༢༠༡༤ ཟླ་ ༧ ཚེས་ ༢ རེས་གཟའ་ལྷག་པ།
༄༅། ། ཕྱི་ལོ་ ༢༠༡༤ ཟླ་ ༧ ཚེས་ ༡ ཉིན་ཡུན་ནན་བདེ་ཆེན་ཁུལ་ཀྱི་ས་གནས་བོད་མིས་ཁུལ་དེའི་གཏེར་ཁ་སྔོག་འདོན་ལས་དོན་རྒྱ་སྐྱེད་མཚམས་འཇོག་ཡོང་བའི་ཞུ་འབོད་དང་། ངོ་རྒོལ་བྱེད་སྐབས་ཉེན་རྟོག་པས་མི་དམངས་ལ་གཅར་རྡུང་དང་འཛིན་བཟུང་བྱས་འདུག
དེ་ཡང་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཡུན་ནན་བདེ་ཆེན་རྫོང་ཁོངས་ཡ་མ་ཡུལ་ཚོ་དམར་སྟག་གྲོང་པའི་ས་གནས་ཀྱི་གནས་རི་ཡོད་སར་རྒྱ་ནག་གི་གཏེར་ཁ་སྔོག་འདོན་ཚན་པ་ཁག་གིས་ཟངས་ཀྱི་གཏེར་ཁ་སྔོག་བཞིན་པའི་ཐོག་གྲོང་ཚོའི་རྒྱབ་རི་ནས་གཏེར་ཁ་སྔོག་ཡུལ་བར་གཞུང་ལམ་བཟོས་པ་དང་། གཏེར་ཁ་སྔོག་འདོན་གྱི་ལས་དོན་རྒྱ་སྐྱེད་བྱེད་སྐབས་ས་གནས་བོད་མི་ཚོས་རྒྱབ་རིར་གཏེར་ཁ་སྔོག་འདོན་བྱེད་ན་མི་འགྲིག་པ་དང་། གཏེར་ཁ་སྔོག་འདོན་བྱེད་སའི་ཉེ་འགྲམ་དུ་མཚོ་ཆེན་པོ་ཞིག་ཡོད་ལུགས
ལྷག་པར་གྲོང་པའི་གནས་རི་དང་གཞི་བདག་གནས་ཡོད་སྟབས་གཏེར་ཁ་སྔོག་འདོན་གྱི་ལས་དོན་མཚམས་འཇོག་ཡོང་བའི་རེ་བ་ཞུས་ཀྱང་རྒྱ་གཞུང་གི་གཏེར་ཁ་སྔོག་འདོན་ཚན་པས་བདག་སྤྲོད་མ་བྱས་བར་རྩོད་རྙོག་བྱུང་ཡོད་འདུག
དེ་མ་ཐག་རྫོང་གི་ཉེན་རྟོག་པ་དང་དྲག་ཆས་དམག་མི་བརྒྱ་ཕྲག་ལྷག་ཡོང་ནས་ས་གནས་བོད་མི་ཚོར་ཉེས་རྡུང་བཏང་སྟེ་ཉུང་མཐར་མི་གྲངས་ ༩ ཙམ་འཛིན་བཟུང་བྱས་ཡོད་འདུག ལྷར་པར་བུད་མེད་གཅིག་ལ་ཉེས་རྡུང་ཚབས་ཆེན་བཏང་སྟེ་སྨན་ཁང་ནང་དུ་ལུས་ཡོད་འདུག་པ་མ་ཟད། མུ་མཐུད་གཏེར་ཁ་སྔོག་འདོན་ལས་དོན་ལ་འགོག་རྐྱེན་བཟོས་ཚེ་གོང་རིམ་ནས་གསོད་ཆོག་པའི་ཆོག་མཆན་ཡོད་པའི་ཉེན་བརྡ་ཡང་བཏང་ཡོད་འདུག
