༢༠༡༥ ཟླ་ ༡༡ ཚེས་ ༧ རེས་གཟའ་སྤེན་པ།
༄༅། །ཕྱི་ལོ་ ༢༠༡༥ ཟླ་ ༡༡ ཚེས་ ༧ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་གིས་རྒྱ་གར་གསར་ཤོག་གྲགས་ཅན་ཨིན་ཌི་ཡེན་ཨེཀ་སི་པྲེས་སི་ (The Indian Express) ནང་ཕྱག་ལས་གནང་མཁན། བོད་མི་པར་ལེན་གསར་འགོད་པ་བཀྲ་ཤིས་སྟོབས་རྒྱལ་ལགས་སུ་རྒྱ་གར་རྒྱལ་ཡོངས་ཀྱི་ཆེས་མཐོའི་གཟེངས་རྟགས་ཐོབ་པར་དགའ་བསུའི་འཚམས་འདྲི་གནང་བའི་ནང་འཁོད་དོན།
ཕྱི་ལོ་ ༢༠༡༥ ལོའི་རྒྱ་གར་རྒྱལ་ཡོངས་ཀྱི་གསར་འགྱུར་ལས་རིགས་ཐོག་གཟེངས་སུ་འཐོན་པའི་གཟེངས་རྟགས་དེ་ཁྱེད་ལ་ཐོབ་པར་ངོས་ཀྱིས་དགའ་བསུ་ཞུ་རྒྱུ་དང་། བོད་མི་གཞོན་སྐྱེས་ཁྱེད་ལྟ་བུ་ཞིག་གིས་ཆེས་མཐོའི་གཟེངས་རྟགས་འདི་ལྟ་བུ་ཐོབ་པ་མཐོང་སྐབས་ང་ཚོའི་སེམས་ལ་དགའ་སྤོབས་སྐྱེ་བཞིན་འདུག དེ་ནི་རྒྱ་གར་རྒྱལ་ཡོངས་ཙམ་མ་ཟད། རྒྱལ་ཡོངས་གསར་འགྱུར་བརྒྱུད་ལམ་ཁག་གིས་ཁྱེད་ལ་ངོས་འཛིན་གནང་བ་ཞིག་རེད། ཐེངས་འདིར་ཁྱེད་ལ་གཟེངས་རྟགས་འདི་འདྲ་ཞིག་ཐོབ་པ་ནི། དེ་སྔ་ཕྱི་ལོ་ ༢༠༡༤ ནང་ཀ་ཤི་མིར་ཆུ་ལོག་གིས་གཙོས་དཀའ་ངལ་མང་དག་གཅིག་པར་ལེན་གྱིས་ལམ་ནས་སྤྱི་ཚོགས་ནང་བཟང་ཕྱོགས་ཀྱི་འགྱུར་བ་ཞིག་གཏོང་རྒྱུའི་ཆེད་སྙིང་སྟོབས་དང་ཆོད་སེམས་ལ་ངོས་འཛིན་ཐོབ་པ་ཞིག་རེད། ངོས་རང་སྒེར་ལ་མཚོན་ནའང་རྡོར་གླིང་ཁུལ་ནས་བོད་མི་ཞིག་གིས་ཆེས་མཐོའི་གཟེངས་རྟགས་འདི་ལྟ་བུ་ཐོབ་པར་ཧ་ཅང་དགའ་སྤོབ་བྱུང་། ཁྱེད་ལ་གཟེངས་རྟགས་ཐོབ་པ་དེས་འབྱུང་འགྱུར་བོད་མི་གཞོན་སྐྱེས་ཚོར་ལས་དོན་གང་ཅིའི་ཐད་འབད་འབུང་བྱ་རྒྱུར་ཤུགས་རྐྱེན་ཐེབས་ངེས་ཡིན། ཞེས་འཁོད་འདུག
སྤྱིར་འདི་ལོའི་ཕྱི་ཟླ་ ༡༡ ཚེས་ ༤ ཉིན་རྒྱ་གར་གསར་འགོད་ལྷན་ཚོགས་ཀྱིས་བཀྲ་ཤིས་སྟོབས་རྒྱལ་ལགས་ལ་རྒྱལ་ཡོངས་གཟེངས་རྟགས་ཐོབ་པའི་གསལ་བསྒྲགས་སྤེལ་འདུག་པ་དང་། གཟེངས་རྟགས་འདི་ཁོང་ལ་ཐོབ་དགོས་པའི་རྒྱུ་མཚན་གཙོ་བོ་ནི་བཀྲ་ཤིས་སྟོབས་རྒྱལ་ལགས་ཀྱིས་ཕྱི་ལོ་ ༢༠༡༤ ལོར་རྒྱ་གར་ཀ་ཤི་མིར་མངའ་སྡེའི་ནང་ཆུ་ལོག་གི་གོད་ཆག་ཤུགས་ཆེ་ཕོགས་སྐབས་ཁོང་རང་ཉིད་ས་གནས་སུ་དངོས་སུ་བསྐྱོད་ནས་ཉིན་གྲངས་ ༡༢ རིང་པར་ལེན་གནང་བ་དེར་མང་ཚོགས་སོགས་ཀྱི་བསྔགས་བརྗོད་ཧ་ཅང་ཐོབ་ཡོད། འདི་ལོའི་ཕྱི་ཟླ་ ༡༡ ཚེས་ ༡༦ ཉིན་བཀྲ་ཤིས་སྟོབས་རྒྱལ་ལགས་ལ་རྒྱ་གར་སྲིད་འཛིན་སྐུ་ཞབས་པྲ་ནབ་མུ་ཀར་ཇི་མཆོག་གི་གཟེངས་རྟགས་འབུལ་གཏན་འཁེལ་འདུག དེ་ཡང་བཀྲ་ཤིས་སྟོབས་རྒྱལ་ལགས་ནི་རྒྱ་གར་བྱང་ཕྱོགས་རྡོར་གླིང་མངའ་ཁོངས་སོ་ན་ད་ནས་ཡིན་འདུག་པ་དང་། ཆུང་དུས་ཡེ་ཤུའི་སློབ་གྲྭ་སན་ཇོ་སེབ་ནོར་ཐི་པོ་ཡེན་ཊི་ St. Joseph North Point School ཞེས་པ་དེར་སློབ་སྦྱོང་གནང་མྱོང་ཡོད་འདུག
