༄༅། །ཨ་རིའི་རོགས་ཚོགས་ཀྱི་སྐུ་ཚབ་ཚོགས་ཆུང་གི་ཚོགས་མི་རྣམས་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་སུ་ཨ་རིའི་རོགས་ཚོགས་ནས་མཐུན་རྐྱེན་སྦྱར་བའི་ལས་གཞི་ཁག་ལ་གཟིགས་རྟོགས་སླད་ཕེབས་ཡོད། སྐུ་ཚབ་ཚོགས་ཆུང་གི་ཚོགས་མི་རྣམས་ནི་ལས་ཁུངས་ངེས་སྟོན་པ་སྐུ་ཞབས་མརྐ་ཏེ་ཇེན་ཕེལཊ་ (Mark Tegenfeldt) ལགས་དང་། ངེས་སྟོན་པ་གཞོན་པ་འབུམ་རམས་པ་པུ་ནམ་སི་མིཊ་ (Poonam Smith-sreen) ལགས། གཞན་ཡང་ལྕམ་བཱ་ལ་ཀ་ཊི་ (Balaka Dey) ལགས། ལྕམ་ར་དཱ་ནི་ཋ་ཀུ་རི་ (Radharani Thakuria) བཅས་ཡིན། འཕྲོད་བསྟེན་དྲུང་འཕར་བྱམས་པ་ཕུན་ཚོགས་ལགས་དང་ལས་ཁུངས་ཀྱི་ལས་སྣེ་རྣམས་ནས་སྐུ་ཚབ་ཚོགས་ཆུང་ལ་སྣེ་ལེན་ཕེབས་བསུ་ཞུས་གྲུབ་མཚམས་ལས་གཞི་འབྲེལ་མཐུད་པ་བསྟན་འཛིན་ཚེ་དབྱངས་ལགས་ཀྱིས་ཨ་རིའི་རོགས་ཚོགས་ཀྱིས་མཐུན་འགྱུར་འོག་འཕྲོད་བསྟེན་ལས་ཁུངས་ནས་ལག་བསྟར་བྱས་དང་བྱེད་བཞིན་པའི་ལས་གཞི་ཁག་གི་སྐོར་ངོ་སྤྲོད་སྙིང་བསྡུས་དང་། དེ་རྗེས་ལས་གཞི་རེ་རེའི་འབྲེལ་མཐུད་པས་སྐུ་ཚབ་ཚོགས་ཆུང་ལ་ལས་གཞིའི་ངོ་སྤྲོད་དང་འབྲེལ་མཇུག་ཏུ་དྲི་བ་དྲིས་ལན་ཀྱང་གནང་ཡོད་པ་རེད། མཐར་དྲུང་འཕར་བྱམས་པ་ཕུན་ཚོགས་ལགས་ཀྱིས་སྐུ་ཚབ་ཚོགས་ཆུང་ལ་ཐུགས་རྗེ་ལེགས་འབུལ་ཞུས་ཡོད། 

ཨ་རིའི་རོགས་ཚོགས་ཀྱི་སྐུ་ཚབ་ཚོགས་ཆུང་དེ་བཞིན་ཕྱི་ལོ་ ༢༠༢༢ ཟླ་བ་ ༠༣ ཚེས་ ༢༡ ནས་ ༢༥ བར་ཉིན་གྲངས་ལྔའི་རིང་བོད་མིའི་སྒྲིག་འཛུགས་ཀྱི་ལས་ཀྱི་སྣེ་མོ་བ་དང་མཇལ་འཕྲད་དང་། ཨ་རིའི་རོགས་ཚོགས་ཀྱིས་མཐུན་རྐྱེན་སྦྱར་བའི་ལས་གཞི་ཁག་ལ་གཟིགས་རྟོགས་སླད་ཕེབས་ཡོད། གཞན་ཡང་ཐེངས་འདིའི་གཟིགས་སྐོར་སྐབས་རྡ་སའི་ཉེ་ཁྲིས་སུ་ཆགས་པའི་བོད་སློབ་ཁག་དང་། གཞིས་ཆགས། འཕྲོད་བསྟེན་སྨན་ཁང་བཅས་སུ་ཨ་རིའི་རོགས་ཚོགས་ཀྱིས་མཐུན་རྐྱེན་སྦྱར་བའི་ལས་གཞི་ཁག་ལ་གཟིགས་རྟོགས་སླད་ཕེབས་ཀྱི་ཡོད་པ་བཅས།།