༄༅། །ཕྱི་ལོ་ ༢༠༢༣ ཟླ་བ་ ༠༩ ཚེས་ ༠༧ ནས་ ༡༧ བར་རུ་སོག་སྐུ་ཚབ་དོན་གཅོད་ཏི་ལོ་རིན་པོ་ཆེ་མཆོག་སོག་ཡུལ་གྱི་གྲོང་ཁྱེར་བྷ་ཡན་ཧོན་གར་དང་། གྷོ་བི་ཨལ་ཏའི། ཨུ་ལས་ཏའི། མོ་རུམ་བཅས་སུ་གཟིགས་སྐོར་ལ་ཕེབས་ཡོད་པ་རེད། 

ཐེངས་འདིའི་འཚམས་གཟིགས་ཀྱི་དམིགས་ཡུལ་གཙོ་བོ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚེའི་ལོ་རྒྱུས་དང་མཛད་པ་འཕྲིན་ལས་སྐོར་གོ་རྟོགས་སྤེལ་རྒྱུ་ཡིན་ཞིང་། སྐབས་དེར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་འབྲེལ་བའི་དཔར་རིས་འགྲེམས་སྟོན་དང་གློག་བརྙན་གཟིགས་འབུལ་ཞུས་པ་མ་ཟད། སོག་སྐད་དུ་བསྒྱུར་བའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གསུང་རྩོམ་ཆོས་ལུགས་ཀྱི་མཚམས་ལས་འདས་པ་ཞེས་པ་དཔར་སྐྲུན་དབུ་འབྱེད་གནང་ཡོད། གྲོང་ཁྱེར་ཁག་ཏུ་གཟིགས་སྐོར་ལ་ཕེབས་སྐབས་སྐུ་ཚབ་དོན་གཅོད་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གོ་ལ་གཅིག་གྱུར་གྱི་དགོངས་གཞི་དང་། ཆོས་ལུགས་ལ་མ་བརྟེན་པའི་བཟང་སྤྱོད་སྐོར་གསུང་བཤད་གནང་བ་མ་ཟད། ས་གནས་ཀྱི་དཔོན་རིགས་དང་། མཁས་པ། མི་མང་དང་མཇལ་འཕྲད་ཀྱིས་བོད་དང་སོག་པོའི་རིག་གཞུང་གི་མཚུངས་ཆོས་དང་། ཕྱོགས་གཉིས་བར་གྱི་འབྲེལ་ལམ་གོང་མཐོར་གཏོང་དགོས་པའི་འབོད་སྐུལ་གནང་ཡོད་པ་བཅས།།