༄༅། །ཕྱི་ལོ་ ༢༠༢༢ ཟླ་བ་ ༠༥ ཚེས་ ༡༥ ཉིན་ཨ་རིའི་གྲོང་ཁྱེར་སན་ཧྤ་རན་སིས་ཀོར་གནས་སྡོད་བོད་རིགས་གཞོན་སྐྱེས་ཁག་གཅིག་ལ་སྐབས་བཅུ་དྲུག་པའི་བཀའ་ཤག་གི་ལས་གཞི་དང་བླངས་བོད་དོན་ཞུ་གཏུག་ལས་འགུལ་སྐོར་ཕྱི་དྲིལ་བོད་དོན་ཞུ་གཏུག་ཚན་པའི་འགན་འཛིན་འབྲུག་བསྟན་སྐྱིད་ལགས་ཀྱིས་ངོ་སྤྲོད་གནང་ཡོད། 

སྐབས་དེར་འབྲུག་བསྟན་སྐྱིད་ལགས་ཀྱིས་བོད་རིགས་གཞོན་སྐྱེས་རྣམས་ལ་ལས་གཞི་གསར་པ་འདི་ནི་སྔར་ཡོད་བོད་དོན་ཞུ་གཏུག་ལས་འགུལ་ཚགས་ཚུད་གཏང་རྒྱུ་ཡིན་སྐོར་དང་། སན་ཧྤ་རན་སིས་ཀོར་ཡོད་པའི་བོད་རིགས་གཞོན་སྐྱེས་རྣམས་ལ་གཞུང་གི་ལས་བྱེད་དང་། གྲོས་ཚོགས་གོང་འོག་གི་འཐུས་མི་སོགས་ལ་བོད་དོན་སྐོར་ཞུ་གཏུག་བྱ་རྒྱུའི་གོ་སྐབས་ཡོད་པས་གཞོན་སྐྱེས་གང་མང་ལས་འགུལ་འདིའི་ནང་མཉམ་ཞུགས་གནང་རྒྱུའི་རེ་སྐུལ་གནང་། ངོ་སྤྲོད་གྲུབ་པའི་རྗེས་གཞོན་སྐྱེས་རྣམས་ཀྱི་དོགས་གཞི་ཁག་ལ་ལན་འདེབས་གསལ་བཤད་གནང་ཡོད་པ་རེད། 

ཐེངས་འདིའི་གཞོན་སྐྱེས་ཚོགས་འདུ་དེ་བཞིན་བྱང་ཀེ་ལོ་ཕོ་ནི་ཡ་བོད་རིགས་ཚོགས་པ་དང་མཉམ་སྦྲེལ་གྱིས་གོ་སྒྲིག་ཞུས་ཤིང་། ཟླ་འདིའི་ཕྱི་ཚེས་༡༥ཉིན་གྱི་ཚོགས་འདུ་རྗེས་འབྲུག་བསྟན་སྐྱིད་ལགས་ཀྱི་ཨ་རི་དང་ཁེ་ན་ཊ་ཁུལ་གྱི་དང་བླངས་བོད་དོན་ཞུ་གཏུག་ལས་འགུལ་ངོ་སྤྲོད་ཀྱི་ལས་དོན་རེ་ཞིག་གྲུབ་ཡོད་པ་བཅས།།