༢༠༡༤ ཟླ་ ༨ ཚེས་ ༢ རེས་གཟའ་སྤེན་པ།
༄༅། །ཨ་རིའི་རྒྱལ་ས་ཝ་ཤིང་ཊོན་དུ་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་ནས་རྒྱ་ནག་གཞུང་གིས་བོད་མིའི་རང་ལུས་མེར་སྲེག་ལས་འགུལ་རྣམས་ཉེས་དོན་ཉེས་གསོག་གི་རྣམ་པར་སྒྱུར་བཞིན་ཡོད་སྐོར་གྱི་སྙན་ཐོ་འདོན་སྤེལ་གནང་སྟེ། ད་བར་བོད་མི་རང་ལུས་མེར་སྲེག་གཏོང་མཁན་དང་འབྲེལ་བ་ཡོད་པར་བསྙད་འདོགས་བྱས་ཏེ་འཛིན་བཟུང་བཙོན་འཇུག་དང་། གར་སོང་ཆ་མེད་དུ་གྱུར་བའི་བོད་མི་རྣམས་འཕྲལ་མར་གློད་བཀྲོལ་གཏོང་དགོས་སྐོར་བརྗོད་འདུག
དེ་ཡང་ཕྱི་ལོ་ ༢༠༡༤ ཟླ་ ༧ ཚེས་ ༣༡ ཉིན་རྒྱལ་སྤྱིའི་བོད་དོན་ལས་འགུལ་ཁང་གི་དྲ་གནས་ཐོག་འདོན་སྤེལ་གནང་བའི་སྙན་ཐོའི་ནང་འཁོད་དོན།
རྒྱ་ནག་གཞུང་ནས་བོད་མིའི་རང་ལུས་མེར་སྲེག་གི་ལས་འགུལ་དང་འབྲེལ་བའི་འོག་སྔ་ལོ་ཕྱི་ཟླ་ ༡ པའི་ནང་གྲྭ་བློ་བཟང་དཀོན་མཆོག་ལགས་སུ་རང་ལུས་མེར་སྲེག་བརྒྱུད་སྐུལ་བྱས་པའི་ཉེས་འཛུགས་འོག་སྲོག་ཁྲིམས་དང། ཕྱི་ཟླ་ ༨ པོའི་ནང་སྒྲོལ་མ་སྐྱབས་ལགས་སུ་མི་བསད་པའི་ཉེས་འཛུགས་ཀྱིས་སྲོག་ཁྲིམས་བཅད་ཡོད། དེ་བཞིན་གྲྭ་བརྩོན་འགྲུས་ལགས་དང་དགེ་འདུན་ཚུལ་ཁྲིམས་གཉིས་ལ་ཡང་རང་ལུས་མེར་སྲེག་གཏོང་མཁན་ཚོའི་ཆེད་མཆོད་འབུལ་སྨོན་ལམ་གོ་སྒྲིག་བྱས་པའི་ཉེས་འཛུགས་ཀྱིས་བཙོན་འཇུག་བྱས་པ་སོགས་ཀྱི་གནས་ཚུལ་ཁག་གཅིག་ཐེར་འདོན་བྱས་ཡོད་པ་མ་ཟད། ལྷག་པར་སྔ་ལོའི་ཕྱི་ཟླ་ ༤ པོའི་ནང་རང་ལུས་མེར་སྲེག་གཏོང་མཁན་ཚོའི་ནང་མི་ཉེ་འབྲེལ་གྱིས་གཙོས་དགོན་སྡེ་དང་གྲོང་ཚོའི་མང་ཚོགས་བཅས་སྤྱི་ཚོགས་མཉམ་སྡེབ་བྱེད་མི་རྣམས་ལ་ཉེས་ཆད་འགེལ་རྒྱུའི་གསལ་བསྒྲགས་བྱས་ཡོད། རྒྱ་ནག་གཞུང་ནས་བོད་མི་རང་ལུས་མེེར་སྲེག་ལས་འགུལ་རྣམས་ཉེས་དོན་ཉེས་གསོག་གི་རྣམ་པར་བསྒྱུར་ཏེ། ཕྱི་ལོ་ ༢༠༡༠ ནས་ ༢༠༡༤ བར་རང་ལུས་མེར་སྲེག་དང་འབྲེལ་བའི་བོད་མི་ ༩༨ འཛིན་བཟུང་བྱས་ཡོད་པའི་ཁྲོད་ཁག་གཅིག་ལ་སྲོག་ཁྲིམས་དང་། ཁག་གཅིག་ལ་དུས་ཡུན་རིང་པོའི་བཙོན་འཇུག་གི་ཁྲིམས་ཐག་བཅད་ཡོད་པ་མ་ཟད། དེ་མིན་རྣམས་གར་སོང་ཆད་མེད་དུ་གྱུར་ཡོད། རྒྱ་ནག་གཞུང་གི་བྱེད་སྟངས་དེ་ནི་རྒྱལ་སྤྱིའི་ཁྲིམས་དང་། རྒྱ་ནག་གཞུང་གི་ཁྲིམས་དང་ཡང་མཐུན་གྱི་མེད།
དེར་བརྟེན་རྒྱ་ནག་གཞུང་ནས་ཉེས་མིང་གང་དྲན་བཙུགས་ཏེ་བཙོན་འཇུག་ཁྲིམས་ཐག་བཅད་པ་དང་། གར་སོང་ཆད་མེད་དུ་གྱུར་བའི་བོད་མི་འཕྲལ་མར་གློད་བཀྲོལ་གཏོང་དགོས། དེ་བཞིན་དགོན་གྲོང་སོགས་སྤྱི་ཚོགས་མཉམ་སྡེབ་བྱེད་མིར་ཉེས་ཆད་འགེལ་རྒྱུ་རྣམས་ཕྱིར་ཐེན་བྱེད་དགོས། མདོར་ན། རྒྱ་ནག་གཞུང་ནས་བོད་མིའི་འགྲོ་བ་མིའི་ཐོབ་ཐང་ལ་བརྩི་སྲུང་གིས་དོན་དམ་གྱི་གྲོས་མོལ་བརྒྱུད་བོད་མིའི་མངོན་འདོད་བསྒྲུབ་རྒྱུ་ཧ་ཅང་གལ་ཆེན་པོ་ཆགས་ཡོད། དེར་བརྟེན་རྒྱལ་སྤྱིའི་སྤྱི་ཚོགས་ངོས་ནས་བོད་མིའི་ཐོག་རྒྱལ་སྤྱིའི་ཁྲིམས་དང་འགལ་བའི་བྱ་སྤྱོད་སྤེལ་མཁན་རིགས་ལ་དེ་དག་མཚམས་འཇོག་དགོས་པའི་གནོན་ཤུགས་སྤྲོད་དགོས། ཞེས་སོགས་འཁོད་འདུག
ལྷག་པར་རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོས་གསུང་གསལ། རྒྱ་ནག་གཞུང་ནས་བོད་མིའི་རང་ལུས་མེར་སྲེག་གི་ལས་འགུལ་ཐོག་བཟུང་དང་འཛིན་བཞིན་པའི་དྲག་གནོན་གྱིས་སྲིད་བྱུས་འོག་ཉེས་མེད་བོད་མི་མང་དག་ཅིག་འཛིན་བཟུང་བྱས་པ་དེ་ནི། རྒྱལ་སྤྱིའི་གཞུང་འཛིན་རྣམས་གཉིད་ལས་སད་དགོས་པའི་སྔོན་བརྡ་ཆགས་ཡོད། རྒྱ་ནག་གཞུང་ནས་འཁྱོག་བཤད་དང་བསླུ་བྲིད་གཙོ་བོར་དམིགས་ནས། ཁྲིམས་ཀྱི་གཞི་རྟེན་གང་ཡང་མེད་པའི་ཐོག་མི་སྒེར་ཙམ་མ་ཟད། བོད་མི་སྤྱི་ལ་ཉེས་པ་བཀལ་ཏེ་བོད་མིའི་ལས་འགུལ་ཡོངས་རྫོགས་ལ་དྲག་གནོན་བྱེད་བཞིན་ཡོད་པ་རྣམས་ནི་དང་ལེན་བྱེད་ཐབས་བྲལ་བ་ཞིག་རེད། ཅེས་གསུངས།
