༄༅། །བལ་ཡུལ་དོན་ཁང་ཧི་མ་ལ་ཡའི་ནང་པའི་དཔེ་མཛོད་དང་ལེགས་བྱང་བསྟི་གནས་ཁང་ནས་མཐུན་འགྱུར་གོ་སྒྲིག་འོག་ཕྱི་ལོ་ ༢༠༢༣ ཟླ་ ༩ ཚེས་ ༢༢ ཉིན་བལ་ཡུལ་མཆོད་རྟེན་ཉེ་འདབས་ཏིན་ཅུ་ལི་ཡོལ་མོ་དགོན་པར་༼བལ་ཡུལ་བོད་བརྒྱུད་ནང་བསྟན་རིས་མེད་མཁས་པའི་བགྲོ་གླེང་ཐེངས་དང་པོ་༽ ཞེས་པ་འདི་ལོ་ཐོག་མར་དབུ་འཛུགས་ཀྱི་བགྲོ་གླེང་གནང་བ་དང་། དེ་ནི་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༡ ལོའི་ཆོས་ཚོགས་ཐེངས་༡༡ ཐོག་བཀའ་སློབ་ཕེབས་པའི་དགོངས་དོན་གཞིར་བཞག་པའི་ཐོག་ནས་བོད་མིའི་སྒྲིག་འཛུགས་ཆོས་རིག་ལས་ཁུངས་སུའང་མཁྱེན་རྟོག་སྙན་སེང་ཕུལ་བ་དང་སྦྲགས་བལ་ཡུལ་རྒྱལ་ཁབ་ནང་ཡོད་པའི་བོད་བརྒྱུད་ནང་བསྟན་ཆོས་ལུགས་ཕན་ཚུན་ངོ་སྤྲོད་དང་། ལྷག་པར་ཕྱོགས་ཀུན་ནས་ཐུགས་མཐུན་ཁྲིམས་གཙང་དམ་ཚིག་འོ་ཆུ་གཅིག་འདྲེས་སྔར་ལས་ལྷག་པ་ཡོང་ཆེད་གངས་ལྗོངས་ཆོས་བརྒྱུད་སོ་སོའི་ཐུན་མོང་མ་ཡིན་པའི་ཁྱད་ཆོས་ཅན་གྱི་ཆོས་འབྱུང་དང་། དེང་གི་འཆར་བཤད་སྒྲུབ་གཉིས་ཀྱི་སྒོ་ནས་མི་ཉམས་རྒྱུན་འཛིན་ཇི་ལྟར་གནང་ཕྱོགས་སྐོར་གྱི་བགྲོ་གླེང་ཞིག་ཡིན་པས་ན། སྐབས་དེར་བལ་ཡུལ་ནང་ཡོད་པའི་སྔ་འགྱུར་རྙིང་མ། འགྲོ་མགོན་བཀའ་བརྒྱུད། དཔལ་ལྡན་ས་སྐྱ། རི་བོ་དགེ་ལྡན་པ། གཡུང་དྲུང་བོན། རྒྱལ་བ་ཇོ་ནང་པ། དམ་པའི་ཞི་བྱེད། དཔལ་དེ་ཉིད་འདུས་པ་བོ་དོང་པ་བཅས་ཀྱི་ཆོས་བརྒྱུད་འཛིན་པ་ཁག་གི་༸སྐྱབས་གནས་བླ་སྤྲུལ་དགེ་བཤེས་མཁན་པོ་དང་སློབ་དཔོན་སོགས་མཁས་དབང་རྣམ་མཉམ་ཞུགས་ཀྱི་ཆོས་བརྒྱུད་སོ་སོའི་གཏམ་བཤད་པ་རྣམ་ནས་གོང་འཁོད་བརྗོད་གཞིའི་ཐོག་གཏམ་བཤད་གནང་བ་དང་། ཚོགས་བཅར་བ་རིས་མེད་དགེ་འདུན་པ་རྣམ་ནས་ཀྱང་དོགས་འདྲི་དང་དེ་ལ་གཏམ་བཤད་པས་དྲི་ལན་སོགས་གནང་།

ཆོས་བརྒྱུད་སོ་སོའི་མདོ་འཛིན་པ་ནས་སྡོམ་ཚིག་སྐྱོན་གནང་མཛད། ཆོས་བརྒྱུད་དྲུག་ནས་གཏམ་བཤད་པ་དང་མདོ་འཛིན་པ། ཁུངས་སོ་སོ་ནས་ཚོགས་བཅར་དགེ་འདུན་པ་གྲངས་ཉི་ཤུ་རེ་བཅས་ཆ་ཤས་ལེན་གནང་མཛད། བོ་དོང་པའི་ཚོགས་བཅར་དགེ་འདུན་པ་ཕེབས་ཡོད་ཀྱང་འདི་ལོ་དབུ་བླ་དང་འགན་འཛིན་རྒན་པ་སོགས་ས་གནས་སུ་བཞུགས་མེད་སྟབས་གཏམ་བཤད་པ་ཕེབས་ཐུབ་མེད་ཀྱང་རྗེས་ལོ་མཉམ་ཞུགས་གནང་འཆར་ཡོད་པར་གསུངས། དམ་པའི་ཞི་བྱེད་ཀྱང་གྲྭ་ཚང་བསྟི་གནས་དང་གྲྭ་རྒྱུན་སོགས་མེད་རྐྱེན་ཕ་གཅིག་དམ་པའི་དངོས་སློབ་རྒྱ་སྒོམ་པ་ནས་བརྒྱུད་པའི་ཟུར་ཁང་བླ་བྲང་གི་གདུང་འཛིན་དམ་པ་སངས་རྒྱས་ལགས་དང་། ཆོས་བརྒྱུད་རྒྱུན་འཛིན་པ་གཉིས་ཕེབས་ཐུབ་པ་བྱུང་།སྐབས་དེར་སྐུ་མགྲོན་གཙོ་བོ་རྟ་མང་སྤྲུལ་སྐུ་བློ་བཟང་རྣམ་རྒྱལ་རིན་པོ་ཆེ་མཆོག་དང་། དེ་བཞིན་བལ་ཡུལ་ནང་གི་ཆོས་བརྒྱུད་རིས་མེད་ཀྱི་བླ་ཆེན་མཁན་པོ་རྣམ་དང་། བལ་ཡུལ་ནང་པའི་ཆོས་ཚོགས་ཀྱི་ཚོགས་གཞོན་གྱི་གཙོས་ཆོས་རྒྱུད་སོ་སོའི་ཚོགས་གཙོ་དང་རྒྱུན་ལས། བལ་ཡུལ་ཀཋ་མན་གྲུ་དང་། སྤོག་ར། མཐའ་མཚམས་ཤར་ཝ་ར་ས་ཁུལ་བཅས་ཀྱི་རང་རེ་བོད་མིའི་སྒྲིག་འཛུགས་ཀྱི་ས་གནས་འགོ་འཛིན་ཁག་གི་གཙོས་གཞུང་འབྲེལ་གྱི་སྡེ་ཚན་ཡོད་དོ་ཅོག་གི་འགན་འཛིན་ཁག་དང་། ས་གནས་ཀཋ་མན་གྲུ་ནང་གི་ས་འཐུས་དང་རང་བདེན་ཚོགས་ཆུང་གི་ཚོགས་གཙོ་ཁག དེབཞིན་གཞུང་འབྲེལ་མ་ཡིན་པའི་སྡེ་ཁག་རྣམ་དང་ལྷག་པར་ཧི་མ་ལ་ཡའི་གནད་ཡོད་མི་སྣ་ཚོགས་གཙོ་དང་དགོན་པའི་སྐུ་ཚབ་བཅས་སེར་སྐྱ་གྲངས་གསུམ་བརྒྱ་ལྔ་བཅུ་ལས་བརྒལ་བ་མཉམ་འཛོམས་ཀྱི་མཛད་སྒོ་བཀྲ་ཤིས་ལོ་ལེགས་ངང་གྲུབ་པ་བཅས། །