༢༠༡༤ ཟླ་ ༨ ཚེས་ ༢༨ རེས་གཟའ་ཕུར་བུ།
སྐུ་ཞབས་བྷུ་རུ་ནོ་ཌོ་རིན་ག་ཊི་མཆོག་དང་ལྷན།
༄༅། །ནང་སྲིད་བཀའ་བློན་རྒྱ་རི་སྒྲོལ་མ་མཆོག་ཨི་ཊ་ལིའི་རང་སྐྱོང་མངའ་ཁུལ་ལྷོ་ཊི་རོལ་ Autonomous Region of South Tyrol དང་ཏེ་རེན་ཏི་ནོར་ Trentino གཞུང་འབྲེལ་ཕྱོགས་ཕེབས་གནང་སྟེ། ཕྱི་ལོ་ ༢༠༡༤ ཟླ་ ༨ ཚེས་ ༢༥ ཉིན་ལྷོ་ཊི་རོལ་རང་སྐྱོང་མངའ་ཁུལ་གྱི་སྲིད་འཛིན་སྐུ་ཞབས་ཨར་ནོ་ཀོམ་པེ་སི་ཅར་ Dr. Arno Kompatscher མཆོག་དང་མཇལ་འཕྲད་གནང་སྟེ། སྐྱེ་ལྡན་སོ་ནམ་ཡར་རྒྱས་གཏོང་རྒྱུ་དང་ཁྲོམ་རྭ་འཚོལ་ཐབས་ཀྱི་ལས་གཞིའི་ཐོག་ཕྱོགས་གཉིས་པོས་གྲོས་མཐུན་གན་རྒྱའི་ཡིག་ཆར་མཚན་རྟགས་བཀོད་འདུག སྐབས་དེར་སྲིད་འཛིན་མཆོག་གིས་གསུང་དོན། ང་ཚོས་བཙན་བྱོལ་བོད་མིའི་སྐྱེ་ལྡན་སོ་ནམ་གྱི་ལས་གཞི་ཡར་རྒྱས་གཏོང་ཆེད་དེང་དུས་ཀྱི་འཕྲུལ་རིག་དང་ལག་རྩལ་སོགས་ཀྱི་ཐབས་ལམ་མཁོ་སྤྲོད་བྱས་པ་བརྒྱུད་རྒྱབ་སྐྱོར་ཞུ་རྒྱུ་ཡིན། དེར་བརྟེན་དེ་རིང་ལས་གཞི་འདི་འགོ་འཛུགས་བྱ་རྒྱུའི་རྨང་གཞི་འཛུགས་ཐུབ་པ་བྱུང་ཡོད། ཅེས་གསུངས། དེ་ཡང་ལས་གཞི་འདི་རྒྱ་གར་ལྷོ་ཕྱོགས་ཀར་ན་ཊ་ཀ་མངའ་སྡེའི་སྦེལ་ཀོབ་གཞིས་ཆགས་ནང་སྐྱེ་ལྡན་སོ་ནམ་ཉམས་ཞིབ་དང་སྦྱོང་བརྡར་བསྟི་གནས་ཁང་། ORTC ཞེས་པ་དེར་ཐོག་མར་ལག་བསྟར་གནང་རྒྱུ་ཡིན་འདུག
སྐུ་ཞབས་བྷུ་རུ་ནོ་ཌོ་རིན་ག་ཊི་མཆོག་དང་ལྷན།
གཞན་ཡང་དེ་ཉིན་ཕྱེད་ཡོལ་ནང་སྲིད་བཀའ་བློན་མཆོག་གིས་ཏེ་རན་ཏོ་རང་སྐྱོང་མངའ་ཁུལ་གྱི་ཚོགས་གཙོ་སྐུ་ཞབས་བྷུ་རུ་ནོ་ཌོ་རིན་ག་ཊི་ Mr Bruno Doringatti མཆོག་དང་ཚོགས་གཞོན་སྐུ་ཞབས་ཨ་ལེ་སན་ཏོ་རོ་ཨོ་ལི་ཝི་མཆོག Alessandro Olivi ས་གནས་བློན་ཆེན་སྐུ་ཞབས་བཅས་ཇོ་སེབ་ཌེ་ཊོ་མ་སི་ Joseph Detomas མཆོག་བཅས་མཇལ་འཕྲད་གནང་འདུག སྐབས་དེར་ཁོང་རྣམ་པས་ནང་སྲིད་བཀའ་བློན་མཆོག་ལ་ཁུལ་དེའི་རང་སྐྱོང་སྲིད་གཞུང་གིས་བོད་མིའི་གཞི་རྩའི་འགྲོ་བ་མིའི་ཐོབ་ཐང་དང་རང་དབང་ཆེད་འཚེ་མེད་ཞི་བའི་ཐབས་ལམ་ལ་རྒྱབ་སྐྱོར་སྔར་ལྷག་གནང་རྒྱུའི་ཁས་ལེན་ཡང་གནང་འདུག ཐེངས་འདིར་ནང་སྲིད་བཀའ་བློན་མཆོག་གི་འཚམས་གཟིགས་གོ་སྒྲིག་དང་མཐུན་འགྱུར་གནང་མཁན་ཨི་ཊ་ལི་ལྷོ་ཊི་རོལ་རང་སྐྱོང་མངའ་ཁུལ་གྱི་རྒྱལ་ས་བྷོལ་ཛ་ནོའི་ Bolzano ཡུ་རོབ་ཤེས་ཡོན་ཚན་པའི་ European Academy འགན་འཛིན་སྐུ་ཞབས་གན་ཐར་ཀོ་ལོ་ཉ་ Dr. Günther Cologna མཆོག་ཡིན་པ་དང་། འཚམས་གཟིགས་སྐབས་ནང་སྲིད་ལས་ཁུངས་ཀྱི་འཆར་འགོད་འགན་འཛིན་ལས་ཚབ་ངག་དབང་རྒྱལ་མཚན་ལགས་ཀྱང་ཕེབས་འདུག
སྐུ་ཞབས་ཨར་ནོ་ཀོམ་པེ་སི་ཅར་མཆོག་དང་ལྷན།
ནང་སྲིད་བཀའ་བློན་མཆོག་ཨི་ཊ་ལིར་ཕྱོགས་ཕེབས་མ་གནང་གོང་རྒྱལ་ས་དིལླིར་ཕྱི་ཚེས་ ༢༡ ཉིན་རྒྱ་གར་གྱི་བློན་ཆེན་སྐུ་ཞབས་ཀལ་རཱཇ་མིཤྲཱ་ Mr Kalraj Mishra མཆོག་དང་མཇལ་འཕྲད་གནང་འདུག བློན་ཆེན་ཁོང་ནི་རྒྱ་གར་ནང་ཚོང་རིགས་ཆུང་འབྲིང་རིགས་ཀྱི་ལས་འཁུར་བཞེས་བཞིན་འདུག སྐབས་དེར་ནང་སྲིད་བཀའ་བློན་མཆོག་གིས་བོད་མིའི་ལག་ཤེས་སོགས་བཟོ་ལས་ཆུང་ཚག་ཁག་གི་གནས་སྟངས་སྐོར་ངོ་སྤྲོད་ཞུས་འདུག
