༢༠༡༧ ཟླ་ ༦ ཚེས་ ༢༥ རེས་གཟའ་ཉི་མ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༧ ཟླ་ ༦ ཚེས་ ༢༤ ཉིན་བྱང་རྩེ་ཆོས་རྗེ་བློ་བཟང་བསྟན་འཛིན་དཔལ་བཟང་པོ་མཆོག་ལ་དཔལ་མཉམ་མེད་རི་བོ་དགེ་ལྡན་བསྟན་པའི་སྲོག་ཤིང་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་ ༡༠༤ པར་བསྐོ་གཞག་གི་བཀའ་ཡིག་ཕྱག་རྟགས་སྩལ་གནང་མཛད་ཡོད།
དེ་ཡང་རྗེ་བཙུན་བློ་བཟང་བསྟན་འཛིན་མཆོག་ནི་སེར་བྱེས་མཁས་སྙན་གྲྭ་ཚང་གི་གཙང་པ་ཁང་ཚན་ནས་ཡིན་ཞིང་། སྐུ་གཞོན་ནུའི་དུས་ནས་བཀའ་རབ་བྱམས་དགེ་བའི་བཤེས་གཉེན་དུ་མའི་ཞབས་ལ་གཏུགས་ནས་གཞུང་ཆེན་བཀའ་པོད་ལྔ་ལ་ཐོས་བསམ་སློབ་གཉེར་མཐིལ་ཕྱིན་གནང་བ་མ་ཟད། རིམ་བཞིན་རྒྱུད་གྲྭར་ཞུགས་ནས་མདོ་སྔགས་ཟུང་འབྲེལ་གྱི་གནད་རྣམས་བུམ་པ་གང་བྱོའི་ཚུལ་དུ་གསན་བསམ་རྒྱ་ཆེ་གནང་ཡོད།
ཕྱི་ལོ་ ༡༩༣༥ ལོར་གཙང་སྟོད་ལྷ་རྩེ་ཁུལ་དུ་སྐུ་འཁྲུངས། དགུང་ལོ་བཅུའི་སྐབས་༧གོང་ས་ལྔ་པ་ཆེན་པོས་ཕྱག་བཏབ་པའི་ལྷ་རྩེ་ཆོས་སྡེ་དགོན་དུ་སྒྲིག་ཞུགས་དང་མཁན་ཆེན་བསྟན་འཛིན་རྒྱ་མཚོའི་སྐུ་མདུན་ནས་རབ་ཏུ་བྱུང་། དགོན་པའི་སྒྲིག་སྲོལ་ལྟར་རྒྱན་འཇུག་གཉིས་དང་ཆོས་སྤྱོད་རབ་གསལ་སོགས་ཆོས་སྤྱོད་ཁག་ཐུགས་འཛིན་དང་ཚོགས་རྒྱུགས་སུ་ཕུལ་གནང་མཛད། བསྡུས་གྲྭ་ནས་སློབ་གཉེར་དབུ་ཚུགས། ༧རྒྱལ་དབང་ལྔ་པའི་དབུ་ཕར་འདུལ་མཛོད་བཅས་ཆོས་སྡེ་དེའི་ཡིག་ཆ་ཁག་ཐུགས་འཛིན་གནང་སྟེ་དགེ་འདུན་དབུས་སུ་ཚོགས་རྒྱུགས་ཕུལ། དགུང་ལོ་བཅུ་དྲུག་ཐོག་དབུས་སུ་ཕེབས་ཏེ་སེར་བྱེས་མཁས་སྙན་གྲྭ་ཚང་དུ་སྒྲིག་ཞུགས་གནང་། སེར་བྱེས་མཁན་ཟུར་ལྷུན་གྲུབ་ཐབས་མཁས་མཆོག་དང་། དགེ་བཤེས་ངག་དབང་དགེ་འདུན། དགེ་བཤེས་ངག་དབང་རིགས་གསལ། དགེ་བཤེས་ལྷུན་གྲུབ་བཟོད་པ། དགེ་རྒན་བློ་བཟང་ངག་དབང་སོགས་ལ་བསམ་སྦྱོར་གཉིས་ཀྱིས་བསྟེན་ཏེ་གཞུང་ཆེན་ཁག་ལ་གསན་གཟིགས་དང་ཐུགས་གཉེར་གནང་། གཞུང་གསར་འཛིན་གྲྭའི་སྐབས་མཁས་མང་གསེར་རི་ཕྲེང་བའི་དབུས་སུ་རིགས་ཆུང་སྦྱོར་ལམ་ཕྱིར་རྒོལ་གྱི་ཚོགས་བཞེངས་གནང་བས་ཀུན་གྱིས་བསྔགས་བརྗོད་ཀྱི་མེ་ཏོག་གཏོར།
དགུང་ལོ་ཉེར་གསུམ་སྟེང་༧སྐྱབས་རྗེ་ཁྲི་བྱང་རིན་པོ་ཆེའི་ཞལ་སྔ་ནས་བསྙེན་རྫོགས་ཀྱི་སྡོམ་པ་བཞེས། དགུང་ལོ་ཉེར་ལྔའི་སྐབས་བོད་དུ་ཡ་ང་བའི་དུས་འགྱུར་བྱུང་བའི་དབང་གིས་བཙན་བྱོལ་དུ་ཕེབས། དུས་ཡུན་མི་རིང་བར་ལམ་བཟོ་དུ་ཡང་ཕེབས་དགོས་བྱུང་འདུག དེའི་སྐབས་ཀྱི་ཕྱག་རོགས་མི་རྒན་མང་པོས་ཁོང་གི་མཛད་པ་ལ་དད་མོས་དང་བསྟོད་བསྔགས་ཧ་ཅང་ཆེན་པོ་ཞུས། དེའི་རྗེས་སྦག་ས་ཆོས་སྒར་དུ་ཕེབས་ཏེ་སེར་བྱེས་མཁན་ཟུར་རིན་པོ་ཆེ་བློ་བཟང་དབང་ཕྱུག་མཆོག་དང་༧སྐྱབས་རྗེ་ཟོང་རིན་པོ་ཆེ་རྣམ་གཉིས་ཀྱི་དྲུང་ནས་འདུལ་བ་མཚོ་ཊཱིཀ་དང་རིན་ཆེན་ཕྲེང་བ། མཆིམས་མཛོད་སོགས་འདུལ་མཛོད་ཀྱི་གཞུང་ཆེན་ལྷག་མ་གཉིས་ལ་སློབ་གཉེར་གནང་བ་དང་། སྦག་ས་ཆོས་སྒར་སློབ་གྲྭའི་རྣམ་པར་བསྒྱུར་རྗེས་དཔེ་ཁྲིད་དགེ་རྒན་གནང་།
ཕྱི་ལོ་ ༡༩༧༠ ལོར་བྱེས་ཀྱི་སེ་ར་དགོན་པ་ཐོག་མ་རྒྱ་གར་ལྷོ་ཕྱོགས་སུ་ཆགས་པའི་སྐབས་གནས་དེར་ནགས་ཚལ་ཧ་ཅང་སྟུགས་པོ་ཡོད་པ་དེ་དག་གཅོད་འབྲེག་གིས་ཁང་ས་དང་ཞིང་སར་བསྒྱུར་བའི་ཕྱག་ལས་གནང་ནས་ཨར་ལས་དང་ཞིང་ལས་ལོ་མང་རིང་གནང་། ཞོར་དུ་༧སྐྱབས་རྗེ་རིན་པོ་ཆེ་མཆོག་གིས་ཐུགས་གཉེར་མཇུག་སྐྱོང་དང་དགེ་ཕྲུག་རྣམས་ལ་དཔེ་ཁྲིད་འཐུས་ཤོར་མེད་པ་གནང་བ་དང་། དགེ་ལྡན་ལུགས་བཟང་གཙུག་ལག་སློབ་གཉེར་ཁང་གི་གཏན་འབེབས་བཞིན་དགེ་ལུགས་རྒྱུགས་སྤྲོད་ཆེན་མོ་རིམ་ཕུལ་གྱིས་ཕྱི་ལོ་ ༡༩༧༨ ལོར་དགེ་བཤེས་ལྷ་རམས་པའི་མཚན་རྟགས་བཞེས།
༧གོང་ས་༧སྐྱབས་མགོན་ཆེན་པོ་མཆོག་སེ་རར་ཕེབས་པའི་དུས་ཞིག་ལ་རྩོད་རྒྱུགས་ཕུལ་བས་༧གོང་ས་མཆོག་ཐུགས་དགྱེས་གཉེས་ཧ་ཅང་ཆེན་པོས་གཟིམས་ཆུང་མཇལ་ཁ་ཡར་ཞུ་མི་དགོས་པ་མཇལ་ཁ་གནང་།
དེའི་རྗེས་༧གོང་ས་༧སྐྱབས་མགོན་ཆེན་པོ་མཆོག་གི་བཀའ་བཞིན་དཔལ་ལྡན་སྨད་རྒྱུད་གྲྭ་ཚང་དུ་ཆོས་ཐོག་ཕེབས། སྐབས་དེར་རྒྱུད་སྨད་མཁན་པོ་དེང་སྐབས་དགའ་ལྡན་ཁྲི་ཟུར་རི་རྫོང་རིན་པོ་ཆེ་མཆོག་གི་ཞལ་སྔ་ནས་འགྲེལ་བ་བཞི་སྦྲགས་དང་སྦས་དོན་ཀུན་གསལ་སོགས་གསང་སྔགས་རྡོ་རྗེ་ཐེག་པའི་ཟབ་ཆོས་དུ་མ་གསན། ཕྱི་ལོ་ ༡༩༧༩ ལོར་ཊཱིཀྐའི་སྐྱོར་དཔོན་གནང་ནས་ཊཱིཀྐ་ལེའུ་གཉིས་པ་ནས་བརྒྱད་པའི་མཚམས་སྦྱོར་བར་བརྩི་བཞག་སྐྱོར་རྒྱུས་མཚོན་སྒྲིག་ལམ་གྱི་རིམ་པ་རྣམས་མི་ཉམས་གོང་འཕེལ་གནང་།
ཕྱི་ལོ་ ༡༩༨༡ ལོར་༧གོང་ས་༧སྐྱབས་མགོན་ཆེན་པོ་མཆོག་གིས་རྒྱུད་པའི་བླ་མ་དབུ་མཛད་ཀྱི་ཕྱག་རྟགས་རིན་པོ་ཆེ་ཕེབས། ༧གོང་ས་མཆོག་གི་བཀའ་དགོངས་བཞིན་རྒྱུད་གྲྭ་སློབ་གཉེར་བའི་ཆེད་དུ་སྔགས་དང་མཚན་ཉིད། རིག་གནས། སྐད་ཡིག་གཞན་སོགས་ཀྱི་སློབ་ཚན་གཏན་འབེབས་དང་སློབ་གྲྭ་ཡང་གསར་འཛུགས་གནང་། ཕྱི་ལོ་ ༡༩༨༤ ལོར་དཔལ་ལྡན་སྨད་རྒྱུད་གྲྭ་ཚང་གི་མཁན་ཁྲིར་ཕེབས་ཤིང་འགྲེལ་བ་བཞི་སྦྲགས་དང་དཔལ་གསང་བ་འདུས་པའི་བསྐྱེད་རིམ་དང་། ༧རྗེ་བཙུན་ཤེས་རབ་སེང་གེས་མཛད་པའི་ཊཱིཀྐ་ལེའུ་དང་པོ་ནས་བརྒྱད་པའི་མཚམས་སྦྱོར་བར་བརྩི་བཞག་གནང་། ༧གོང་ས་༧སྐྱབས་མགོན་ཆེན་པོ་མཆོག་གི་དབུས་དམ་པ་མང་པོར་བསྟེན་གནང་ནས་དབང་ལུང་འཁྲིད་གསུམ་མན་ངག་དང་བཅས་པ་གསན་བསམ་ཉམས་བཞེས་འགྲན་གྱི་དོ་ཟླ་མེད་པ་གནང་།
ཕྱི་ལོ་ ༢༠༡༠ ལོར་༧གོང་ས་༧སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་དུ་གསུང་ཆོས་གནང་བའི་སྐབས་དེར་༧སྐྱབས་རྗེ་རིན་པོ་ཆེ་མཆོག་༧གོང་ས་མཆོག་མཇལ་ཁ་ཞུས། སྐབས་དེར་ཆོས་ཞུ་བ་འབུམ་ཕྲག་བརྒལ་བའི་དབུས་སུ་༧གོང་ས་༧སྐྱབས་མགོན་ཆེན་པོ་མཆོག་གིས་རྒན་གྲུབ་ཐོབ་ལགས་ཁོང་མཁས་གྲུབ་གཉིས་ལྡན་རེད། བྱང་རྩེ་ཆོས་རྗེའི་ཁྲི་ལ་ཕེབས་པར་འོས་ཤིང་འཚམས་པ་རེད། ཅེས་ཐུགས་ཧ་ཅང་དགྱེས་གཉེས་ཆེན་པོས་འཚམས་འདྲི་ཕེབས། དེང་སྐབས་དགུང་ལོ་ ༨༣ ཕེབས་ཀྱང་རྒྱུན་དུ་ཕྱི་ནང་གི་དོན་གཉེར་ཅན་རྣམས་དང་གདན་སའི་དད་ལྡན་བུ་སློབ་ཡོངས་ལ་སོ་སོའི་ཁམས་མོས་དང་འཚམས་པའི་དབང་ལུང་འཁྲིད་གསུམ་མན་ངག་དང་བཅས་པ་གནང་བ་དང་།
དམིགས་བསལ་གདན་སའི་སློབ་གཉེར་བ་རྣམས་ལ་མདོ་སྔགས་གཉིས་ཀའི་གཞུང་ཆེ་ཆུང་ཁག་བཀའ་ཁྲིད་རྒྱུན་ཆད་མེད་པར་གནང་བཞིན་དུ་བསྟན་དང་འགྲོ་བའི་མགོན་དཔུང་དུ་བཞུགས་ཤིང་། ཕྱི་ལོ་ ༢༠༡༧ ཟླ་ ༦ ཚེས་ ༢༤ ཉིན་༧གོང་ས་༧སྐྱབས་མགོན་རྒྱལ་བའི་དབང་པོས་༧རྗེ་བཙུན་བློ་བཟང་བསྟན་འཛིན་མཆོག་ལ་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་པའི་མཚན་གནས་བཀའ་ཡིག་ཕྱག་རྟགས་སྩལ།།
