༢༠༡༤ ཟླ་ ༤ ཚེས་ ༩ རེས་གཟའ་ལྷག་པ།

༄༅། །ཕྱི་ལོ་ ༢༠༡༤ ཟླ་ ༤ ཚེས་ ༨ ཉིན་ཕྱི་དྲིལ་བཀའ་བློན་བིད་སྐྱིད་ཆོས་དབྱངས་མཆོག་གིས་བརྙན་འཕྲིན་བརྒྱུད་ཐད་ཀར་མེཀ་སི་ཀོའི་མཐོ་སློབ་གྲགས་ཅན་གྱི་སློབ་མ་རྣམས་དང་གླེང་མོལ་གནང་ཡོད། སྐབས་དེར་བཀའ་བློན་མཆོག་གིས་ལྷོ་ཨ་རིའི་མེཀ་སི་ཀོ་སི་ཊིའི་ནང་རྟེན་གཞི་བྱས་པའི་ (Santa Fe campus of Tecnológico de Monterrey University) ཞེས་པའི་མཐོ་སློབ་ཀྱི་དགེ་ལས་སློབ་མ་གྲངས་ ༦༥ ཙམ་ལ་ད་ལྟའི་བོད་ནང་གི་ཛ་དྲག་གནས་སྟངས་སྤྱི་དང་ལྷག་པར་དུ་རྒྱ་ནག་གཞུང་གིས་ཕྱི་ལོ་ ༢༠༠༨ ནས་དམ་བསྒྲགས་ཤུགས་ཆེར་བཏང་རྐྱེན་ཕྱི་ལོ་ ༢༠༠༩ ནས་ད་བར་བོད་མི་ ༡༢༩ རང་ལུས་མེར་སྲེག་བཏང་ཡོད་པ་དང་བོད་མི་དེ་དག་གིས་རང་ལུས་མེར་སྲེག་གཏོང་སྐབས་༸གོང་ས་མཆོག་བོད་དུ་གདན་འདྲེན་ཞུ་དགོས་པ་དང་། བོད་ལ་རང་དབང་དགོས་པའི་འབོད་ཚིགས་བསྒྲགས་ཡོད་སྐོར་གསུངས་པ་མ་ཟད། བཀའ་བློན་མཆོག་གིས་སྐབས་དེར་བོད་མིའི་སྒྲིག་འཛུགས་ཀྱིས་རྒྱ་ནག་གཞུང་དང་ལྷན་དབུ་མའི་ལམ་གྱི་སྲིད་བྱུས་འོག་འཚེ་མེད་ཞི་བའི་གྲོས་མོལ་གྱི་ལམ་ནས་བོད་ཀྱི་དཀའ་ངལ་སེལ་ཐབས་བྱེད་བཞིན་ཡོད་སྐོར་གསུང་དོན། བོད་མིའི་སྒྲིག་འཛུགས་ཀྱིས་བོད་རང་བཙན་རྩོད་ལེན་མ་བྱས་པར་དབུ་མའི་ལམ་གྱི་སྲིད་བྱུས་འོག་བོད་མི་ཚོར་རྒྱ་ནག་གི་རྩ་ཁྲིམས་ནང་འཁོད་པའི་ཆ་རྐྱེན་གཞིར་བཟུང་མིང་དོན་མཚུངས་པའི་རང་སྐྱོང་གི་གནས་བབ་རྩོད་བཞིན་ཡོད། ཅེས་གསུངས། གཞན་ཡང་སྐབས་དེར་བོད་ཀྱི་སྲིད་བྱུས་ཉམས་ཞིབ་ཁང་གི་ཁོར་ཡུག་ཆེད་ལས་པ་བསྟན་པ་རྒྱལ་མཚན་ལགས་ཀྱིས་བོད་ནང་གི་ཁོར་ཡུག་སྐོར་གཏམ་བཤད་གནང་སྐབས་གོ་ལའི་གནམ་གཤིས་འགྱུར་ལྡོག་དེས་མཐོ་སྒང་བོད་ཀྱི་གནམ་ཤིས་ལ་དོ་ཕོག་ཇི་བྱུང་དང་། རྒྱ་ནག་གཞུང་གིས་བོད་ཀྱི་འབྲོག་པ་རྣམས་བཙན་དབང་འོག་གཞིས་སྤོས་བྱས་བཅུག་པ་དང་། བོད་ཀྱི་རྒྱུག་ཆུ་དང་ཆུ་ཀླུང་ཁག་ལ་ཆུ་རགས་རྒྱག་པ་དང་ཁ་འགྱུར་བྱས་པ། བོད་ཀྱི་རང་བྱུང་གཏེར་ཁ་གང་བྱུང་སྔོག་འདོན་བྱས་པ། ཤིང་ནགས་གཅོད་བྲེག་བྱས་པ་སོགས་ཀྱི་སྐོར་གསུངས་པ་མ་ཟད། སློབ་མ་ཚོའི་དྲི་བ་རྣམས་ལ་ལན་འདེབས་ཡང་གནང་ཡོད། ཐེངས་འདིའི་བགྲོ་གླེང་གི་བརྙན་འཕྲིན་དེ་བཞིན་སླར་ཡང་ཡུལ་དེའི་མཐོ་སློབ་གཞན་ལ་བསྐྱར་སྟོན་གནང་རྒྱུ་ཡིན་འདུག་པ་བཅས།།