༢༠༡༤ ཟླ་ ༡༠ ཚེས་ ༡༣ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༡༠ ཚེས་ ༡༠ ཉིན་བྱིས་པའི་ཐོབ་ཐང་ཆེད་འཐབ་རྩོད་གནང་མཁན་རྒྱ་གར་བ་སྐུ་ཞབས་ཀེ་ལ་ཤི་སཏྱཱར་ཐི་མཆོག་ Kailash Satyarthi དང་མ་ལ་ལ་ཡུ་སུབ་ཛ་ཡ་ Malala Yousafzai མཆོག་རྣམ་གཉིས་ལ་འདི་ལོའི་ནོ་བེལ་ཞི་བདེའི་གཟེངས་རྟགས་འབུལ་རྒྱུའི་གསལ་བསྒྲགས་གནང་མ་ཐག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དགའ་བསུའི་འཚམས་འཕྲིན་སྩལ་བའི་ནང་འཁོད་དོན།
རྣམ་པ་གཉིས་ལ་འདི་ལོའི་ནོ་བེལ་ཞི་བདེའི་གཟེངས་རྟགས་འབུལ་ལམ་ཞུས་པར་ངོས་ཀྱིས་དགའ་བསུ་ཞུ་རྒྱུ་དང་། རྣམ་པ་གཉིས་ཀྱིས་ཁོར་ཡུག་གི་གནས་སྟངས་མི་འདྲ་བའི་འོག་ནས་བྱིས་པའི་ཐོབ་ཐང་དང་ཤེས་ཡོན་སོགས་ལ་རྒྱབ་སྐྱོར་ཆེད་འཐབ་རྩོད་གནང་བ་དེར་ནོ་བེལ་ཞི་བདེའི་གཟེངས་རྟགས་འབུལ་ལམ་ཞུས་ཏེ་ངོས་ལེན་གནང་བར་བརྟེན་ངོས་རང་ཧ་ཅང་དགའ་ཚོར་ཆེན་པོ་བྱུང་། དེ་ཡང་༸གོང་ས་མཆོག་གིས་མ་ལ་ལ་ཡུ་སུབ་ཛ་ཡ་མཆོག་ལ་འཚམས་འདྲི་མཛད་དོན། ཁྱེད་རང་ལོ་ན་ཆུང་ཆུང་ཡིན་ཡང་བུད་མེད་ཀྱི་ཤེས་ཡོན་ཐོབ་ཐང་ཆེད་བློ་ཁོག་ཧ་ཅང་ཆེན་པོས་འཐབ་རྩོད་གནང་བར་བརྟེན། མི་ཁག་གཅིག་གི་བློར་མ་བབ་ནས་མགོ་བོར་མེ་མདའ་བརྒྱབ་སྟེ་རྨས་སྐྱོན་བཏང་ཡོད་ཀྱང་ཕྱིས་སུ་དྲག་སྐྱེད་བྱུང་རྗེས་མུ་མཐུད་ནས་སྙིང་སྟོབས་ཞུམ་མེད་ཐོག་བྱིས་པའི་གཞི་རྩའི་ཤེས་ཡོན་གྱི་ཐོབ་ཐང་སྲུང་སྐྱོབ་ཆེད་འབད་བརྩོན་གནང་ཡོད།
དེར་བརྟེན་བསྔགས་བརྗོད་ཞུ་རྒྱུ་ཁོ་ན་ལས་མ་འདས། ཞེས་འཁོད་ཡོད་པ་དང་། ཕྱོགས་མཚུངས་སྐུ་ཞབས་ཀེ་ལ་ཤི་མཆོག་ལ་འཚམས་འདྲི་མཛད་དོན། རྒྱ་གར་གྱི་ཡབ་ཆེན་མེས་པོ་དམ་པ་གཱན་དྷི་མཆོག་ནི་ངོས་རང་སྒེར་གྱི་སློབ་སྟོན་པ་ལྟ་བུར་ངོས་འཛིན་ཞུ་བཞིན་ཡོད། དམ་པ་ཁོང་གིས་འཚེ་མེད་ཞི་བའི་ལམ་སྟོན་འོག་སྐུ་ཚེ་ཧྲིལ་པོའི་རིང་འབད་བརྩོན་གནང་བ་དེས་འཛམ་གླིང་ཁྱོན་ཡོངས་ལ་ཤུགས་རྐྱེན་ཧ་ཅང་ཐེབས་ཡོད། དེར་བརྟེན་ཐེངས་འདིར་གཱན་དྷིའི་རྗེས་འཇུག་པ་སྐུ་ཉིད་མཆོག་ལ་ཞི་བདེའི་གཟེངས་རྟགས་འབུལ་ལམ་ཞུས་པ་འདི་གཱན་དྷི་མཆོག་གི་མཛད་རྗེས་ལའང་ངོས་འཛིན་ཞུས་པ་ཞིག་ཡིན་པར་ངོས་ཀྱིས་ངོས་འཛིན་ཞུ་བཞིན་ཡོད། ཅེས་འཁོད་འདུག་པ་མ་ཟད། དེ་བཞིན་མུ་མཐུད་བཀའ་སློབ་སྩལ་དོན།
ཐེངས་འདིར་ནོ་བེལ་ཞི་བདེའི་གཟེངས་རྟགས་རྒྱ་གར་གྱི་སྐྱེས་པ་ཞིག་དང་པ་ཀི་སི་ཐན་གྱི་བུད་མེད་ཅིག་ལ་ཐུན་མོང་ཐོག་འབུལ་རྒྱུའི་ཐག་གཅོད་གནང་བ་འདི་ནི་ང་ཚོ་ཚང་མ་འགྲོ་བ་མི་རིགས་གཅིག་གྱུར་གྱི་འདུ་ཤེས་འཛིན་པའི་ཐོག་ནས་འཛམ་གླིང་འདི་དེ་སྔ་ལས་ཞི་བདེ་དང་བདེ་སྐྱིད་ལྡན་པ་ཞིག་སྐྲུན་ཐུབ་རྒྱུ་ཡིན་པའི་བརྡ་ལན་སྤྲད་པ་ཞིག་ཡིན་པར་ངོས་ཀྱིས་བསམ་བཞིན་ཡོད། སྤྱིར་སྤྱི་ཚོགས་ནང་བྱིས་པ་བསམ་མེད་ཚོར་བརྙས་བཅོས་དང་གྱོང་གུན་ཕོག་རྒྱུའི་ཉེན་ཁ་ཆེ་ཤོས་ཡོད་ཀྱང་ཁོང་ཚོ་ནི་མ་འོངས་སོན་རྩ་ཆགས་ཡོད་སྟབས། མ་འོངས་སྤྱི་ཚོགས་བརྟན་ལྷིང་ཡོང་མིན་ནི་བྱིས་པ་ཚོར་འདྲ་མཉམ་ཐོག་ནས་ཤེས་ཡོན་གྱི་གོ་སྐབས་ཐོབ་མིན་ལ་རག་ལུས་ཡོད། དེར་བརྟེན་རྣམ་པ་གཉིས་ཀྱིས་བྱིས་པའི་དོན་དུ་འབད་བརྩོན་གནང་བར་ངོས་ཀྱིས་བསྔགས་བརྗོད་ཞུ་རྒྱུ་ཡིན། ཁྱེད་རྣམ་གཉིས་ལ་ནོ་བེལ་ཞི་བདེའི་གཟེངས་རྟགས་འབུལ་ལམ་ཞུས་པ་འདིས། གལ་ཏེ་ང་ཚོས་སོ་སོ་རང་ཉིད་ཙམ་མ་ཟད། འཛམ་གླིང་གི་གནས་སྟངས་ཇེ་བཟང་དུ་གཏོང་དགོས་ན། ཤེས་ཡོན་ཇི་ཙམ་གལ་ཆེན་པོ་ཆགས་ཡོད་པ་དྲན་བསྐུལ་བཏང་བ་ལྟ་བུ་ཞིག་ཆགས་ཡོད། དེར་བརྟེན་ཐེངས་འདིའི་གཟེངས་རྟགས་འདི་ནི་འཛམ་གླིང་ས་ཕྱོགས་གང་སར་གནས་པའི་བྱིས་པ་ཕོ་མོ་རྣམས་ལ་སྙིང་སྟོབས་སྤེལ་མཁན་གྱི་གཟེངས་རྟགས་ཤིག་ཆགས་ཡོད། ཅེས་པའི་འཚམས་འཕྲིན་སྩལ་འདུག
