༢༠༡༤ ཟླ་ ༩ ཚེས་ ༥ རེས་གཟའ་པ་སངས།
༄༅། །ཨོ་སི་ཊོ་ལི་ཡའི་ནང་རྟེན་གཞི་བྱས་པའི་ (SBS dateline) ཞེས་པའི་གྲགས་ཅན་གསར་ཁང་གིས་དེ་སྔ་ཁུལ་དེར་༸གོང་ས་༸སྐྱབས་མགོན་ཆེན་པོ་མཆོག་ཆིབས་སྒྱུར་བསྐྱངས་སྐབས་བཀའ་དྲི་དགོངས་སྐོར་ཞུས་པ་ཞིག་ཕྱི་ལོ་ ༢༠༡༤ ཟླ་ ༩ ཚེས་ ༢ བོད་མིའི་མང་གཙོ་དབུ་བརྙེས་ནས་མི་ལོ་ ༥༤ འཁོར་བ་དང་སྟབས་བསྟུན་འདོན་སྤེལ་གནང་བའི་ནང་གསར་ཁང་ནས་མགོན་པོ་གང་ཉིད་མཆོག་ལ་རྒྱ་ནག་ནང་བཟང་ཕྱོགས་ཀྱི་འཕོ་འགྱུར་ཡོང་རྒྱུའི་ཐོག་བཀའ་དྲི་ཞུ་སྐབས། ༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་ལན་སྩལ་དོན། སྤྱིར་བཏང་འདས་པའི་མི་ལོ་དྲུག་ཅུ་དེའི་རིང་རྒྱ་ནག་ནང་སྲིད་འཛིན་རིམ་པ་འཕོ་འགྱུར་ཕྱིན་ཡོད། དེ་ཡང་མའོ་ཙེ་ཏུང་སྐབས་སྲིད་དབང་གཙོ་བོ་ལྟ་གྲུབ་ཁོ་ནར་དམིགས་ཡོད་པ་དང། ཏེང་ཞའོ་ཕིང་གི་སྐབས་སུ་དཔལ་འབྱོར་ཡར་རྒྱས་ལ་གཙོ་བོར་དམིགས་ཏེ། ཡུལ་དེ་སྤྱི་ཚོགས་རིང་ལུགས་ནས་མ་རྩ་རིང་ལུགས་ཤིག་ཏུ་བསྒྱུར་ཏེ་རྒྱ་ནག་ནང་ཞི་བདེའི་ཁོར་ཡུག་ཅིག་བསྐྲུན་ཐུབ་མེད་ཀྱང། དེང་སྐབས་རིམ་བཞིན་རྒྱ་ནག་ནང་བཟང་ཕྱོགས་ཀྱི་འགྱུར་བ་ཕྲན་བུ་འགྲོ་གི་ཡོད་པ་ལྟ་བུ་མཐོང་གི་འདུག ལྷག་པར་དེ་སྔའི་རྒྱ་ནག་གི་སྲིད་བློན་ཝེན་ཅཱ་བྷའོས་གཙོས་རྒྱ་རིགས་མང་པོའི་ཁྲོད་ནས་ཡུལ་དེའི་ཆབ་སྲིད་ཐོག་བཅོས་སྒྱུར་གཏོང་དགོས་པའི་དགོས་འདུན་འདོན་མཁན་ཇེ་མང་ནས་ཇེ་མང་དུ་འགྲོ་གི་འདུག དེ་བཞིན་ཡུལ་དེའི་ནང་མང་གཙོ་དང་འདྲ་མཉམ། ཁྲིམས་ལུགས་དབང་སྒྱུར་སོགས་ཀྱི་འབོད་སྒྲ་ཤུགས་ཆེ་རུ་འགྲོ་བཞིན་ཡོད་སྟབས། རྒྱ་ནག་ནང་འགྱུར་ལྡོག་འདི་ལྟ་བུ་བྱུང་ན། སྲིད་འཛིན་ཞི་ཅིང་ཕིན་ནས་ཡུལ་དེའི་ནང་གི་ཆབ་སྲིད་བཅོས་སྒྱུར་གཏོང་རྒྱུར་ཁས་ལེན་བྱེད་དགོས་པ་རེད་མ་གཏོགས་གདམ་ག་གཞན་གང་ཡང་ལྷག་མེད། ཅེས་བཀའ་ལན་སྩལ་འདུག
དེ་ནས་གསར་ཁང་གིས་མགོན་པོ་གང་ཉིད་མཆོག་མ་འོངས་བོད་དུ་ཕེབས་ཐུབ་རྒྱུའི་ཐུགས་རེ་མཛད་ཀྱི་ཡོད་མེད་སྐོར་གྱི་དྲི་བ་ཕུལ་བར་༸གོང་ས་མཆོག་གིས་བཀའ་ལན་སྩལ་དོན། ངོས་ཀྱིས་ད་ཆ་ཆབ་སྲིད་ཀྱི་འགན་དབང་ཡོངས་རྫོགས་མི་མང་ནས་འོས་འདེམས་བྱས་པའི་སྲིད་སྐྱོང་བློ་བཟང་སེང་གེར་རྩིས་སྤྲོད་བྱས་ཟིན་སྟབས། ངོས་རང་ལ་ཆབ་སྲིད་ཀྱི་འགན་ཁུར་གང་ཡང་མེད། དེང་སྐབས་རྒྱ་ནག་ནང་བཟང་ཕྱོགས་ཀྱི་འགྱུར་བ་འགྲོ་གི་ཡོད་པ་ཞིག་མཐོང་གི་འདུག་པར་བརྟེན། ངོས་རང་བོད་ཙམ་མ་ཟད། རྒྱ་ནག་གི་གནས་ཆེན་རི་བོ་རྩེ་ལྔར་གནས་སྐོར་དུ་བསྐྱོད་ཐུབ་པའི་རེ་འདུན་བྱེད་བཞིན་ཡོད། ཅེས་སོགས་ཀྱི་བཀའ་ལན་སྩལ་སྐོར་བརྒྱུད་ལམ་ཁག་གཅིག་ནང་གནས་ཚུལ་ཐོན་འདུག་པ་བཅས། །
