༢༠༡༤ ཟླ་ ༦ ཚེས་ ༡༧ རེས་གཟའ་མིག་དམར།
༄༅། །རྒྱ་ནག་གི་སྲིད་བློན་ལི་ཁི་ཆང་ Premier Li Keqiang དབྱིན་ཡུལ་དུ་ཉིན་གསུམ་རིང་གཞུང་འབྲེལ་ཕྱོགས་བསྐྱོད་སྐབས་དང་བསྟུན་དབྱིན་ཇིའི་སྲིད་བློན་གཞོན་པ་སྐུ་ཞབས་ནིཀ་ཀེ་ལེག་ Nick Clegg མཆོག་གིས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་བརྡལ་བཤིག་གཏོང་བཞིན་པའི་སྐོར་གསུང་དོན། རྒྱ་ནག་གཞུང་གིས་ཆེད་མངགས་འགྲོ་བ་མིའི་ཐོབ་ཐང་ལ་འཆར་གཞི་ལྡན་པའི་ཐོག་ནས་རྩིས་མེད་རྡོག་རོལ་ཤུགས་ཆེ་གཏོང་བཞིན་ཡོད་པར་བརྟེན་ཉེས་ཅན་པ་ཆགས་ཡོད།
རྒྱ་ནག་མི་དམངས་ཚོ་རྒྱ་ནག་དམར་ཤོག་དབང་ཆ་གཅིག་བསྡུས་ཀྱི་ཆབ་སྲིད་ཚོགས་པ་གཅིག་གི་ལྕགས་སྒྲོགས་འོག་བཅིངས་ནས་དཀའ་སྡུག་མྱོང་བཞིན་ཡོད། དམར་ཤོག་ཚོགས་པ་གཅིག་གིས་དབང་ཆ་གཅིག་བསྡུས་བྱས་ནས་གཞུང་འཛིན་རྒྱུའི་ལམ་ལུགས་དེ་ནི་གུ་ཡངས་དང་ཕྱི་གསལ་ནང་གསལ་གྱི་མང་གཙོའི་ལམ་ལུགས་དང་ཡོངས་སུ་རྒྱབ་འགལ་ཆགས་ཡོད། རྒྱ་ནག་གི་དཔལ་འབྱོར་ཐོག་ཡར་རྒྱས་ཧ་ཅང་འགྲོ་བཞིན་ཡོད་པ་དེས་གུང་ཁྲན་ཚོགས་པར་གནོན་ཤུགས་སྤྲད་ནས་རྒྱ་ནག་མི་དམངས་རྣམས་ལ་ཆབ་སྲིད་ཀྱི་རང་དབང་སྤྲོད་དགོས་པ་ཆགས་རྒྱུ་རེད། ཅེས་གསུངས་པ་མ་ཟད། ཁོང་གིས་དེ་སྔ་སྲིད་བློན་ཌེ་ཝི་ཌི་ཀེ་མི་རོན་མཆོག་དང་ལྷན་༸གོང་ས་༸སྐྱབས་མགོན་ཆེན་པོ་མཆོག་མཇལ་འཕྲད་ཞུས་པར་རྒྱ་ནག་གཞུང་ཧ་ཅང་ཁོང་ཁྲོ་ལངས་ཏེ་དབྱིན་གཞུང་དང་གནས་སྐབས་འབྲེལ་ལམ་ཆུང་དུ་བཏང་ཡོད། འོན་ཀྱང་སྲིད་བློན་གཞོན་པ་མཆོག་གིས་༸གོང་ས་ཏཱ་ལའི་བླ་མ་མཆོག་དང་མཇལ་འཕྲད་ཞུས་པ་དེར་གནོང་འགྱོད་གང་ཡང་མེད་པ་མ་ཟད། འབྱུང་འགྱུར་༸གོང་ས་ཏཱ་ལའི་བླ་མ་མཆོག་དང་སླར་ཡང་མཇལ་འཕྲད་ཞུ་རྒྱུའི་རེ་བ་ཞུ་བཞིན་ཡོད་སྐོར་གསུངས་འདུག
