༄༅། །ཕྱི་ལོ་ ༢༠༢༡ ཟླ་ ༡༡ ཚེས་ ༡༩ ཉིན་བཀའ་དྲུང་ཡིག་ཚང་ནས་གསལ་བསྒྲགས་གནང་དོན་ལྟར། ཕྱི་ལོ་ ༢༠༢༡ ཟླ་ ༡༢ ཚེས་ ༢ ཉིན་འབུམ་རམས་པ་རྣམ་རྒྱལ་མཆོག་གྲུབ་ལགས་ཀྱིས་བྱང་ཨ་རི་སྐུ་ཚབ་དོན་གཅོད་རྙིང་པ་བཀའ་ཟུར་དངོས་གྲུབ་ཚེ་རིང་ལགས་ཀྱི་དྲུང་ནས་སྐུ་ཚབ་དོན་གཅོད་ཀྱི་ལས་ཁུར་བཞེས་གནང་ཡོད་པ་རེད།

དེ་ཡང་བ་རཱ་ཛིལ་སྐུ་ཚབ་དོན་གཅོད་འཇིགས་མེད་ཚེ་རིང་ལགས་ཀྱིས་སྤྲོད་དཔང་གི་འགན་ཁུར་བཞེས་ཐོག་སྐུ་ཚབ་དོན་གཅོད་གསར་རྙིང་བར་རྩིས་སྤྲོད་རྩིས་ལེན་གནང་ཡོད་ཅིང་། བཀའ་ཤག་གི་ལམ་སྟོན་ལྟར་བྱང་ཨ་རི་སྐུ་ཚབ་དོན་གཅོད་གསར་རྙིང་གི་རྩིས་སྤྲོད་རྩིས་ལེན་དེ་བཞིན་ཕྱི་ལོ་ ༢༠༢༡ ཟླ་ ༡༢ ཚེས་ ༡ ཉིན་དབུ་འཛུགས་གནང་ཡོད་པ་དང་སྐབས་དེར་སྐུ་ཚབ་དོན་ཁང་གི་ལས་བྱེད་ཚང་འཛོམས་གནང་ཡོད། གྱེས་སྟོན་དགོང་ཚིགས་སུ་ཨ་རི་རྒྱལ་སའི་མངའ་ཁུལ་གྱི་བོད་རིགས་སྤྱི་མཐུན་ཚོགས་པའི་ཚོགས་གཙོ་བསྟན་འཛིན་བར་ཞི་ལགས་ཀྱང་མཉམ་ཞུགས་གནང་ཡོད།

ཕྱི་ཚེས་ ༣ ཉིན་ཨ་རི་རྒྱལ་སའི་མངའ་ཁུལ་གྱི་བོད་རིགས་སྤྱི་མཐུན་ཚོགས་པའི་ངོས་ནས་སྐུ་ཚབ་དོན་གཅོད་གསར་པར་འཚམས་འདྲི་དང་། སྐུ་ཚབ་དོན་གཅོད་རྙིང་པར་ཐུགས་རྗེ་ཆེ་ཞུའི་མཛད་སྒོ་ཞིག་གོ་སྒྲིག་ཞུ་གི་ཡོད་ཅིང་། མཛད་སྒོར་བ་རཱ་ཛིལ་སྐུ་ཚབ་དོན་གཅོད་འཇིགས་མེད་ཚེ་རིང་ལགས་ཀྱང་མཉམ་ཞུགས་གནང་གི་ཡོད་པ་བཅས།།