༄༅། །རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་འཕགས་བོད་འབྲེལ་མཐུད་ལས་ཁང་གིས་ཕྱི་ལོ་ ༢༠༢༢ ཟླ་བ་ ༡ ཚེས་ ༡༩ ཉིན་ཀ་སྦུག་ཧིན་བོད་མཛའ་འབྲེལ་ཚོགས་པ་དང་ལྷན་དུ་དྲ་ཐོག་ཚོགས་འདུ་ཞིག་བསྐོང་ཚོགས་གནང་ཡོད།

དེ་ཡང་ཚོགས་འདུར་རྒྱ་གར་བོད་དོན་རྒྱབ་སྐྱོར་ཚོགས་པའི་བྱང་བྷེང་གྷལ་དང་འབྲས་ལྗོངས་ཁུལ་གྱི་ས་གནས་འབྲེལ་མཐུད་པ་པདྨ་དབང་འདུས་བྷོ་ཊི་ཡ་ལགས་དང་། ཀ་སྦུག་ཧིན་བོད་མཛའ་འབྲེལ་ཚོགས་པའི་དྲུང་ཆེ་ཟུར་པ་དང་ཚོགས་མི་རྒན་པ་ཚེ་དབང་དཔལ་འབྱོར་ལགས། ཀ་སྦུག་ས་གནས་འགོ་འཛིན་དོན་གྲུབ་བཟང་པོ་ལགས། འཕགས་བོད་འབྲེལ་མཐུད་ལས་ཁང་གི་འགན་འཛིན་འཇིགས་མེད་ཚུལ་ཁྲིམས་ལགས་དང་ལས་བྱེད་བཅས་མཉམ་ཞུགས་གནང་ཡོད།ཚོགས་འདུའི་ཐོག་མར་འཕགས་བོད་འབྲེལ་མཐུད་ལས་ཁང་གི་འགན་འཛིན་འཇིགས་མེད་ཚུལ་ཁྲིམས་ལགས་ཀྱིས་འཚམས་འདྲི་དང་སྦྲགས་ཚོགས་མི་རྣམས་དྲ་ཐོག་ཚོགས་འདུར་ཕེབས་པར་དགའ་བསུ་ཞུས་རྗེས་ཉེ་ལམ་ཕྱི་ལོ་ ༢༠༢༡ ཟླ་བ་ ༡༠ ནང་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ས་གནས་སུ་ཆེད་ཕེབས་གནང་སྐབས་མང་ཚོགས་ཀྱི་བསམ་ཚུལ་བཏོན་པ་ལྟར་ཀ་སྦུག་ཧིན་བོད་མཛའ་འབྲེལ་ཚོགས་པ་སྲ་བརྟན་དང་ནུས་པ་ཆེ་རུ་གཏོང་སླད་ཚོགས་འདུ་བསྐོང་ཚོགས་གནང་བ་ཡིན་ཞེས་ཚོགས་འདུའི་དགོས་དམིགས་འགྲེལ་བརྗོད་གནང་བ་དང་། དེའི་རྗེས་སྐུ་ཞབས་ཚེ་དབང་དཔལ་འབྱོར་ལགས་ཀྱིས་ཀ་སྦུག་ཧིན་བོད་མཛའ་འབྲེལ་ཚོགས་པ་དེ་བཞིན་ཕྱི་ལོ་ ༡༩༩༦ ལོར་ཚེ་འདས་ལ་ཆུང་ཨ་ཡི་ལགས་དང་། རྟ་མགྲིན་རྡོ་རྗེ་འབྲུག་པ་ལགས། པི་ཊི་བྷོ་ཊི་ཡ་ལགས་དང་ཁོང་རང་ཉིད་བཅས་ནས་དབུ་འཛུགས་གནང་ཚུལ་འགྲེལ་བརྗོད་དང་སྦྲགས། ད་ཆ་ཚོགས་པ་དེ་ཉིད་ས་གནས་སུ་ཆགས་ཡོད་ནའང་ཕྱི་ལོ་ ༢༠༡༩ ལོ་ནས་བཟུང་ད་ཡོད་རྒྱུན་ལས་རྣམས་ལོ་ན་རྒས་པ་དང་། ཏོག་དབྱིབས་ནད་ཡམས་རྐྱེན་པས་ལས་དོན་ཚགས་ཚུད་སྤེལ་ཐུབ་མེད་པར་གསུངས། ད་དུང་ཁོང་གིས་མུ་མཐུད་དེ་ཚོགས་པའི་ཚོགས་མིའི་ཁོངས་སུ་རྒྱ་གར་བ་དང་། བོད་མི། བལ་པོ། འབྲས་ལྗོངས་པ། ཤར་པ། རྟ་མང་སོགས་ཚོགས་མི་ ༥༠ ཡོད་སྐོར་འགྲེལ་བརྗོད་སྐྱོན། པདྨ་དབང་འདུས་བྷོ་ཊི་ཡ་ལགས་ཀྱིས་ཕྱི་ལོ་ ༢༠༡༩ ལོར་ཁོང་ཀ་སྦུག་ཏུ་ཕེབས་ཏེ་པི་ཊི་བྷོ་ཊི་ཡ་ལགས་དང་ཚོགས་མི་གཞན་རྣམས་མཇལ་ནས་བོད་དོན་རྒྱབ་སྐྱོར་ཚོགས་པའི་ཚོགས་འདུ་བསྐོང་ཚོགས་གནང་རྒྱུའི་ཐད་གྲོས་མོལ་གནང་ཡང་། ཏོག་དབྱིབས་ནད་ཡམས་ཁྱབ་གདལ་ཆེ་བའི་དབང་གིས་ད་བར་ཚོགས་ཐུབ་མེད་ཅེས་དང་། ཀ་སྦུག་ཧིན་བོད་མཛའ་འབྲེལ་ཚོགས་པས་བོད་ཀྱི་གནད་དོན་ཤུགས་ཆེར་གཏོང་སླད་ལས་འགུལ་ཅི་འདྲ་སྤེལ་ཡང་ཁོང་གིས་རོགས་རམ་དང་རྒྱབ་སྐྱོར་ཆ་ཚང་གནང་རྒྱུ་ཡིན་སྐོར་གསུངས། 

ཀ་སྦུག་ས་གནས་འགོ་འཛིན་དོན་གྲུབ་བཟང་པོ་ལགས་ཀྱིས་བར་ལམ་ཏོག་དབྱིབས་ནད་ཡམས་རྐྱེན་པས་ས་གནས་འགོ་འཛིན་ལས་ཁུངས་ནས་བོད་དོན་ལས་འགུལ་རིགས་སྤེལ་བར་ཀ་སྦུག་ཧིན་བོད་མཛའ་འབྲེལ་ཚོགས་པར་འབྲེལ་མཐུད་ཞུ་རྒྱུ་བྱུང་མེད་པ་དང་། རིམ་པས་ཏོག་དབྱིབས་གནས་སྟངས་བཟང་དུ་ཕྱིན་རྗེས་བོད་མི་དང་རྒྱ་གར་བའི་འབྲེལ་ལམ་ཇེ་བཟང་དུ་གཏང་རྒྱུ་དང་། བོད་དོན་ཤུགས་ཆེ་གཏོང་སླད་ས་གནས་འགོ་འཛིན་ལས་ཁུངས་ཀྱིས་ཧིན་བོད་མཛའ་འབྲེལ་ཚོགས་པ་དང་མཉམ་ལས་གནང་འཆར་ཡོད་པ་འགྲེལ་བརྗོད་གནང་། དེ་རྗེས་ཚོགས་མི་རྣམས་ཀྱིས་ཀ་སྦུག་ཧིན་བོད་མཛའ་འབྲེལ་ཚོགས་པ་ཚགས་ཚུད་གོང་འཕེལ་གཏོང་ཆེད་དགོངས་ཚུལ་བརྗེ་ལེན་དང་གྲོས་བསྡུར་ལྷུག་པོ་གནང་གྲུབ་མཚམས། མཐར་འཕགས་བོད་འབྲེལ་མཐུད་ལས་ཁང་གི་འགན་འཛིན་འཇིགས་མེད་ཚུལ་ཁྲིམས་ལགས་ཀྱིས་ཚོགས་མི་རྣམས་ལ་ཀ་སྦུག་ཏུ་རྟེན་གཞི་བྱས་པའི་གངས་ལྗོངས་ཟློས་གར་ངོ་སྤྲོད་དང་། ཉེ་ལམ་འཕགས་བོད་འབྲེལ་མཐུད་ལས་ཁང་གིས་གོ་སྒྲིག་ཞུས་པའི་མཛད་སྒོའི་ཐོག་རྒྱ་གར་མི་མང་ལ་བོད་ཀྱི་རིག་གཞུང་ངོ་སྤྲོད་སླད་གངས་ལྗོངས་ཟློས་གར་ཚོགས་པའི་སྒྱུ་རྩལ་བ་རྣམས་མཉམ་ཞུགས་གནང་ཡོད་ཅེས་སྙན་སེང་ཞུས་རྗེས་ཚོགས་འདུ་ལེགས་པར་གྲོལ་ཡོད་པ་བཅས། །