༢༠༡༤ ཟླ་ ༦ ཚེས་ ༥ རེས་གཟའ་ཕུར་བུ།
༄༅། །ཕྱི་ལོ་ ༢༠༡༤ ཟླ་ ༦ ཚེས་ ༥ རེས་གཟའ་ཕུར་བུའི་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་ལ་དཔལ་ལྡན་སྲིད་སྐྱོང་མཆོག་དང་། ཕྱི་དྲིལ་བཀའ་བློན་མཆོག་རྣམ་གཉིས་ཀྱིས་རྡ་སྟེང་བོད་ཁྱིམ་ཚོགས་ཁང་དུ་སྔ་དྲོའི་ཆོས་ཐུན་གྲུབ་མཚམས་རྒྱལ་སྤྱིའི་སྟེང་དབུ་མའི་ལམ་གྱི་གོ་རྟོགས་ལས་འགུལ་རྒྱ་སྐྱེད་གཏོང་ཐབས་ཀྱི་ལས་གཞིའི་ཡིག་ཆ་ཁག་གསུམ་སྤྱན་བསྟར་ཞུས་པ་དང་སྦྲགས།
མགོན་པོ་གང་ཉིད་མཆོག་གིས་བཀའ་སློབ་སྩལ་དོན། ཁྱེད་རང་ཚོ་ཚང་མས་ཤེས་གསལ་རེད། ༸གོང་ས་ལྔ་པ་ཆེན་པོའི་སྐབས་དགའ་ལྡན་ཕོ་བྲང་དབུ་བརྙེས་པ་ནས་བཟུང་༸རྒྱལ་དབང་སྐུ་ཕྲེང་རིམ་བྱོན་གྱིས་ལུགས་གཉིས་ཐུགས་འགན་བཞེས་འགོ་ཚུགས་པ་རེད། ངོས་རང་ཉིད་རང་ལོ་ ༡༦ ནས་དགའ་ལྡན་ཕོ་བྲང་གི་འགན་ཁྱེར་ཏེ་རང་ལོ་ ༧༦ བར་ལོ་དྲུག་ཅུའི་རིང་འགན་ཁྱེར་ཡོད། དེའི་ནང་གསེས་ཕྱི་ལོ་ ༢༠༠༡ ལོར་འོས་བསྡུའི་ལམ་ནས་བཀའ་བློན་ཁྲི་པ་འདེམས་བསྐོ་བྱས་རྗེས་ངོས་ཀྱི་གནས་སྟངས་དེ་ཕྱེད་རྒན་ཡོལ་ཆགས་ཡོད། དེ་ནས་ཕྱི་ལོ་ ༢༠༡༡ ནས་ངོས་རང་རྒན་ཡོལ་ཆ་ཚང་ཞུས་པ་ཡིན། དེ་དུས་མང་ཚོགས་ཀྱིས་འོས་འདེམས་བྱས་པའི་ཆབ་སྲིད་དབུ་ཁྲིད་བློ་བཟང་སེང་གེ་ལགས་ཀྱི་དམ་འབུལ་མཛད་སྒོའི་སྐབས་བརྗོད་རྒྱུ་བྱུང་།
ངོས་ཀྱིས་རང་ལོ་ ༡༦ སྐབས་སྲིད་སྐྱོང་སྟག་བྲག་རིན་པོ་ཆེའི་སྐུ་མདུན་ནས་ཆབ་སྲིད་ཀྱི་འགན་དབང་ཞུས་པ་རེད། ད་ལྟ་ལོ་ ༦༠ ཕྱིན་པའི་རྗེས་ཆབ་སྲིད་ཀྱི་འགན་དབང་དེ་ངོས་ཀྱི་མང་གཙོའི་ལམ་ནས་མི་མང་གིས་འོས་འདེམས་བྱས་པའི་ཆབ་སྲིད་ཀྱི་འགོ་ཁྲིད་སྲིད་སྐྱོང་བློ་བཟང་སེང་གེ་ལ་རྩིས་སྤྲོད་རྒྱུ་བྱུང་བ་དེ་ངོས་ཀྱི་རིང་ནས་སྙིང་དུ་བརྣག་པའི་འདོད་པའི་དོན་གཅིག་ཆགས་ཀྱི་ཡོད། དེ་གྲུབ་ནས་ཧ་ཅང་ཡག་པོ་བྱུང་སོང་ཞེས་བརྗོད་རྒྱུ་བྱུང་། དེ་རིང་འདིར་ཆབ་སྲིད་ཀྱི་གནས་སྟངས་སྐོར་སྲིད་སྐྱོང་གིས་འགྲེལ་བཤད་རྒྱག་རྒྱུ་དང་ཡིག་ཆ་བང་བསྒྲིགས་འདུག ཁྱེད་རང་ཚོར་དྲི་བ་དྲིས་ལན་གང་ཡོད་ཆབ་སྲིད་ཀྱི་འགོ་ཁྲིད་ལ་བཀའ་འདྲི་ཞུས་ན་ཤིན་ཏུ་འོས་པ་དང་འབྲེལ་མཚུངས་རེད། དེ་རང་ཡིན། ་བཀྲ་ཤིས་བདེ་ལེགས། ཐུགས་རྗེ་ཆེ། ཞེས་བཀའ་སློབ་སྩལ་ཡོད།
