བོད་མི་མང་སྤྱི་འཐུས་སྐུ་ཚབ་ཚོགས་ཆུང་ནས་རྒྱ་གར་གྲོས་ཚོགས་གོང་འོག་གཉིས་ཀྱི་འཐུས་མི་ཁག་ཅིག་དང་མཇལ་འཕྲད་ཀྱིས་བོད་དོན་ཞུ་སྐུལ་ཉིན་བཞི་པ་ལེགས་གྲུབ།

གསར་ལས་ཁང་གི་གསར་འགོད་པས།

༢༠༢༡-༡༢-༡༨

༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། རྒྱ་གར་རྒྱལ་ས་ལྡི་ལིར་དགུན་ཁའི་གྲོས་ཚོགས་འཚོགས་བཞིན་པའི་སྐབས་དང་བསྟུན། སྤྱི་འཐུས་གསེར་རྟ་ཚུལ་ཁྲིམས་ལགས་དང་། སྤྱི་འཐུས་དགེ་བཤེས་ལྷ་རམས་པ་གོ་བོ་བློ་བཟང་ཕན་བདེ་ལགས། སྤྱི་འཐུས་ལྷ་རྒྱ་རི་རྣམ་རྒྱལ་སྒྲོལ་དཀར་ལགས། སྤྱི་འཐུས་དགེ་བཤེས་ཨ་ཀྲོང་རིན་ཆེན་རྒྱལ་མཚན་ལགས། སྤྱི་འཐུས་ཆོས་གྲགས་རྒྱ་མཚོ་ལགས་བཅས་ལས་གྲུབ་པའི་བོད་མི་མང་སྤྱི་འཐུས་སྐུ་ཚབ་ཚོགས་ཆུང་ནས་ཕྱི་ལོ་ ༢༠༢༡ ཟླ་ ༡༢ ཚེས་ ༡༣ ནས་ ༢༣ བར་རྒྱལ་ས་ལྡི་ལིར་རྒྱ་གར་དབུས་གཞུང་གི་གྲོས་ཚོགས་གོང་འོག་གཉིས་ཀྱི་འཐུས་མི་དང་། ཕྱི་རྒྱལ་གཞུང་ཚབ་སོགས་གནད་ཡོད་མི་སྣ་ཁག་ཅིག་མཇལ་འཕྲད་ཀྱིས་བོད་དོན་ཞུ་སྐུལ་གྱི་ལས་འགུལ་སྤེལ་བཞིན་ཡོད་པ་ལྟར། ཕྱི་ཚེས་ ༡༧ བོད་དོན་ཞུ་སྐུལ་གྱི་ཉིན་བཞི་པར་བོད་མི་མང་སྤྱི་འཐུས་སྐུ་ཚབ་ཚོགས་ཆུང་ནས་རྒྱ་གར་གྲོས་ཚོགས་གོང་འོག་གཉིས་ཀྱི་འཐུས་མི་ཁག་ཅིག་དང་མཇལ་འཕྲད་ཀྱིས་བོད་དོན་ཞུ་སྐུལ་གནང་ཡོད།

དེ་ཡང་བོད་མི་མང་སྤྱི་འཐུས་སྐུ་ཚབ་ཚོགས་ཆུང་ནས་ཕྱི་ལོ་ ༢༠༢༡ ཟླ་ ༡༢ ཚེས་ ༡༧ ཉིན་གྱི་སྔ་དྲོ་ཆུ་ཚོད་ ༩།༤༥ ནས་དགོང་དྲོ་ཆུ་ཚོད་ ༨།༣༠ བར་རིམ་པས་རྒྱ་གར་གྲོས་ཚོགས་འོག་མའི་ཨ་རུ་ཎཱ་ཅལ་མངའ་སྡེའི་འཐུས་མི་སྐུ་ཞབས་ཏཱ་པེར་གྷའོ་ (Shri.Tapir Gao,Lok Sabha member from Arunachal) ལགས་དང་། རྒྱ་གར་གྲོས་ཚོགས་འོག་མའི་བི་ཧར་མངའ་སྡེའི་འཐུས་མི་སྐུ་ཞབས་དྷུ་ལཱལ་ཅནྡྲ་གྷོ་སྭ་མི་ (Shri Dulal Chandra Goswami,Lok Sabha member from Bihar) ལགས། རྒྱ་གར་གྲོས་ཚོགས་འོག་མའི་བི་ཧར་མངའ་སྡེའི་འཐུས་མི་སྐུ་ཞབས་ཅནྡྲེཤ་ཝར་པྲ་སད་ (Shri Chandeshwar Prasad,Lok Sabha member from Bihar) ལགས།

རྒྱ་གར་གྲོས་ཚོགས་འོག་མའི་ཧི་མཱ་ཅལ་མངའ་སྡེའི་འཐུས་མི་སྐུ་ཞབས་ཀི་ཤན་ཀཱ་པུར་ (Shri Kishan Kapoor,Lok Sabha member from Himachal) ལགས། རྒྱ་གར་གྲོས་ཚོགས་འོག་མའི་ཧི་མཱ་ཅལ་མངའ་སྡེའི་འཐུས་མི་ལྕམ་སྐུ་རཱ་ནི་པྲཱ་ཏི་བྷཱ་སིངྒ་ (Smt Rani Pratibha Singh,Lok Sabha member from Himachal) ལགས། རྒྱ་གར་གྲོས་ཚོགས་གོང་མའི་ནུབ་བངྒཱལ་མངའ་སྡེའི་འཐུས་མི་སྐུ་ཞབས་སྭ་པཱན་དཱས་གུབྟཱ་ (Shri Dr. Swapan Dasgupta,Rajya Sabha MP from West Bengal) ལགས། རྒྱ་གར་གྲོས་ཚོགས་གོང་མའི་གུཇ་རཱཏ་མངའ་སྡེའི་འཐུས་མི་སྐུ་ཞབས་ཇུ་གྷལ་ཇི་མཱ་ཐུར་ཇི་ཋཱ་ཀུར་ (Shri.Jugalji Mathurji Thakur, Rajya Sabha MP from Gujarat) ལགས་བཅས་དང་སོ་སོར་མཇལ་འཕྲད་ཀྱིས་བོད་དོན་ཞུ་སྐུལ་གནང་ཡོད།

བོད་དོན་ཞུ་སྐུལ་གྱི་ལས་འགུལ་སྤེལ་སྐབས་སྤྱི་འཐུས་རྣམ་པས་གཙོ་བོ་རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་སླར་གསོ་ཡོང་ཐབས་དང་། དེ་བཞིན་བོད་མི་རིགས་ཀྱི་ངོ་བོ་དང་རིག་གཞུང་མུ་མཐུད་རྒྱུན་གནས་ཆེད་རྒྱལ་སྤྱིའི་ཐོག་ཏུ་བོད་དོན་གླེང་སློང་ཡོང་བར་རྒྱ་གར་གཞུང་གིས་ཐུགས་འགན་གཙོ་བོ་བཞེས་དགོས་པའི་འབོད་སྐུལ་དང་། རྒྱལ་སྤྱིའི་དབུ་ཁྲིད་རྣམ་པ་མཉམ་འབྲེལ་གྱི་ཐོག་ནས་བོད་ནང་འགྲོ་བ་མིའི་ཐོབ་ཐང་དང་། ཆོས་དད་རང་དབང་ལ་རྒྱབ་སྐྱོར། ༧གོང་ས་མཆོག་གི་སྐུ་ཚབ་དང་། རྒྱ་ནག་གཞུང་གི་དབར་ཞི་མོལ་ཡོང་ཐབས། མཉམ་འབྲེལ་རྒྱལ་ཚོགས་ཀྱི་གནམ་གཤིས་དང་ཁོར་ཡུག་གི་ཚོགས་འདུ་སོགས་ཀྱི་ཐོག་བོད་ཀྱི་རང་བྱུང་ཁོར་ཡུག་གིས་རྒྱལ་སྤྱིའི་ཐོག་ལ་ཤུགས་རྐྱེན་གང་འདྲ་ཐེབས་ཀྱི་ཡོད་མེད་ཐད་ཚན་རིག་དང་མཐུན་པའི་ཞིབ་འཇུག་ཡོང་ཐབས་བཅས་ཀྱི་སྐོར་རྒྱབ་སྐྱོར་དང་། བོད་ནང་གི་བོད་མི་རྣམས་ལ་ཚད་ལས་བརྒལ་བའི་སྡུག་སྦྱོང་མནར་གཅོད་གཏོང་བཞིན་པར་གདུང་སེམས་མཉམ་བསྐྱེད་མཚོན་སླད། དགུན་དུས་ཨོ་ལིམ་པིག་རྩེད་འགྲན་ལ་གཞུང་འབྲེལ་མཛད་གཙོ་རྣམས་མཉམ་ཞུགས་མི་གནང་བའི་འབོད་སྐུལ་བཅས་ཞུས་གནང་ཡོད།

ཐེངས་འདིའི་བོད་དོན་ཞུ་སྐུལ་ནི་ཕྱི་ལོ་ ༢༠༢༡ ཟླ་ ༡༢ ཚེས་ ༡༤ ནས་དངོས་སུ་འགོ་འཛུགས་ཏེ་ཚེས་ ༢༣ བར་ཉིན་གྲངས་བཅུའི་རིང་གནང་རྒྱུ་ཡིན་པ་དང་། ཞུ་སྐུལ་སྐབས་ཚོགས་དྲུང་ལས་ཁུངས་ཀྱི་ལས་བྱེད་བསྟན་འཛིན་གསལ་སྒྲོན་ལགས་དང་། འཕགས་བོད་འབྲེལ་མཐུད་ལས་ཁུངས་ཀྱི་འབྲེལ་ཡོད་ལས་བྱེད་ཆོས་ཉིད་ཚེ་རིང་ལགས་རྣམ་གཉིས་མཉམ་བཅར་ཞུས་གནང་ཡོད་པ་བཅས། །