༢༠༡༤ ཟླ་ ༦ ཚེས་ ༡༡ རེས་གཟའ་ལྷག་པ།
༄༅། །དེང་སྐབས་བོད་མི་མང་སྤྱི་འཐུས་ལྷན་ཚོགས་ཀྱི་ཞུ་གཏུག་ཚོགས་ཆུང་གིས་བོད་དོན་ཞུ་གཏུག་ཆེད་ཡུ་རོབ་རྒྱལ་ཁབ་གཅིག་ནང་བོད་དོན་ཞུ་གཏུག་གནང་དང་གནང་མུས་ཡིན་པ་ལྟར་ཕྱི་ལོ་ ༢༠༡༤ ཟླ་ ༦ ཚེས་ ༡༠ ཉིན་བོད་དོན་ཞུ་གཏུག་གི་སྣེ་ཁྲིད་བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གིས་བོད་དོན་ཞུ་གཏུག་ཇི་ཞུས་སྐོར་བརྒྱུད་ལམ་ཁག་གཅིག་ནང་གསུང་གསལ། བོད་མི་དམངས་སྤྱི་འཐུས་སྐབས་ ༡༥ པའི་སྐབས་ལས་དོན་གང་ཞིག་བྱེད་ཐུབ་རྒྱུ་ཡོད་མེད་སྐོར་གོ་བསྡུར་བྱས་པ་ལྟར། དེ་རིང་འདི་གར་ང་ཚོ་ཞུ་གཏུག་ཚོགས་ཆུང་ཞིག་བོད་དོན་ཞུ་གཏུག་ཆེད་བཅར་བ་ཡིན།
ང་ཚོའི་དམིགས་ཡུལ་གཞིར་བཟུང་ཐོག་མར་ང་ཚོས་ཡུ་རོབ་མནའ་མཐུན་རྒྱལ་ཁབ་ཀྱི་བསྟི་གནས་སྦེལ་ཇམ་ནས་བོད་དོན་ཞུ་གཏུག་འགོ་འཛུགས་ཀྱིས་ཤར་ཡུ་རོབ་རྒྱལ་ཁབ་པོ་ལེན་ཌེ་དང་། ཨི་སི་ཏོ་ནའི་ཡ། ཅེཀ་སྤྱི་མཐུན་རྒྱལ་ཁབ་སོགས་ནང་སྐོར་བསྐྱོད་ཀྱིས་གྲོས་ཚོགས་ཀྱི་འཐུས་མིས་གཙོས་གནད་ཡོད་མི་སྣ་གསར་རྙིང་དང་མཇལ་མོལ་ཞུ་སྐབས་འགྲེལ་བཤད་དེ་ཙམ་རྒྱག་མི་དགོས་པར། ཁོང་རྣམ་པས་བོད་ནང་དཀའ་ངལ་ཡོད་པ་ཞལ་བཞེས་ཀྱིས་ཐོག་ནས་བོད་དོན་ལ་རྒྱབ་སྐྱོར་མུ་མཐུད་གནང་རྒྱུའི་རྣམ་འགྱུར་སྟོན་གནང་བཞིན་འདུག དེ་ནི་སྤྱིར་༸གོང་ས་༸སྐྱབས་མགོན་ཆེན་པོ་མཆོག་གིས་འགྲོ་དོན་ཆེད་ཡུལ་གྲུ་དེ་དག་ནང་ཆིབས་སྒྱུར་བསྐྱངས་པའི་བཀའ་དྲིན་དང་། ཡང་སྒོས་ཡུལ་གྲུ་དེ་དག་དེ་སྔ་གུང་ཁྲན་རིང་ལུགས་ཀྱིས་མནར་གཅོད་མྱངས་པའི་མྱོང་ཚོར་ཡོད་པར་བརྟེན་ནས་བྱུང་བ་ཞིག་རེད། དེ་བཞིན་ང་ཚོས་ཀྱང་བོད་མིའི་སྒྲིག་འཛུགས་ཀྱི་ལངས་ཕྱོགས་དབུ་མའི་ལམ་བརྒྱུད་ནས་བོད་དོན་རྩོད་བཞིན་ཡོད་པ་དང། དེའི་ཐོག་ནས་རྣམ་པ་ཚོའི་གཞུང་དང་གྲོས་ཚོགས་ཀྱི་མི་སྣ་རྒྱ་ནག་གཞུང་དང་འབྲེལ་བ་གནང་སྐབས། བོད་རྒྱ་འབྲེལ་མོལ་བསྐྱར་གསོ་བྱེད་དགོས་པའི་བསྐུལ་མ་གནང་རོགས། ཞེས་ཡིག་ངག་གཉིས་ནས་ཞུས་ཡོད། ཅེས་འགྲེལ་བརྗོད་གནང་འདུག་པ་བཅས། །
