ་རྒྱས་གླིང་ས་གནས་འགོ་འཛིན་བསྟན་འཛིན་ཟླ་སྒྲོན་ལགས་དང་། གངས་ཅན་རིག་གནས་སློབ་གྲྭའི་སློབ་སྤྱི་དགེན་ཡོན་ཏན་ལགས་བཅས་ལྷན་འཛོམས་ཀྱིས་སློབ་ཕྲུག་རྣམས་ལ་གསུང་བཤད་ལམ་སྟོན་དང་། གཟེངས་སུ་ཐོན་པའི་སློབ་ཕྲུག་རྩེ་ཕུད་རྣམས་ལ་ལེགས་གསོལ་བྱ་དགའ། ཟབ་སྦྱོང་མཉམ་བཞུགས་གནང་མཁན་རྣམས་ལ་ཟབ་ཁྲིད་ལེགས་གྲུབ་བྱུང་བའི་ཕྱག་འཁྱེར་བཅས་གནང་ཡོད། །